Read Konyak Naga GALATIA 1 Bible Online

GALATIA 1 - Konyak Naga bible

GALATIA 1

¹Paul, Lampu ja kahta mepu yeje, yejema-a kahta kaiye yeje, hüpoi Jesu Khrista hüyange Üpa Kahwang kaiye, aowe I lipu mepu yange yene tam,

²hüyange ü-phei ngohpu jeiheinaolan üsheiye, Galatia bumeinoklan tangte:

³Üpa Kahwang hüyange teman Youngwanpa Jesu Khrista mepu numan tangte shüpshe hüyange chingmei ngohtüoh.

⁴Iye teman Üpa Kahwange mongpuke tüopa sha-a ngohpu ümengpa jin mepu teman yinlak jingne teman ünu jingne yoi nying nyingke pha.

⁵Ite jinte üküm yenangpu müktishiwatüoh! Amen.

⁶Khrista aowe I shüpshe me numan nyik, I mepu ülao pungao ümei tangte numan-e yeonge mamme lüppe taipu me tao yashan nang.

⁷Tüopa-a ülao pungao ümei ngohnang ja she yeje, hüpoi numante mopne tampu kahta ütam ngohnang, hüyange iman-e Khrista pungao ümeiya leijeiye ümengne menge tamhu nang.

⁸Hüpoi toman-e numante konnyüopu pungao ümei kaiye toman-e jeyah, wangdang mepu shongmokpawe jeyah, ülao pungao ümei konnyüoma-a, Ite phoiwümpu ngohtüoh!

⁹Toman-e üwangne ipuke taowe sha-a nishe inang. Numan-e yahpu pungao ümei kaiye ülao pungao ümei kahta ütam-e konnyüoma-a, Ite phoiwümpu ngohtüoh!

¹⁰Taowe sha-a kahta monghah tamlak jingne yampu a? Yejema-a Kahwang! Yejema-a taowe kahta mongmei tamlakne ngangpu a? Taowe üne-o kahta mongmeine tamhuküma-a, tao Khrista shaoshanpa ne yemenghah shepu.

¹¹Hangjingne, jeiheinao hei nya-naolan, taowe nyüopu pungao ümei-a kahta pungao ümei ne yeje she, taowe numante shingne tamnang.

¹²Hangjingne taowe kahta mepu tüopa yetüo, yejema-a üne-o tüopa üte yenyüo, hüpoi Jesu Khrista ütahte ngaipuwe ü-tangte ngai.

¹³Hangjingne tao üshongpe Jehudilan wanglam me hangke üyin ngoh, hüyange hangke tao jamloi kaiye Kahwang bumeinokte shaoshine tamme mahne tam, tüopa numan-e jaiyangki;

¹⁴hüyange üpuyimlan ülangpa pungao wanglam jingne tao yeonge lahnyikke Jehudilan wanglam me ü-jat yo me tom ei yiman üshei shaote tao okkeshange taiyangki.

¹⁵Hüpoi aope Kahwang, aowe tao puhshao memuh yanne ang, hüyange I shüpsheye üte nyik,

¹⁶Iye yoi Ha üte ütahte ngaitamlak monghah-e ngoh, hüwante taowe I jeng pungao ümei Yinhulan yo me konnyüolak jingne, lanshe taowe iy hei mei phei yengao;

¹⁷yejema-a üne-o üshaote ngohpu lampulan tangte tao Jerusalem te ye-ong. Hüpoi tao Arabia ngoiye taimah, hüyange üne-o tao Damascuste leihye.

¹⁸Tüophei me wangpeng lüm linyang phei me Peter phei hüolak jingne tao Jerusalemte ong, hüyange nyih pen me nga tao I phei nyoi.

¹⁹Hüpoi ülao lampulan, Youngwanpa ü-nao Jeams tokte kaiye, taowe ja nehoi ye-nge.

²⁰Sha-a taowe numan tangte hanghe nyan tüolan jeng, leihuyah, Kahwang shongme taowe yeleih!

²¹Hüwante tao Syria hei Cilicia neikonpu kahtokte pei.

²²Hüyange Khrista me ngohpu Judea kahtok bumeinoklan te taowe shehüowe manshingpe ngohyangki.

²³Hüpoi, “Aowe üshongpe tomante ja me shangne tam, Iye ja me mahne tampu ütinglakpu sha-a konnyüo nangki,” she ipu hei iman-e jai.

²⁴Tüokhei üjingne iman-e Kahwangte müktishiwa.