Read Konyak Naga 2 KORINTH 5 Bible Online

2 KORINTH 5 - Konyak Naga bible

2 KORINTH 5

¹Sha-a toman ngohpu kahtoknyu nyenok mengma-a, Kahwang mepu, yakke yelingpu, toman jinte üküm yenangpu wangdang me ngohpu nokja ngohnang, she toman-e shing;

²hangjingne tomante wangdang mepu peipu nyenok inkhekke inne tamlak she toman-e yeonge yoonge tannang;

³hüyange tüopa tomante inne tamküma-a toman pümkeng me ye-ngelak.

⁴Hangjingne toman aoyin tüopa nyenok me ngoh hangki yih ne menge tannang; toman-e nye khokke winyange ngohhupu yeje, hüpoi li ne ngohpuwa üyin ne lünge tailak jingne tomante inne tamhunangki.

⁵Üne-o aowe tüopa jingne toman ling, aowe tomante üwangpa phapu saki ne menglak jingne Yaha pha, I-a Kahwang.

⁶Tüokhei toman jinte yeonge meiye wongnange ngohnang, hüyange toman tüopa püm nok me ngohpu mongme Youngwanpa mepu yanne ngohnang she toman-e shing.

⁷Toman-e mükke ngepuwe yeje, ütinglakpuwe kemnang.

⁸Toman hengpu ümei phei ngohnang she taowe inang, hüyange püm mepu yanne Youngwanpa phei noksa ja me ngohküme meilak she teihnang.

⁹Tüokhei toman nokme ngohyah, yengohyah, I monghah tamlak müktakpe ngohnang.

¹⁰Hangjingne kahta lili püm me lingpu toishao phei phinne, ümei jeyah, ümeng jeyah tüolak jingne toman üshei Khrista ngaophün jing shongme ütahte ngaitamlak yang.

¹¹Hangjingne Youngwanpa nyamlak toman-e shingpuwe toman-e kahtalan yohlak jingne ngang, hüpoi Kahwang shongme toman ütahte ngaiye ngohnang, hüyange numan kenmong me toman ütahte ngaiye tamme ngohnang she taowe monghüm nang.

¹²Toman-e nishe numan shongme yoi min yeyong; hüleima toman min me numan yongelüolak hipak ümei toman-e numante phanang, tüome nakshih aoyin mongjang me yeje hüpoi mükke ngelak jingne yongelüonang, tüolan shaome numan-e janpu oklak.

¹³Hangjingne toman jingne yejema-a tüopa-a Kahwang jing; hüyange kenmong khakshuwe ngohma-a tüopa-a numan jingne.

¹⁴Hangjingne Khrista yayenge toman te kangnang, hangjingne üshei jingne ja li, tüokhei üshei li she toman-e teih ok.

¹⁵Aoyin üyin ngoh iman yoi jingne shaha üyin yengohpe hüpoi ao iman jingne li hüyange nishe yange ye, I jingne iman üyin ngohlak yang, tüojingne I üshei jingne li.

¹⁶Sha-a me peiye, toman-e iy hei mei yeme ao-o yeteih; toman-e hipak ja me iy hei mei yeme Khrista teihyapoi, shaaji toman-e I hüke yeteih.

¹⁷Tüokhei kahta ütam Khrista me ngohma-a, I üla ne mengpu. Ülangpa linteki; leitüoh üshei üla ne mengteki.

¹⁸Hüyange Kahwang, aowe yoi nying nyingke toman Khrista kaiye mongkenhahjieng tam, I mepu üshei ngohnang. Hüyange I mongkenhahjiengpu konnyüolak toi tomante pha.

¹⁹Hüke, kahtanyuhate iman-e ümeng jonpu iye yeleipe yoi nying nyingke mongkenhahjiengpu Kahwang Khrista me ngoh, hüyange mongkenhahjieng tampu ngao konnyüolak tomante pha.

²⁰Tüokhei Kahwange toman kaiye numante tongpu khei, Khrista jingne toman lampu üjeng ngohnang. Toman-e Khrista minme numan Kahwang phei mongkenhahjieng yange ngohtüoh she yoppe tongnang.

²¹Khrista me, toman Kahwang khakshupupa ne menglak jingne, aowe ünu yeshing I teman jingne Iye ünu me lingne tam.