Read Konyak Naga 2 KORINTH 10 Bible Online

2 KORINTH 10 - Konyak Naga bible

2 KORINTH 10

¹Tao, Paul, ao numan shongme numan yo me innenyaiye ngohnang, hüpoi yenangwante numan yete wongshenang, numante Khrista innenyaipu hüyange nyoingoh ümei phei yoppe tongnang:

²Toman-e mei jingne kemnang she aoyinne teih iman shaome tao wongnanglak she teih-e ngohnang, hüpoi aope tao omlakei, tüopa wongnangpu hüone yetamlak jingne taowe numante tongnang.

³Hangjingne hüke toman kahtoknyu me ngohpoi toman-e kahtoknyu wehok kiyange yekem.

⁴Hangjingne toman yonglah-a kahtoknyu ngouyang ne yeje, hüpoi wong shenangpupa doyujing menge oklak Kahwang ünganwong phei ngohnang.

⁵Kahwang shingemanpu phei tokteiye, otapuphei tienne ngaipu lili toman-e shuiye yetamnang; hüyange juteih lili Khrista shongte nyailak jingne phowe woipeinang;

⁶hüyange aope numan ngaojaipu ngaitamlakei, ngao yejaipu üshei phuh hahlak jingne toman tüm-e ngohnang.

⁷Numan sheshaome hanghe ngoh tüopa numan-e leinang. Ütam-e yoi nying nyingke Khrista jing she ütinglakma-a, I hangke Khrista jingne meng, toman-o Khrista jing ngohnang she yoi nying nyingke nishe teihtüoyah.

⁸Hangjingne numan mengewinlak ne yeje, hüpoi numan linge yene Youngwanpawe tomante hanghe wong pha, tüopa jingne tao üjingha nateang daowe teihyapoi, tao wüotüone yetamlak.

⁹Taowe numan ü-nyanpulaiye nyamne tamphalak she tahteih.

¹⁰Hangjingne, “Iye nyanpulai yeonge yih, hüyange wongnang hüpoi I püm ompu wong yenang, hüyange Iye ngaopu ngaome yeyahlak ngohnang, she iman-e inang.”

¹¹Hükihpu kahtawe toman yenangwante nyanpulai me hanghe ngao nyanne ngoh, hüke toman om wante lingpu toime-o ngohnang she teihtüoh.

¹²Hüpoi yoi minyongpu ütamphei yoi nying nyingke omlak hüyange phinne nyaolak toman wong nangpu yeje. Hüpoi iman-e, iman hei iman pa me langman-e, hüyange iman hei iman pa me teiphinne, hango yeshing ok.

¹³Hüpoi toman-e toman itteshem yangpu tokte o yetalak, hüpoi tüopa itte shemyangpu mongme, hangke Kahwange tomante tam-e pha, hüyange tüopa numante-o ngoinang.

¹⁴Hangjingne toman-e numan yengoipuke toman-e yoi itteshempu tokte kaiye yoi nying nyingke laolingne yetam, hangjingne toman-e Khrista pungao ümei me numan ngoiye pei.

¹⁵Tüokhei Kahwange toman jingne itteshemyangpu tokte eihawe lingpu toite toman o yeta. Numan ütinglakpu jonglak toman monghüm nang. Hüyange Kahwange itteshemyangpu me jinte numan yo me toman-e sheyongpu toi lingpu oklak.

¹⁶Tüophei me numan kaiye ülao kahmükte pungao ümei konnyüolak hüyange ülao kahta ja me lingyangpu toi jingne yongelüopu yengohlak.

¹⁷“Aowe yongelüolakei Iye Youngwanpa me yongelüo tüoh.”

¹⁸Hangjingne aowe yoi nying nyingke meinang she yihlakei I wangngoipu yeje, hüpoi Kahwange ao te meinangki she yihlakei I wangngoipu.