Read Konyak Naga 2 KORINTH 13 Bible Online

2 KORINTH 13 - Konyak Naga bible

2 KORINTH 13

¹Tüopawe lümshepupa tao numan tangte peinang. Saki ni hei lüm ju kaiye ngao khongkümpu khakshuwe tümlak.

²Üshongwante ünu ompalan hei ülaolan üsheite taowe üwangne ngao phayangki, hüyange tao nishe om wante ipuke, sha-a man omwante muh inang, tao nishe peima-a, taowe yeshüpshelak;

³hangjingne numan-e üte ngaopu Khrista jeng saki yamnang. Khrista numan yekaome wong yenangpe yeje, hüpoi numante I wongshenang.

⁴Hangjingne wong yenangpu kaiye I tangpem me epyapoi, tüoyangpoi Kahwang ünganwong kaiye I üyin ngohnang. Hangjingne toman-o Ite wongyenang, hüpoi numan yekaome Kahwang ünganwong kaiye toman I phei üyin ngohlak.

⁵Numan ütinglakpu me tükke ngohyashi she, numan nying nyingke tokkeleihu. Yejema-a Jesu Khrista numan me ngohnang she, numan-e numan nying nyingke yeshing a? Tüone yejema-a, numan ütingme yetingpulan ngohnang.

⁶Hüpoi toman tinge ngohnang she numan-e shinglak, tüopa taowe monghüm nang.

⁷Sha-a numan-e ümeng hango yejonlak jingne, hüyange numan tinge tampuke ngailak jingne yeje, hüpoi toman yetingpu ngaiyapoi, numan-e ümei jonne oklak nanjingne, toman-e Kahwangte yopnang.

⁸Hangjingne toman-e ngaotingpa phei tüi-e hango yeling ok, hüpoi ngaotingpa jingne hei lingnang.

⁹Hangjingne aope toman wong yenang lakei, hüpoi numan wongnang, hüwante toman-e mongmei nang. Hüyange numan wangngoilak jingne toman-e yopnang.

¹⁰Tüojingne menge tamlak jingne yeje linge yelak Youngwanpawe üte hanghe wong pha, tüopa wongphei shuwe, taowe kaiye menge yejonlak jingne, manngoipe tüolan nyan nang.

¹¹Ükümne, jeiheinaolan, Salam yao! Wange ngoipu ngohyah, chingmei me ngohyah, kenmong ja ne ngohyah, shüppe jemme ngohyah. Hüyange kenpu hei chingmei Kahwang numan phei ngohlak.

¹²Üjao om teihüppu kaiye salam teipha yah.

¹³Üjaolan üsheiye numante salam shonnang.

¹⁴Youngwanpa Jesu Khrista shüpshe, hüyange Kahwang kenpu, hüyange Yaha Üjao ompu numan üshei phei ngohtüoh.