Read Konyak Naga 2 KORINTH 12 Bible Online

2 KORINTH 12 - Konyak Naga bible

2 KORINTH 12

¹Tao yongelüolak wongpong ne ngohnang, hüpoi tüopa me küw yenang. Tüoyangpoi taowe himang hüyange Youngwanpawe ütahte ngaipu jeng iküning.

²Taowe Khrista me kahta ja shing, sha-a wangpeng penmepeli linteki, (pümme heiya, pümme yejepeih, taowe yeshing, Kahwange shing) tüopa kahta lümshepupa wangdang ngoiye phowe in.

³Hüyange taowe tüopa kahta pümme heiya, pümme yejepeih, taowe yeshing, Kahwange shing chingmei nyoite shui inpu taowe shing;

⁴hüyange kahtawe yengao oklak ngao hanghe kahtawe ngaolak shupune yeje, tüopa Iye jai.

⁵Tüopa kahta minme tao yongelüonang, hüpoi taowe yoijingne tao ye-ok yeshangpu tokte kaiye yongelüopu minyah.

⁶Hangjingne tao yongelüo huma-a, tao pompane yemenglak, hangjingne taowe ütingpa me ngaolak. Hüpoi kahta ütam-e üjeng ngepu hei ü-mepu jaipu phei tao shemeipu she teih-e ngohlak yang she taowe ü-nying nyingke tüknang.

⁷Hüyange ütahtengaipulan meiyange yongpu nanjingne, tao wangmanne yeyonglak jingne, üte meime ühuh ja pha; tao wangmanne yeyonglak jingne, üte shetlak jingne satan mepu shongmokpa ja üte pha.

⁸Tüopa ü-mepu yanne tailak nanjingne taowe Youngwanpa te lümshe yoppetong.

⁹Hüpoi Iye üte iyangki, “Ü shüpshe nangjingne wangpu, hangjingne ü-üngan ye-ok-yeshang pute wangngoi tamnang.” Tüokhei Khrista ünganwong üme ngohlak jingne tao yeonge mongmei sheiye ü-ye-okyeshangpu me-o yongning.

¹⁰Tüokhei Khrista jingne ye-ok-yeshang wante, phoiyetampu me shange wongpong ne mengpu me, shangne tamwante, shaoshiwante, tao mongmei nang; hangjingne aope tao wong yenang hüwante tao wong nang nang.

¹¹Tao üngapa ne mengteki; numan-e tao hüke mengne tam. Hangjingne tao numan kaiye minyonghah shepu ne ngoh. Hangjingne tao hangne-o yemengyapoi, tao tüolan ütahpa lampulan phei hangheme-o sheshoipune yemeng.

¹²Ütingpa füo hüyange wongnangpu toishao kaiye lampu sakilan numan yo me nün-okpu phei üshei me linge ngoh.

¹³Hangjingne numante taowe ü-nying nyingke hangkiyih kine yetam, tüopa tokte kaiye ülao bumeinoklan phei numan hanghe me shoipu? Tüopa ümeng üte winpha!

¹⁴Leiyah, sha-a lümshepupa tao numan tangte peilak tümme ngohnang, hüyange taowe numante hangkiyih kine yetamlak. Hangjingne taowe numan moth yeyam, hüpoi numan yamnang. Hangjingne hayimlanne nyupalan jingne yeje, hüpoi nyupalan-e hayimlan jingne shakke shinlak wongpong.

¹⁵Hüyange taowe numan yaha jingne yeonge mongmeiye winlak, hüyange ü-nying nyingke winnetamlak. Taowe numante ünyei kenma-a, üte yewangpe kennang kü a?

¹⁶Hüpoi hüke ja-nang tüoh, numante taowe ü-nying nyingke hangki yekitam; hüpoi tao lüppeshakke numan-e tünpu me pho.

¹⁷Taowe numan tangte shonpu ütam-e numan mepu ümee yahnangkü a?

¹⁸Taowe Titaste kang, hüyange I phei jeiheinao shon. Titaswe numan mepu yamee yahpu a? Teman yaha ja me yekem a? Toman yafün ja me yekem a?

¹⁹Toman-e numan mepu ümeng winlak yunang she numan-e hipak teshinne teihnangkü a? Kahwang shongme Khrista me toman-e ngaonangki. Hüyange kenpu jeiheinaolan, numan me yafün linglak jingne üshei ngohnang.

²⁰Hangjingne aope tao peilakeih, numan tao ngehupuke yejepe taowe numan ngelak she, hüyange taowe-o numan-e ngehupuke yejepe ngelak she, ngao moppu, aohüngpu, mongshih ngaipu, bumeinok tampu, lowe we ne teimengpu, ngu-ngaopu, otapu teelapu ngohkülak she taowe nyamnang.

²¹Hüyange aope tao nishe peilakeih, Ü Kahwang taowe numan tangme mongne tamlak, hüyange aoyinne üshongpe ünu jon, hüpoi iman-e jonpu yejaopu, hüyange nuweshakpu hüyange iymei lahnyikpu jingne iman-e monglüp, tüopa kihpu kahta maapu jingne tao mongshanglak she nyamnang.