Read Konyak Naga GALATIA 3 Bible Online

GALATIA 3 - Konyak Naga bible

GALATIA 3

¹O üngapa Galatialan, numan ao sheshao me Jesu Khrista tangpem me takpu ngaiphaih-e hüo, aowe numan ünyong yete taine tam?

²Tüopa ngao jashing numan mepu taowe shinghu nangki; Numan-e ngaokeng toishao jonpu jingne heiya, yejema-a jaiyange ütinglakpuwe Yaha yah ei?

³Numan teshinne nga ngohnang kü a? Numan yaha me shaoshanne ükong wangyange, sha-a mei me wangngoine tamnang kü a?

⁴Numan-e jajang jawe teshinne shange tampu a? Ütingme hatüo jajang jawe.

⁵Tüokhei aowe numante Yaha phanang hüyange numan yo me yashanyali toi lingnang, Iye numan-e ngaokeng toi jonpu me heiya, yejema-a jaiyange üting lakpuwe tüopa lingpu shi?

⁶Hüke, “Abraham-e Kahwangte meng, hüyange tüopa-a I jingne khakshupupa she i.”

⁷Tüokhei aoyinne ütinglak nang iman Abraham hayimlan she numan-e shingtüoh.

⁸Hüyange Kahwange Yinhulan ütinglakpu tingetamlak she ngaolaiye üshongpe ngeye, Abrahamte üwangne pungao ümei konnyüowe i, “Jat üshei nang kaiye moimanlak.”

⁹Tüokhei aoyin ütinglaknang iman Abraham phei ütinglakpu kaiye moiman nang.

¹⁰Hangjingne hangshinne ngaokeng jonpu me ngohnang iman phoiwümpu phangme ngohnang. Hangjingne tüopa nyanne ngohnang, “Hangshinne ngaokeng lai me nyanne ngohpu ngao yejaipe yejon iman phoiwümpu ngohnang.”

¹¹Sha-a ngaokenge Kahwang shongme ao-o tinge yetam she shinge ngohnang; hangjingne, “Ütinglakpuwe khakshupulan üyin ngohlak.”

¹²Hüpoi ngaokenga ütinglakpuwe yeje, hangjingne, “Aoyinne tüolan lingnang tüolan-e I üyin ngohlak.”

¹³Ngaokenge phoiwümpu mepu Khristawe teman yintam, teman jingne phoiwümtampa ne meng; hangjingne tüo nyanne ngoh nang, “Ao pee me tak Ite phoiwümyangki.”

¹⁴Tüowe Khrista Jesu me Abraham moiman Yinhulan tangte pei oklak, hüyange teman-e ütinglakpu kaiye janpu Yaha tüone oklak.

¹⁵Jeiheinaolan, taowe kahtake ngaonang; kahta nipa me jiengjeppu nehei jeyapoi, tüopa mongne tamyang pheime, aowe-o tüopa jajang japu ne menge yetam, yejema-a tüopa me ngao ünyei yehüntam.

¹⁶Sha-a Abraham hüyange I mepu ülite janpulan ngao. Hüyange “Laingaowe ülilan maawe ngohpukih-e yengao;” hüpoi ja shahake ngao, “Nang ülite,” tüopa-a Khrista ngohnang.

¹⁷Hüyange taowe tüopa inang: Kahwange jiengjeppu üshongpe mongne tamyang phei me, wangpeng gho peli phei me delüm linyang pheime peipu ngaokhüm-e tüopa yemahtam, yejema-a janyangpuwa jajang japu ne yemengtam.

¹⁸Hangjingne mothleipuwa ngaokhüm-e she ima-a, tüopa-a shaaji janpuwe yejelak, hüpoi Kahwange tüopa-a janpu kaiye Abrahamte phayangki.

¹⁹Hüma-a ngaokhüm-a hanghe? Ao ülite janpuwa ngao, I manpeipu mongme, ümeng jonpu jingne ngaokhüm-a pha, hüyange tüopa-a wangdang shongmokpalan kaiye chingmeilampu yakke tümne tam.

²⁰Tüoyangpoi, chingmei lampu-a ükhong ja shingha yeje, hüpoi Kahwang jashingha ngohnang.

²¹Hüma-a ngaokhüm-a Kahwange janpulan te yemongpu a? Hüke aope-o yeje! Hangjingne üyin ne menge tamlak ngaokhüm-e phawe ngoh shihma-a, ütingme tüopa ngaokhüm kaiye khakshupupa ne menghah shepu.

²²Hüpoi ütinglakpuwe Jesu Khrista te mengpalan üsheite janpu phalak jingne, ngaolaiye ünu phangme üshei küppe ang.

²³Hüpoi ütinglakpu manpeiwante, teman ngaokeng phangme küppe ang, hüyange hanghe ütinglakpu pheime ütahte ngaitamlak ne ngoh, tüopa jingne teman küppe ang.

²⁴Tüokhei ütinglakpuwe teman tingetamlak jingne Khrista tangte woine ngaokhüm-a teman lamwoipa ne menge ngohnang.

²⁵Hüpoi sha-a ütinglakpu peitepuwe, teman shaaji ngaokhüm-e woipu phangme yenang.

²⁶Hangjingne Khrista Jesute mengpu kaiye numan üshei Kahwang halan.

²⁷Hangjingne numan hangshin Khrista me baptiye ngoh, numan-e yoi nying nyingke Khrista o o-nang.

²⁸Tüokhei Jehudi hei Greeklan nipa me, rha hei bumei kahtalan nipa me, sheko hei netan nipa me, hanghe yoi yoi-o yenang: hangjingne numan üshei Khrista Jesu me ja shing.

²⁹Hüyange numan Khrista kahta lanne mengma-a, hümma-a numan Abraham üli, janyangpuke numan-a mothleipalan ngohnang.