Read Konyak Naga 2 KORINTH 1 Bible Online

2 KORINTH 1 - Konyak Naga bible

2 KORINTH 1

¹Paul, Kahwange mongpu kaiye Jesu Khrista lampu ja, hüyange teman jeiheinao, Timothy mepu: Korinth me ngohpu Kahwang bumeinok tangte hüyange numan phei, Akhaia khongkümpu me ngohpu üjaolan üshei tangte.

²Teman Üpa Kahwang mepu hüyange Youngwanpa Jesu Khrista mepu numan tangte hüyange chingmei ngohtüoh.

³Teman Youngwanpa Jesu Khrista Üpa, shüpshe pheipu Üpa hüyange üshei meitampupa Kahwang te minyong phatüoh;

⁴toman-e yoi nying nyingke Kahwang mepu hanghe mong toloimeipu tüo, tüopa mong toloimeipu shange pongpu me aoyin ngoh, toman-e iman toloimei tamlak jingne Iye toman shange pongpu üshei me toman toloimeiye tam.

⁵Hangjingne Khrista shaoshipu toman tangte hangke pükke pei, hükemuh Khrista kaiye toman toloimeitampu wangman-e püknang.

⁶Toman shangma-a, tüopa-a numan mong toloimeilak jingne hüyange yinyelak jingne ngohnang; yejema-a toman mongtoloimeima-a, tüopa-a numan toloimeilak jingne ngohnang; toman-e nünpu shangshih ja muh numan-e nün oktüoh, tüopa toloimeitam puwe numante lingnang.

⁷Hüyange hangke numan shangshih me-o pükke ngoh, hükemuh mongtoloimeipu me-o numan omnang she toman-e shingpu jingne toman monghümpu numan jingne mongjüonge ngohnang.

⁸Hangjingne, jeiheinaolan, Asia me tomante hanghe shangpu ngai, tüopa jeng numante shingne yetampe ye anghu; tüome toman wonge ye-om okpe, jamloi jeiye shangne tampu jingne toman üyin-o monghümpu yenangpe ngoh.

⁹Hangjingne, toman-e yoite üting yelaklak, hüpoi lipalan yange yenetampu Kahwangte monghümlak jingne toman yoite lipu ngoilak she teih.

¹⁰Hüpoi Iye toman tüopa lipu üyong mepu yin, hüyange yinlak; hüyange Iye toman üne-o yinlak she toman-e Ite monghüm nang.

¹¹Kahta maawe yoppuwe tomante moiman phapuwe, maapuwe toman jingne Kahwang min yonglak jingne numane-o yoppu me tomante jamlak yang.

¹²Hangjingne iymei juteih me yeje, hüpoi Kahwang shüpshe me hüyange Kahwang üjaopa hüyange ütingpawe toman-e kahtoknyu me jon, hüyange hüke numan shongme ünyei ne jon. Tüopa-a toman yongelüopu, hüyange toman kenmong saki ngohnang.

¹³Hangjingne numan-e ipu oklak hüyange üne-o shinge oklak she teihpu tokte toman-e numante hango yenyan; hüyange numan-e ükümte ngoi she shinge yahlak she taowe monghümnang;

¹⁴hangjingne hangke teman Youngwanpa Jesu nyih me numan toman jingne otalak ngohnang, hatüoke toman numan jingne otapu ngohnang she shinge, numan-e tammeshonge toman shingteki.

¹⁵Hüyange taowe tüopate ütinglakke numan-e nishepupa mongmei tüolak jingne, numan tangte üwangne tao peilak she mongyangki.

¹⁶Hüyange numan kaiye Macedonia te taiye, üne-o Macedonia mepu numan tangte nishe peiye, numan-e tao Judea kahtokte taipu lamme lünge tamlak she taowe mongyangki.

¹⁷Tüokhei aope taowe tüopa mongesho, taowe juteih leijeipu she hüonangkü a? Yejema-a taowe jenang yejema-a yeje she ilak taowe hanghe mongyangki tüopa iy hei mei juteih me mongpu a?

¹⁸Kahwang hangke ngaoting iye ngohnang, hüke toman ngao numan tangte je nang hüyange yeje she yejeshihpu.

¹⁹Hangjingne Kahwang Üha Jesu Khrista, ao toman-e, hüke tao hei Silvanus hüyange Timothy numan yo me konnyüo, tüopa jenang hüyange yeje she yeje, hüpoi I me jinte “jenang” she ngohnang.

²⁰Hangjingne Kahwange janpulan hangshin ngohlakei üsheiye Khrista me jenang she ngoh nang. Tüokhei sha-a Kahwang müktishiwa jingne toman-e Khrista kaiye Amen she inang.

²¹Hüpoi aowe toman numan phei Khrista me mongne tamnang hüyange temante minnga phowe tam, I Kahwang ngohnang;

²²Iye temante füosange tüppe tam, hüyange teman mongjang me saki ne Yaha pha.

²³Korinthte üne-o yepeipu kaiye taowe numan tünne angyangki, hüpoi taowe ü-phei tüi-e sakine menglak jingne Kahwangte nyiknang.

²⁴Toman numan ütinglakpu tangme nokpu ne yeje, hüpoi toman numan mongmei jingne teijampalan ngohnang; hangjingne ütinglakpuwe numan-e mongjüonge yongnang.