Read Konyak Naga GALATIA 6 Bible Online

GALATIA 6 - Konyak Naga bible

GALATIA 6

¹Jeiheinaolan, kahta ütam toi ümeng ütam linge phoma-a, numan Yaha me wongnang palan-e, Yaha innenyaipu me tüokihpu kahta tükke angtüoh. Numan nying nyingke kentingyah, yejema-a numan-o omme yeilak.

²Shejawe sheja hangki teikiyah, hüyange hüke Khrista ngaokhüm ngaine tamtüoh.

³Hangjingne kahta ütam-e hango üjepute I ülamja ngohnang she teihma-a, Iye yoi nying nyingke lowetam nang.

⁴Hüpoi kahta liliye yoi toishao tokke leiyah, hüwante ülao jing yeje, Iye yoi jeng hei minyongpu tüolak.

⁵Hangjingne kahta liliye yoi hangki kilakyang.

⁶Hüpoi ao te ngaowa nyüowe ngoh Iye toimei üshei konnyüopa phei teitamyah.

⁷Lowelam-e tahtam; Kahwang ye-i-yeshepe tahling; hangjingne hanghe kahtawe deinang, tüomuh Iye wetlak.

⁸Aowe yoi meime deilakei Iye meimepu mahpu wetlak, hüpoi aowe Yaha me deilakei Yaha me jintepu üyin wetlak.

⁹Tüokhei teman-e ümei lingpu me tah eanghah, hangjingne teman-e mongjang paiye yetaima-a, hipak khakshuwe wetlak.

¹⁰Tüokhei teman-e hipak üshei me toilingpu me ngohma-a, kahta üshei jingne, hüyange ünyeine mengpalan jingne ümei linghah.

¹¹Hangke aikek üyonge yoi yakke taowe numan tangte nyan, tüopa leiyah.

¹²Aoyinne meime yonge lüohunang, iman-e numan shokhüppe tamlak ngangnang, hüpoi Khrista tangpem jingne iman-e shangepongpu ye-ngelak jingne hei tüopa lingnang.

¹³Üne-o aoyin shokhüp palan-e mengnang iman-e yoi nying nyingke ngaokeng yejon, hüpoi iman-e numan meime yongelüolak jingne shokhüppe tamhunang.

¹⁴Hüpoi teman Youngwanpa Jesu Khrista tangpem, hanghe kaiye ü-yete kahtoknyu, hüyange kahtoknyu yete tao tangpem me takyangki, tüopa tangpem kaiye taowe hanghe me-o yeyonglak Kahwange tükyah.

¹⁵Hangjingne kahta üla ne mengpu tokte kaiye shokhüppu jeyah, yekhüppu jeyah hango yeje.

¹⁶Hüyange aoyinne tüopa ngaokeng me kemlakei, iman tangme hüyange Kahwang Israellan üshei tangme chingmei hüyange shüpshe ngohtüoh.

¹⁷Sha-a me peiye aowe-o tao shangne tahtam; hangjingne taowe ü-püm me Jesu ükolan kinang.

¹⁸Jeiheinaolan teman Youngwanpa Jesu Khrista shüpshe numan yaha phei ngohtüoh Amen.