Read Konyak Naga GALATIA 4 Bible Online

GALATIA 4 - Konyak Naga bible

GALATIA 4

¹Sha-a mothleipa-a moth üshei tangme I nokpu ne menglak ne ngohyapoi, naha ne ngohwante-a I rha phei hanghe yoi yoi ne-o yeje;

²hüpoi Ipawe itpu hipak manngoi manngoi naha-a yompa hüyange yakjongpa phangme ngohnang she taowe inang.

³Hüke aope teman nahane ngoh, teman-o kahtoknyu üwangpa wanglam phangme rha ja leye ngoh.

⁴Hüpoi aope wangengoipu hipak ngoi, Kahwange Iha shon. Sheko ja kaiye, ngaokhüm phangme I puh;

⁵aoyin ngaokhüm phangme ngoh tüolan yinlak jingne, tüokaiye teman Iha ne mengpu oklak jingne ütahte ngai.

⁶Hüyange numan I halanne menge, Kahwange yoi ha yaha teman mongjang te shon; hüyange tüopa yahawe, “Abba! Opa!” she üngwün nang.

⁷Tüokhei nang shaaji rha ne yeje, hüpoi ha. Hüyange nanga shaaji I ha ne mengpu jingne, Kahwange Iye yoi ha jingne angpu mothlei nangte phalak.

⁸Üshongpe aope numan-e Kahwang yeshingpe ngoh, hüwante aoyin wanglamme kahwanglanne yemeng, iman phangme numan rha ja leye ngoh;

⁹hüpoi sha-a numan-e Kahwang shinge peiteki, yejema-a hüke Kahwange numan shingtüoh, numan tüopa kahtoknyu wong yenangpu hüyange yahlakne yejepu üwangpa, wanglam, hanghe phangme numan nishe rha ne menghu, tüopa yeme numan-e hangne nishe lüppu?

¹⁰Numan-e nyih hei lekeng, hüyange juwan hipak hei wangpenglan nyoinang.

¹¹Numan jingne taowe hanghe toiling tüopa jajang jawe lingpu heiya she, taowe nyamnang.

¹²Jeiheinaolan, ü-kih ngohyah she taowe tongnang, hangjingne tao-o numanke ngohnang. Numan-e, üte ümeng hango yeling.

¹³Hüpoi ü-püm tangta me dakpu jingne, taowe üwangne numante pungao ümei konnyüo she numan-e shing.

¹⁴Hüyange ü-tangta me dakpu numante tokpune mengyapoi, tüopa numan-e yemei she yeteih, yejema-a yewin, hüpoi Kahwang wangdang shongmokpake, hüke Khrista Jesuke numan-e tao yah.

¹⁵Hüwante numan mongmeiyangpu ümeken me ngohnangki? Hangjingne ok-shihma-a, numan-e yoi mük yokke yahpuwe üte phane monge ngoh she, tao numan saki ngohnang.

¹⁶Sha-a taowe numante ütingpa iwante, tao numan wepane menglak a?

¹⁷Iman-e ümei yeme yejepe numante lahnyikke yamnang, hüpoi numan-e iman yamne tamlak jingne, iman-e numan ü-at me winnang.

¹⁸Hüyange taowe numan phei ngohwante hei yeje, hüpoi hipak üshei me toimei jingne kahta lahnyikke yamküme meilak yang.

¹⁹Ü-mongkenpu hayimlan, numan me Khrista nyoingoh manngai manngai she, moipai wante nyuyong shangpu kih-e tao nishe shangnang.

²⁰Hüpoi sha-a tao numan phei omlak hüyange ü ngaowüng leijeilak tanne ngoh, hangjingne tao numan jingne mongshang!

²¹Numan ngaokhüm phang me ngoh hupulan, üte itehu! Numan-e ngaokhüm-a yejailak a?

²²Hangjingne tüo nyanne ngohnang, Abraham-e üha ni ngoh, rhanyu mepu ja, hüyange bumeinyu mepu ja.

²³Hüpoi rhanyuwe puhpuwa mei wanglam me puh, hüyange bumeinyuwe puhpuwa janpu kaiye puh.

²⁴Tüolan me ngao leppu ngohnang; hangjingne tüolan sheko jiengjeppu ni ngohnang; ja Sinai kahtang mepu pei, hüyange rha halan puh; yha-a Hagar.

²⁵Sha-a Hagar-a Arabia me ngohpu Sinai kahtang ngohnang; hüyange sha-a ngohpu Jerusalem hüonang, hangjingne yha yoi hayimlan phei rha yatuh shaome ngohnang.

²⁶Hüpoi ütangpa me ngohpu Jerusalem bumei ngohnang, hüyange yha teman ünyu.

²⁷Hangjingne tüopa nyanne ngohnang: “Nang heelangnyu, mongmeiye ngohtüoh: nang aowe moipaine dakpu aope-o yeshing, ngao ngaitüoh hüyange üngwün tüoh; hangjingne netanpa ngohpu sheko pheiya, yoi shaha ngohpu nyu hayim shepanglak.”

²⁸Sha-a teman jeiheinaolan, Isaac kih-e teman janpu hayim ngoh nang.

²⁹Hüpoi üshongwante hangke meime puhpu nahawe Yaha me puhpu nahate shangne tam, hüke shaa-o ngohnang.

³⁰Hüpoi ngaolaiye hanghe inangki? “Rhanyu hüyange I ha jang wintüoh, hangjingne rhanyu hawe bumeinyu üha moth yeleilak.”

³¹Tüokhei, jeiheinaolan, teman-a rhanyu ühalanne yeje, hüpoi bumeinyu hayim.