Read Konyak Naga 2 KORINTH 7 Bible Online

2 KORINTH 7 - Konyak Naga bible

2 KORINTH 7

¹Tüokhei, jeiheinaolan, tüolan janpu ngohtepuwe, teman-e Kahwangte nyampu phei üjaopa me wangngoi tamne mei hei yaha yejaopu üshei mepu teman nying nyingke jaohah.

²Tomante numan mongjang eptampha. Toman-e ao te-o yeshupu yeling, toman-e ao-o menge yetam toman-e aote-o khahkowe yejon.

³Taowe numan ümengne tüopa ngaopune yeje, hangjingne teman jamme üyin ngohlak hüyange jamme lilak ne numan toman mongjang me ngohnang she taowe üshong wante iyangki.

⁴Taowe numante yeonge monghahpu ngohnang, numan jingne tao yeonge maohepu ngohnang; toman shangpu üshei me tao mongong mongle nang. Tao toloimeipu phei maawe ngohnang.

⁵Hangjingne aope toman Macedoniate pei, toman meime toloimei yenang, hüpoi toman üshei yeme shangepong; ütok yeme teelapu, ümong yeme nyampu ngoh.

⁶Tüoyangpoi inne nyaipalante toloimeitampa Kahwange Titas peitampuwe toman toloimeitam.

⁷Hüyange I peipu jingne shaha yeje, hüpoi numan-e yoonge tanpu, hüyange numan shappu, hüyange üjingne numan lahnyikpu Iye tomante ipu jingne, hüyange numan mepu hanghepa toloimei Iye tüo, tüowe-o Kahwange toman toloimeitam; tüokhei tao ünyei ne mongmei nang.

⁸Hangjingne taowe nyanpulaiye numan mongmengne tam-e, ümongmenge ngohyapoi, tüoyangpoi, shaapa-a mong yemeng. Hangjingne tüopa nyanpulaiye ütenja hei numan mongmeng ne tam she taowe ngenang.

⁹Hüke tao mongmeinang: hüpoi numan mongmeng ne tampu jingne yeje: hüpoi mongmengpuwe numan monglüppe tamlak jingne. Hangjingne numan-e toman kaiye hanghe me-o mahpu ye-ngelak jingne Kahwange mongpuke numan mongmengne tam.

¹⁰Hangjingne Kahwange mongpuke mongmengne tampuwe, nishe mong yemenglak ne, yinyelak jingne monglüppe tamnang. Hüpoi kahtoknyu mongmengpuwe lipu ngaitam nang.

¹¹Hangjingne tüopamuh leiyah, Kahwange mongpuke numan mongmengne tampupawe numan, hangke kenting mongta ne tam, hangke numan nying nyingke tingetam, hangke mengnetam, hangke nyam ne tam, hangke yoongne tam, hangke lahnyikne tam, hangke shangne tam! Tüopa ngaome numan-e yoi nying nyingke üshei me ümeng yenangpuke hüo.

¹²Tüokhei, taowe numan tangte nyanyapoi, aowe ümeng jon I jingne yeje, yejema-a aowe ümeng toi nün I jingne yeje, hüpoi toman jingne numan-e lahnyikpu Kahwang shaome numan tangte ütahte ngaitamlak jingne taowe nyan.

¹³Tüojingne toman toloimei ne tamyangki. Hüyange toman toloimei me üne-o Titas mongmeipu jingne toman-e yeonge mongmei nang, hangjingne numan üsheiye I yaha toloimei ne tamyangki.

¹⁴Hangjingne taowe numan jeng Ite ülamja me otapu phei ngaowe ngohma-a, tao wüoyetüo tam. Hüpoi toman-e hangke numante ngao üshei ütingpa me ngao, hükemuh toman-e Titas te yonglüowe ngaopu üting she ngenang.

¹⁵Hüyange numan-e üsheiye ngao jaipu, hüyange hangke numan-e nyanpu hüyange nünpu phei I yah, tüopa Iye teihtüowante, numan jingne I yayeng ünyei jongnang.

¹⁶Taowe numan jeng yeonge monghahpu jingne, tao mongmei nang.