Read Konyak Naga 2 KORINTH 9 Bible Online

2 KORINTH 9 - Konyak Naga bible

2 KORINTH 9

¹Sha-a üjaolante jampu jeng taowe numan tangte nyanlak wongpongne yeje.

²Hangjingne numan-e monge ngohpu taowe shingnang, hüyange tüopa jeng taowe numan jingne Macedonialante, Akhaialane phalak jingne tümyang phei me wangpeng ja ngoiteki she yongelüowe i; hüyange numan lahnyik puwe iman maawe hengetam.

³Hüpoi tüopa jeng toman-e numan min yongpu jajang japune yemenglak, hüyange taowe ipuke numan tümyange ngohlak jingne, taowe jeiheinaolan shonnang.

⁴Ümeihuya Macedonialan ütam ü-phei peiye numan mantümpe ngema-a, toman-e numan she, ye-ilak, tüopa ütinglakpu me wüotüo tamme ngohyalak yangshe shonnang!

⁵Tüokhei jeiheinaolan-a numan tangte üwangne peiye, numan-e üwangne janpu jampu phapu nyih manngoipe tümlak jingne, hüyange tüowa kange yeje, hüpoi jajang jawe phapuke tümyange ngohlak, taowe iman hengtamlak wongpong ngohnang she teih.

⁶Tüopa teihtüoyah: Aowe kheih-e deilakei Iye kheih-e wetlak, hüyange aowe wangman-e deilakei Iye wangman-e wetlak.

⁷Kahta liliye hangke yoi kenmong me mong, hüke phatüoh, hüpoi nüngneiye yeje, kange yeje, hangjingne Kahwange mongmei sheiye phapu kennang.

⁸Hüyange numan wongpong phei shenyei she Kahwange moiman phapu oklak; tüokaiye numan-e jinte numan wongpong numan-e tüolak hüyange toimei üshei jingne nyeiye nehoi tüolak.

⁹Nyanne ngohpuke, “Iye shaiteki, Iye toihalante phateki; I khakshupupa jinte ngohnang.”

¹⁰Hüyange aowe üli deipate üli phanang hüyange hahlak jingne an pha nang, deilak jingne Iye numante üli phawe jongne tamlak, hüyange numan khakshupu ülick ne jongtamlak.

¹¹Hüyange üshei me numan jajang jawe phapu kaiye üshei jingne hakpa ne menge tamlak, hüyange tüopa kaiye toman kaiye Kahwang min yongne tamlak.

¹²Hangjingne tüopa jampu phapuwa üjaolan wongpong ngohpu wangngoi tampu shaha ne yeje, hüpoi Kahwangte minyongpu wangman-e tamnang.

¹³Hangjingne tüopa jampu phapu me numan Khrista Pungao ümei janne ngaojaipu kaiye numan saki ngaipuwe hüyange numan-e imante hüyange mongmei me phapuwe, imante Kahwang müktishiwa nang.

¹⁴Hüyange iman-e numan jingne yoppe tonge, Kahwang shüpshe üyong numan jingne yoongnang.

¹⁵I ye-i-okpu hünghao jingne Kahwang min yongtüoh.