Read Konyak Naga 2 KORINTH 11 Bible Online

2 KORINTH 11 - Konyak Naga bible

2 KORINTH 11

¹Tao üjingha pomyapoi numan-e nün oklak she taowe mongnang! Hüpoi ütingme numan-e nünnangki.

²Hangjingne Kahwange hangke müktak hüke numan jingne taowe müktak nangki; hangjingne taowe numan jaoshe-ihpu naoyhake netanpa jate, hüke Khristate phalak jingne janyangki.

³Hüpoi hangke, puwe I konne Eve lowetam, hüke numan Khrista yeme ütingpa me ngohpu hüyange jaoweshapu mepu numan mong lowe teihphama she tao nyamnang.

⁴Hangjingne toman-e yenyüopu ülao Jesu numante ütam peiyange konnyüoma-a, yejema-a, numan-e yeyahpu yaha ülaoja mepu numan-e yahma-a, yejema-a numan-e yeyahpu ülao pungao ümei ja mepu numan-e yahma-a, numan-e tüopate wangmanne tümyange phapu ne mengnang.

⁵Hangjingne “ütahpa lampulan” phei tao hanghe lamme-o üjoipa she yeteih!

⁶Taowe wongnange yengao okyapoi, shingemanpu taowe yenyüope yenang; tüopa-a toman-e üshei me hüyange lampong lilime numan tangte ütahte ngaiye nyüo.

⁷Numan yonge tamlak jingne taowe yoi nying nyingke üjoine menge, Kahwang pungao ümei jajang jawe numante nyüopuwe taowe ünu ompu a?

⁸Numan shaoshanlak jingne taowe ülao bumeinoklan mepu ümee yah, ine ima-a numante jamlak jingne taowe iman mepu nyeleih nang.

⁹Hüyange taowe numan phei ngohwante toinan-e ngoh, hüpoi aote-o hangki yih ne yetam; hangjingne aope jeiheinaolan Macedonia mepu pei, iman-e ü-wongpong pha. Hüyange üshei me numante hangki yih kine tampu mepu taowe ü-nying nyingke tük, hüyange hüke tüklak.

¹⁰Khrista ütingpa üme ngohtepuwe, Akhaia kahtok neikon pume tao yongelüopu aowe-o lakne yetamlak.

¹¹Hangne? Taowe numante yekenpu ne hei? Kahwange shingnang.

¹²Ülao lampulan yongelüopu mepu hüyange toman-e hanghe ling, jakih-e iman-e lingnang she ipu mepu tüklak jingne, taowe hanghe lingnang, taowe yelakpe linglak.

¹³Hangjingne tüokihpu kahtalan yoi nying nyingke Khrista lepume leijeiye, ngaoleih lampulan, lowelam-e lingpalan ngohnang.

¹⁴Hüyange tüopa-a yashanlak yenang, hangjingne satanne nehoi yoi nying nyingke wangngai wangdang shongmokpake leijeipu oknang.

¹⁵Tüokhei satan shaoshanpalanne-o yoi nying nyingke khakshupu shaoshanpalan ke leijeipu okma-a, tüopa üyong yeje. Iman üküm iman toishao shange ngohlak.

¹⁶Taowe nishe inang, tao üngapa she aowe-o tahteih. Hüpoi numan-e hüke teihyapoi tüoyangpoi tao-o üjingha yongelüolak jingne, tao üngapake yahtüoh.

¹⁷Taowe hanghe inang, Youngwanpa mepu ipu ne yeje, hüpoi tüopa wongnange yongelüopu me üngapake taowe inang.

¹⁸Hüpoi maapuwe kahta wanglam me yongelüotepuwe tao-o yonglüonang.

¹⁹Hangjingne numan kentamongtingpu ne menge, numan-e mongmeisheiye üngapa kahta te nün oknang!

²⁰Hangjingne kahtawe numan rha ne mengtamma-a, Iye numan mahtamma-a, Iye numan küppe angma-a, Iye yoi nying nyingke yongma-a, Iye numan shetate heapma-a, tüo numan-e nün oknang.

²¹Toman wong yenangpe ngohpu kih-e taowe üjoipa ne menge inang. Hüpoi hanghe me kahta aowe wongnang, üngapawe taowe tüopa inang, tao-o wongnang nang.

²²Iman Hebrewlan a? Tao-o ya. Iman Israellan a? Tao-o iman ya. Iman Abraham üli a? Tao-o ya.

²³Iman Khrista shaoshanpalan a? Taowe üngapake ngaonang üme shenyei; towe nyaipu me ünyei, küpnok me ünyei, shetpu jamloipu jingne hipak pheme pali she.

²⁴Jehudilan yakme nga me taowe deli ne ja yengoipe shetpu tüo.

²⁵Lüm me üte hantiye shet, ja me longe shüp, lümme tao yenglin mengpu me ngoh, nyihja phaja tao yengchingme ngoh;

²⁶nangjange yinte kempu me, yengyin wengtuh me, lüppeleipalan wengtuh me, yinhulan wengtuh me, chingnyu wengtuh me, phao wengtuh me, yengching wengtuh me, ngaoleih jeiheinaolan wengtuh me,

²⁷towe nyaipu hei shangpu me pha-yange wangngaipu me, seanyao hüyange yenglepu me, nyaowelepu hipak pheme, wangshümpu hei pümkeng me.

²⁸Taowe ye-ipu shange pongpulan ye-i-pe, bumeinok üshei jingne mongshangpu, tüowe üte nyihjeih she kangpu ngohnang.

²⁹Ao wong yenang, tao-o wong yenangpu yeje a? Ao yeine tam, tao wo ye-ompu a?

³⁰Tao yongelüolak wongpongne mengma-a, taowe ü-ye-ok yeshangpu jeng yongelüolak.

³¹Taowe ngaoleih yengao she, jinte moimanpupa Youngwanpa Jesu Üpa Kahwange shingnang.

³²Damascus me Ahngpa Aretas phangme ngohpu Governorwe tao pholak jingne Damascuslan chingnyu yom,

³³hüpoi tawo kaiye tao muhto me longpe kaiye kaine tamme, I yak mepu yin.