Read Konyak Naga EPHESIA 1 Bible Online

EPHESIA 1 - Konyak Naga bible

EPHESIA 1

¹Paul, Kahwange mongpu kaiye Khrista Jesu lampu ja Ephesia me ngohpu üjaolan hüyange Khrista Jesu me monghümpulan tangte:

²Teman Üpa Kahwang hüyange Youngwanpa Jesu Khrista mepu numan tangte shüpshe hüyange chingmei ngohtüoh.

³Teman Youngwanpa Jesu Khrista Üpa Kahwang, aowe wangdang nyoijing me yaha moiman üsheiye Khrista me teman moiman tam, I min yongtüoh!

⁴Teman I sheshao me I yayeng me üjao hüyange ümeng yenangpe ngohlak, kahtoknyu manlingwante muh Iye teman Khrista me le.

⁵Jesu Khrista kaiye I ha ne menglak jingne Iye hanghe jingne mong tüokih-e kenpu me Iye teman nyingyangki;

⁶hüyange I shüpshe, hanghepa Iye kenpupa temante jajang jawe pha, tüopa shüpshe müktishiwa yonge tamhah.

⁷Khrista shüpshe toinyuke teman-e Khrista me I iy kaiye teman yintam, hüke teman ünu ümeng winpu tüo;

⁸hüke yoi shüpshe üyong phei phinne hanghepa Iye temante wangman-e pha;

⁹Hangjingne I konjong üshei hüyange yoi ümongpa yashanpu Iye temante shingne tam, I wongpong phei shuwe Iye Khrista shon,

¹⁰tümyangpuke wange ngoipu hipak jingne wangdang me ngohpu toilan hüyange kahtokme ngohpu toilan üshei Ime shüppe jemlak.

¹¹Hangjingne toi üshei Kahwang juteih hüyange Iye mongpuke ling; hüyange I kahta ne menglak jingne Khrista phei shüppe jemme I yoitoi jingne Iye nyingyangpuke Kahwange teman le.

¹²Hümma-a, teman aoyin Khrista me üwangne monghüm, Kahwangpa müktishiwa te yihlutüoh!

¹³Hüyange numane-o ütingpa ngaowa, hüke numan yinyepu pungao ümei jaipu jingne, hüyange numan-e Khristate mengpu jingne janyangpu Yaha Üjaowe numan Khrista me füosange tüp.

¹⁴Kahwange hanghe yoi kahtate janyangki tüopa tüolak jingne Yaha-a phayangpu, hüyange Kahwange aoyin yoi jingne meng tüolante bumei phalak she ütingpa jan. I müktishiwa yihluhah!

¹⁵Tüojingne taowe üne-o Youngwanpa Jesute numan ütinglakpu jeng hüyange üjaolan üshei jingne numan kenpu jaipu jingne,

¹⁶taowe Ü-yoppu me numan min iye numan jeng yelakpe minyongpu phanang.

¹⁷Hüyange teman Youngwanpa Jesu Khrista Kahwang müktishiwa Üpawe I jeng shingpu me konjong hüyange ütahte ngaipu yaha-a numante phalak she,

¹⁸hüyange numan mongjang mük wangngai tamlak, tüowe Iye numan nyikpu me I hanghe monghümpu ngoh, hüyange üjaolante I mothleipu müktishiwa hüyange toinyu nanha hanghe,

¹⁹hüyange teman mengpalante I ünganwong hangke yeonge yong, üyongpa I wongphei shuwe,

²⁰hanghe Iye Khrista yange yetampu kaiye tümme sho hüyange wangdang nyoi me I yakjah yeme shotne tam;

²¹wanglam üshei tangme hüyange wong üshei tangme hüyange ünganwong hüyange ahngching, hüyange min minpu üshei tangme, tüopa jin me shaha yeje hüpoi peine ngohpu jingne-o;

²²hüyange Iye Khrista yaphang me üshei ang, hüyange bumeinok jingne üshei tangte I üshangne menge tam.

²³Bumeinok-a I püm, hüyange aowe üshei me üshei maatamnang I wangngoipuwa bumeinok.