Read Konyak Naga 2 KORINTH 8 Bible Online

2 KORINTH 8 - Konyak Naga bible

2 KORINTH 8

¹Jeiheinaolan, toman-e numante shingne tamhu nangki; Kahwang shüpshe hanghe Macedonia bumeinok lante pha,

²hüke yeonge shange tokpume iman mongmei maawe jaalun, hüyange yeonge toinanpupawe yeonge jajang jawe phapu me iman jaalun.

³Iman wongphei shuwe, ütingme iman wongphei nehoi shenyei she iman-e iman jajangjawe dopu pha she taowe saki phanang;

⁴hüyange Judea ngohpu üjaolante jamlak toime jamkei she iman-e tomante tong.

⁵Hüyange iman-e hüke ling, toman-e teihpuke yeje, hüpoi üwangne iman-e iman nying nyingke Youngwanpate pha hüyange Kahwange mongpu kaiye tomante pha.

⁶Tüokhei toman-e Titas te Iye hanghe üwangne ükongwang, hüke numan yo me tüopa shüpshetoi lingesholak Ite henge inang.

⁷Sha-a ütinglakpu me, ngaopu me, shingeman pume, jamlak jingne mongpu üsheime, hüyange toman jingne numan kenpu me numan-e hangke üshei me jaalun, hüke tüopa shüpshe me-o jaaluntüoh.

⁸Tüopa-a taowe ngaokeng phapuke yengao, hüpoi ülaolanne hangshin mong, tüopa numan ütingpa kenpu üja she taowe hüonang.

⁹Hangjingne Youngwanpa Jesu Khrista hakpa ne ngohyapoi, tüoyangpoi I toiha ne mengpu kaiye numan hakpane mengtamlak jingne I numan jingne toiha ne meng, tüopa shüpshe numan-e shing.

¹⁰Tüopa jeng jingne hatüowa ü-juteih; numan-e muwang hanghe ükongwang sha-a numan jingne hatüo shopu meilakyang. Hangjingne, phalak shaha yeje, hüpoi linge nyaolak jingne üwangne mongpuwa numan ngohnang.

¹¹Numan-e hangke monglak jingne tümme ngoh, hüke numan wongphei shuwe toi showe ngohlak nanjingne, sha-a tüopa lingpu-o tümtüoh.

¹²Hangjingne üwangne mongonge ngohma-a, tüopa kahta nangpu phei phinne Iye hünghao Kahwang sheshao me yah oknang, yenangpu phei phinne yeje.

¹³Ülaolan toloimeilak hüyange numan shanglak jingne taowe tüopa ye i.

¹⁴Hüpoi jakikipu wanglamme sha-apu hipak me numan wangman-e ngohpu iman wongpong jingne phalak peitepuwe, iman wangman-e ngohpu numan wongpong jingne phapu ne menglak she, jakiki ngohlak jingne taowe tüolan ngao inang.

¹⁵Nyanne ngohpuke, “Aowe maawe yo ünyei yenang, hüyange aowe üjingha hei yo yewangpe yenang.”

¹⁶Hüpoi Kahwang, aowe numan jingne lahnyikpu juteih Titas mongjang me angnetam, I min yongtüoh.

¹⁷Hangjingne toman-e hengpu Iye ütingme yah, hüpoi Iye yoi nying nyingke yeonge mongonge ngohpu jingne, Iye yoi mongpu kaiye numan tangte pei.

¹⁸Hüyange toman-e I phei jamme jeiheinao ja, ao pungao ümei jingne bumeinok üsheime minngaiye inang I shonnang.

¹⁹Hüyange tüo shaha yeje, hüpoi Iya Kahwang I müktishiwa jingne hüyange toman-e tümyange ngohpu hüolak jingne; bumeinok lanne hanghe toi toman-e lingnang tüopa toishao me yinkempa jampupa ne leyangki.

²⁰Tüopa shaoshan-e lingpu toishao me aowe-o tomante ngao yengaitamlak jingne toman ngangnang;

²¹hangjingne Youngwanpa sheshao shaha me yeje, hüpoi kahta sheshao me-o hanghe shemeipupa tüopa jingne toman-e teihnang.

²²Hüyange toman jeiheinao, aote toman-e toi lili me hipak lep iye monghahpu nge, hüyange aowe sha-a numante ütinglakpu phei ünyei monghah nang, I toman-e imanphei shonnang.

²³Titas jeng ütam-e tongma-a, I ü-taopa, hüyange numan jingne I ü-phei jamme shaoshan nang; yejema-a teman jeiheinaolan jeng ütam-e tongma-a, iman bumeinoklan lampu, iman-a Khrista müktishiwa tampalan.

²⁴Tüokhei bumeinoklan shaome numan-e imante kenpu saki, hüyange toman-e numan jingne yongelüo pu saki hüotüoh.