Read Konyak Naga 2 KORINTH 6 Bible Online

2 KORINTH 6 - Konyak Naga bible

2 KORINTH 6

¹Kahwangpa phei jamme toilingpalan ne menge, toman-e numante Kahwang shüpshe jajang jawe tahyah she yoppe tongnang.

²Hangjingne Iye inang: “Yahhukeipu hipak me taowe nangte jai, hüyange yinyelakpa nyih me taowe nangte jam.” Leiyah, sha-a yahhukeipu hipak; leiyah, sha-a yinyelakpa nyih!

³Toman-e jampu toi ümengne yemenglak jingne toman-e hanghe me-o yashah hüone yetam;

⁴hüpoi Kahwang shaoshanpake toman-e üshei me yoi nying nyingke wangngoipu ngohnang she hüonang; yepope nünpu me, shaoshi me, wongpong hipak me, shangwante,

⁵shütwante, küpnok me angwante, moppu me, wanpu toishao phei, yeshipe, nyaowelepu me;

⁶jaoshapu me, shinge manpu me, laolü-ünge nün okpu me, yayeng shüpshe me, Yaha Üjao me, ütingpa kenpu me,

⁷ngaotingpa ngao me hüyange Kahwang ngao me, yakjah yaknya yeme khakshupu ngouyang phei;

⁸iyeshepu hüyange ye-i-yeshepe, taklak ngao hei yetaklak ngao ngaowe tam. Toman lowetampalanke, hüpoi ngaoting iye;

⁹toman aowe-o yeshingpuke, hüpoi yeonge meiye shinge; litepu ja leye, hüpoi leiyah, toman üyin ngohnang; shangnepa-a tampuke, hüpoi toman yetoi;

¹⁰mongmengpalan ke, hüpoi jinte mong onge; toihake hüpoi kahta maawe hakpane mengtam-e; hango yenangpuke, hüpoi lampheli wangman-e ngoh nang.

¹¹Korinthlan, toman-e numante ngaiye ngaonang, toman mongjang lanta-akke eppe ngohnang.

¹²Toman-e numante büangpu yenang, hüpoi numan-e numan nying nyingke toman mepu büangnang.

¹³Sha-a, numan ü-halanke teihyange ngaonang, numane-o tüopa shümme ye-e mongjang lanta-akke hüotüoh.

¹⁴Yemengpalan phei jamme shayange peitüp jamme tahpai. Hangjingne ümenglan phei khakshupulan ümeken me shüppe jemlak? Hüyange wangnyak phei wangngai ümeken me shüppe jemlak?

¹⁵Hüyange Belial (angsa) phei Khrista hanghe shüppeshapu ngohnang shi? Yejema-a yemengpalan phei mengpalan hanghe meitam ngohnang shi?

¹⁶Hüyange moung phei Kahwang khümjing hanghe me teilepu? Hangjingne teman-a üyin Kahwang khümjing, Kahwange ipuke, “Tao iman yo me ngohlak hüyange iman yo me kemlak, hüyange tao iman Kahwang ne ngohlak hüyange iman ü-kahta ne menglak.

¹⁷Tüokhei iman yo mepu ngaiye, yoiyoi ne ngohyah she, Youngwanpawe inang; hüyange yejaopu hangte-o tahjon; hüyange taowe numan yahlak;

¹⁸hüyange tao numan Üpa ne menglak, hüyange numan ü-hala yhala ne menglak, she Üyongpa Kahwange inang.”