Read Konyak Naga 2 KORINTH 4 Bible Online

2 KORINTH 4 - Konyak Naga bible

2 KORINTH 4

¹Tüokhei toman-e shüpshe tüopu phei phinne tüopa shaoshanlak toishao ngohtepuwe, toman-e lah yenyikpe yengoh.

²Hüpoi toman-e wüolak lowe angpu yejanpe winnang, lowelampu me yekem, yejema-a Kahwang ngao lowe yejon; hüpoi toman-e ütingpa ütahte ngaiye kahta üshei kenmong me Kahwang sheshao me toman nying nyingke ngaoting inang she hüonang.

³Hüpoi toman pungao ümei jüowe ngohyapoi; tüopa-a mahpu kahta lante hei jüonang.

⁴Kahwang lepu me ngohpu Khrista müktishiwa jeng pungao ümei wangngai ye-ngetamlak jingne tüopa jin Kahwange yemengpalan kenmong mük pomne tam.

⁵Hangjingne toman-e yoi jeng yeje, hüpoi Khrista Jesuwa Youngwanpa ngohnang she konnyüonang, hüyange Jesu toman nying nyingke numan shaoshanpa ngohnang she wünne tamnang.

⁶Hangjingne, “Wangnyak mepu wangngai teelak,” she Kahwange i, tüopa Kahwange Khrista sheta me Kahwang müktishiwa shinge manpu wangngai phalak jingne toman mongjang me tee ne tam.

⁷Hüpoi ngaiye ngohpu ünganwong üyongpa-a toman mepu yeje hüpoi Kahwang mepu she hüolak jingne, toman-e tüopa shengngin kümptük me ngohnang.

⁸Üshei yeme tomante shüm, hüpoi yengüt tam; mongtoi taine tam, hüpoi mong yehümlakne jange yetei.

⁹Wepalan üngang ngohyapoi, shümpalan yenangpe toman yengoh; shangne tamyapoi, yewin tüohpe; toiyeta-e shetyapoi, yemahpe;

¹⁰Jesu üyin-o toman pümme ütahte ngai oklak jingne Jesu lipu jinte toman me woiye kemnang.

¹¹Hangjingne Jesu üyin toman lilak meime ütahte ngai oklak jingne, toman aoyin üyin ngoh, Jesu jingne lipupate jinte phünne phawe ngohnang.

¹²Tüokhei lipupawe tomante toilingnang, hüpoi numante üyin ne toi lingnang.

¹³Hüpoi nyanne ngohpuke, “Taowe meng, tüokhei taowe ngaonang;” mengpu yaha jawe toman-e mengnang, tüokhei toman-e ngaonang.

¹⁴Hüyange aowe Youngwanpa Jesu yange tam Iye toman-o Jesu phei yange yene tamlak hüyange I tangme toman numan phei omme tamlak she tüopa toman-e shing.

¹⁵Hangjingne shüpshe-a maapu kaiye jaalunne, Kahwang müktishiwa tangte minyongpu ünyei ngaitamne, üshei numan jingne ngohnang.

¹⁶Tüokhei toman mongjang khaiye yeta, hüpoi toman ütok me ngohpu wanglam menge taiyapoi, toman ümongye wanglam nyihjeih üla ne menge ngohnang.

¹⁷Hangjingne toman shangpu tantampuwa hanghepa üjinghapu jingne hei ngoh, tüopa toman jingne ünyei ünyei shakke, jinte üküm yenangpu müktishiwa shejeipu tümnang.

¹⁸Hüyange toman mükke ngepu toite yelei, hüpoi ye-ngepu toishaote leinang; hangjingne mükke ngepu toi ütenjapu jingne hei ngohnang, hüpoi ye-ngepu toishao jinte üküm yenangpe ngohnang.