Read Konyak Naga GALATIA 5 Bible Online

GALATIA 5 - Konyak Naga bible

GALATIA 5

¹Bumei jingne Khristawe teman lanne tam. Tüokhei mongjüonge yongtüoh, hüyange nishe rha peitüp me tahpai.

²Leiyah! Tao, Paul-e numante inang, numan-e shokhüpma-a, shaaji numan jingne Khrista wongpongne yeje.

³Hüyange shokhüppalan lilite Iye ngaokhüm wanglam üshei jonlak Iye pheeisea seayange ngohnang she taowe nishe saki phanang.

⁴Numan ngaokhüm-e tingetamlak jingne ngangpalan Khrista mepu yanne ngohnang; shüpshe mepu numan yeiye ngohnang.

⁵Hangjingne ütinglakpuwe Yaha kaiye teman-e khakshupupa jingne monghüm-e tannang.

⁶Hangjingne Khrista Jesu phei shüppe shapu me, shokhüppu hei yekhüppu hanghe-o yenang. Hüpoi kenpu kaiye ütinglakpuwe toi lingnang.

⁷Numan-e yeonge meiye phette ngohyangki; numan-e ngaotingpa ngao yejaitamlak jingne aowe numan tien ei?

⁸Aowe numan nyiknang I mepu hüke tüopa yohpu yepei.

⁹Do üjinghapuwe an ü-oun lanshe bungne tamnang.

¹⁰Numan ngaojaipu tokte ülao jeng hango yeteih tüolak jingne taowe numante Youngwanpa me monghahnang; Hüpoi aowe numante shangne tamnang I ao ne menglakei, yoi ngao phünpu nünlak.

¹¹Hüpoi, jeiheinaolan, shokhüplakpa ngao taowe üne-o konnyüoma-a, taowe hangne üne-o shangne tampu? Hüwantepa-a tangpem yashah hüopu yah teiteki.

¹²Aoyinne numan mongtoitaine tam, taowe iman yoi nying nyingke jaoshe ihye lange winne tamhunangki.

¹³Jeiheinaolan, bumei jingne numan nyik; hüpoi tüopa bumei numan meiye linghupu pa ke linglak jingne hei tahjon, hüpoi kenpu phei jawe ja shao tei-shantüoh.

¹⁴Hangjingne ngaopha ja me ngaokhüm üshei ngainang; tüopa ngaowa hatüo, “Nange nang yupite nangkih-e kenyah.”

¹⁵Hüpoi numan-e jawe japhei teijeih-e hüyange teihah ma-a, jawe japhei teihokke mah-e yeshonlak jingne kentingyah.

¹⁶Hüpoi numan-e Yaha me kemtüoh, hüyange numan-e meiye lengpu ngaine yetamlak jingne taowe inang.

¹⁷Hangjingne meiye lahnyikpuwa Yaha phei tüi-e, hüyange Yahawe lahnyikpuwa mei phei tüi-e, hangjingne tüoniya wepa; tüokhei numan-e hang linghunang tüopa yeling ok;

¹⁸Hüpoi Yahawe numan woima-a, numan ngaokeng phangme yenang.

¹⁹Sha-a mei toishaolan ütahte ngaiye ngohnang; hatüolan-a tüo, nuweshakpu, yejaoyeshapu, jokkemokpu yakjongpa,

²⁰moungte khümpu, phongyengpu, teinupu, moppu, müktakpu, mongshih ngaipu, ünyei yah-hupu, teiyemongpu, teitampu,

²¹teikhahpu, yuwe jokpu, nokshümpu, hüyange tüolepu. Aoyinne tüokihpu jonlakei, iman-e Kahwang ahngching moth yetüolak she taowe hangke numan üshongpemuh kenting ne tam, hüke sha-a taowe numan kentingne tamnang.

²²Hüpoi Yaha ülick tüolan ngohnang, kenpu, mongmei, chingmei, nün-okpu, yayeng pheipu, meipupa, monghümpu,

²³innenyaipu, yoi nying nyingke tükke okpu; tüolan phei tüi-e ngaokhüm yenang.

²⁴Hüyange aoyin Khrista Jesu jing kahta ne meng, iman-e meilahnyikpu hüyange yejaopu tangpem me takyangki.

²⁵Yaha me teman üyin ngohma-a, teman-e Yaha phei üne-o kemhah.

²⁶Teman-e jawe japhei mongmengne tahtamhah, yejema-a mong yehahpu angne tahtamhah, yejema-a teikhahpu tah anghah.