Read Konyak Naga 2 KORINTH 3 Bible Online

2 KORINTH 3 - Konyak Naga bible

2 KORINTH 3

¹Toman-e yoi min yonglak nishe wangpu a? Yejema-a toman-e kahta ütam kih-e numan tangte jeyah, numan mepune jeyah, minyonglak nyanpulai wongpong ne jepu a?

²Toman mongjang me nyanyange, kahta üsheiye shing hüyange ipu, toman nyanpulai-a numan ngohnang.

³Tüopa nyanpulai laitiye yenyan, hüpoi üyin Kahwang Yahawe nyan; longsheng me yeje, hüpoi kahta mongjang me nyanpu, numan toman-e nyanpu Khrista nyanpulai she ütahte ngaiye ngohnang.

⁴Khrista kaiye Kahwang yete tüopa monghümpu toman ngohnang.

⁵Toman-e yoiyoi me wangpu kaiye ülamja ngohnang she yeteih, hüpoi toman wangpuwa Kahwang mepu ngohnang.

⁶Iye üla Jiengjeppu wangpalanne menglak toman wangngoitam; tüopa-a nyanpu ngaokeng yeje, hüpoi Yaha jiengjeppu. Hangjingne nyanpu ngaokenge li ne tamnang, hüpoi Yahawe üyin phanang.

⁷Hüpoi lipu wanglam lampu, hanghe longme takke nyan, tüopa müktishiwa phei ngaima-a, hüyange tüowe Mosa sheta müktishiwa hanghe kaiye ngoh, tüopa jingne Israel hayimlanne I shetate tingkhakke yelei okma-a,

⁸hüwante Yahawe wanglam lampu müktishiwa me hangke jam ünyei yengailak?

⁹Hangjingne yeiyangpu wanglam lampa müktishiwa ngohma-a, khakshupupa wanglam lampa müktishiwa ünyei hangshin ngohlak.

¹⁰Hangjingne tüopa müktishiwa üyongpa phei phinma-a, yeine tampu wanglamlampa müktishiwa yenanglak.

¹¹Hangjingne meikhan meiye taipume müktishiwa ngohma-a, hümma-a loongkhan loonge taipupa me jamloi müktishiwapu ngohnang.

¹²Tüokhei hüke monghümpu ngohpu jingne, toman-e yeonge wongnangpu ngao ngaonang,

¹³hüyange Israel hayimlanne linne taipu ükümpa müktishiwa te tinge leine yetamlak jingne, hangke Mosawe yoi sheta shanglümkhek-e büang, toman hüke yeje.

¹⁴Hüpoi iman kenmong wanne tam, hangjingne Khrista me hanghe shanglümpu yahtei tüopa imante ütahte manngai puwe, ülang jiengjeppu iwante, tenyih ngoiye tüopa shanglümkhek yahyeteipe ngohnang.

¹⁵Hüpoi tüopa nyih ngoiye aope Mosa lai ilakei iman kenmong me shanglümkhekye büangnang;

¹⁶hüpoi aope kahta jawe Youngwanpa tangte lüplakei shanglümkhek-a yahtei nang.

¹⁷“Youngwanpa” Yaha ngohnang, hüyange hangheme Youngwanpa Yaha ngohnang, tüome bumei ngohnang.

¹⁸Hüpoi teman üshei sheta yelümpukhei, Youngwanpa müktishiwa she-nge me ngepuke ngeye, müktishiwa mepu müktishiwa tangte Youngwanpa Yaha mepu ke, I lepu me leijeine tamnang.