Read Konyak Naga GALATIA 2 Bible Online

GALATIA 2 - Konyak Naga bible

GALATIA 2

¹Tüophei me wangpeng penme peli ngohyange, tao Barnabas phei Titas-o ü-phei woiyange nishe Jerusalemte ong.

²Hüyange ütahte ngaipu ngao kaiye tao ong. Hüyange tao jajang jawe phette taiteki, yejema-a phette ngohlak yangshe, taowe hanghe pungao ümei Yinhulante konnyüo tüopa taowe imante shingetam; hüpoi taowe minyongpu yahhupulan te lowe ngao.

³Hüpoi ü-phei ngohpu Titas Greek ne jeyapoi, shokhüplak jingne yekang.

⁴Tüoyangpoi toman rha ne mengtamlak jingne, Khrista Jesu me ngohpu toman bumei lowe yeitamlak ne, ngaoleih jeiheinaolan lowe woipei.

⁵Hangjingne pungao ümei ütingpa-a numan phei yelakpe ngoh oklak jingne, toman ütenja nehoi iman phangme yeyu.

⁶Hüyange ülamja minyongpu yahpalan mepu iman hanghe ngoh tüopa üjingne hangne-o yemeng. Kahwange teitamme teihpu ao te-o yehüo, tüoyin taowe inang, aoyin minyongpu yahpalan iman-e üte hango paowe yetam.

⁷Hüpoi üne-o hangke shokhüppalan jingne pungao ümei-a Peterte pha, hükemuh yekhüppulan jingne pungao ümei-a üte-o phayangki, she iman-e manshingwante,

⁸hangjingne shokhüppalan tangte lampune menglak aowe Peter nyik, Iye tao-o Yinhulan tangte lampune mengne nyik,

⁹hüyange aope iman-e üte phapuwa shing, hüwante toman-e yinhulan tangte tailak, hüyange iman-e shokhüppalan tangte tailak jingne, Jeams hei Peter hüyange John, aoyinte long shongnyulan she nyik, iman-e tao hüyange Barnabas phei shüppeshapu füo hüowe yakjahye salam yah.

¹⁰Toman-e toihalante teihtüolak wongpong she iman-e tomante yoppe tong; hüyange tüopa toimuh linglak jingne tao lahnyikke ngoh.

¹¹Hüpoi aope Peter Antiokte pei, taowe I sheshao me I phei yemongpe yong, hangjingne Ime ümeng ngoh.

¹²Hangjingne kahta ütam Jeams mepu manpeiwante, Iye yinhulan phei hah, hüpoi aope iman pei, shokhüppulan ükhongte I nyam-e leihye-e yoi yoi ne meng.

¹³Hüyange ülao Jehudilan üsheiye mong yeyongpe I phei woi; hüyange hüke iman phei Barnabas-o woitei.

¹⁴Hüpoi iman-e pungao ümei ütingpa me khakshuwe yekem she taowe aope nge, taowe üshei sheshao me Peterte i, “Nang Jehudi ne mengyange, Jehudilanke yengohpe yinhulanke ngohma-a, hümma-a yinhulante Jehudilan wanglamke ngohlak jingne nange hangke kangpu?”

¹⁵Ineshe ima-a puhnap memuh toman-a Jehudi hüyange hüke imante nyikpu kih-e “Yinhu ünulankih” yeje.

¹⁶Tüoyangpoi ngaokeng jonpuwe yeje, hüpoi Jesu Khristate mengpu kaiye kahta tingetam nang she shing, toman-e ngaokeng jonpuwe yeje, hüpoi Khrista te mengpu kaiye toman tingetamlak jingne tomane-o Khrista Jesute meng. Hangjingne ngaokeng jonpu kaiye ao-o tingne yetam oklak.

¹⁷Hüpoi Khrista me tingetamlak jingne yamwante, toman nying nyingke ünulan she ngema-a hümma-a Khrista-a ünu jingne üjüngne mengpu a? Hüke aope-o yeje!

¹⁸Hangjingne taowe hanghe mengetam tüopa taowe nishe linge yema-a, taowe ü-nying nyingke ümeng lingpupa she saki pha nang.

¹⁹Hangjingne Kahwang jingne tao üyin ngohlak jingne ngaokeng kaiye tao ngaokeng mepu yanne li.

²⁰Hangjingne Khrista phei tao tangpem me epteki, shaajehi tao üne-o üyin yenang; hüpoi üme Khrista üyin ngohnang; hüyange Kahwang Üha, aowe üte ken hüyange yoi nying nyingke ü jingne pha, Ite ütinglakpuwe tao üyin ngohnang.

²¹Taowe Kahwang shüpshe jajang japu ne yemengtam; hangjingne ngaokeng kaiye tingetam nang she ima-a, hüma-a Khrista lipuwa jajang japu ne meng!