Read Konyak Naga EPHESIA 3 Bible Online

EPHESIA 3 - Konyak Naga bible

EPHESIA 3

¹Tüopa jeng jingne tao, Paul, numan yinhulan minme Khrista Jesu jingne küpnok me,

²Kahwang shüpshe yakjongpa toi hanghe numan jingne üte phawe ngohnang, tüopa jeng numan-e ütingme jaiye ngohma-a;

³hanghe ütahte ngaipu ngaowe lopu ngaowa üte shingne tam, tüopa taowe shohkünoh-e nyan.

⁴Hüyange aope tüopa iye leilakei, Khristawe lo-angpu ngao me taowe shingpu numan-e shingne-oklak.

⁵Tüopa lopu ngaowa sha-a Yaha me I üjaopa lampulan hüyange hipalante ütahte ngaipuke ülao jin me kahta halante shingne yetampe ngohyangki.

⁶Hüyange tüopa lopu ngaowa hatüo, hüke pungao ümei kaiye Khrista Jesu me Yinhulan teman phei mothleipalan, hüyange püm ja me ompalan, hüyange janpu jakih-e yahpalan ngohnang.

⁷Tüopa pungao ümei jingne Kahwang ünganwonge toi lingpuke üte phapu Kahwang shüpshe kaiye tao shaoshanpa ne meng.

⁸Khrista jing yeyamküm okpu hakke hepulan Yinhulante konnyüolak, üjaolan üshei yo me üjoipa phei-o sheshoipa tao, üte tüopa shüpshe phateki.

⁹Hüyange Kahwang, aowe toinan üshei ling, Ite hanghe lo-ngao jin maawe küppe ang, tüopa tammehanpu ngao kahta üsheite ngetamlak jingne,

¹⁰hüyange I konjong üyong sha-a bumeinok kaiye wangdang ngohjing nyoime wanglam lampalan hüyange wong pheipu lante shingne tamlak jingne pha.

¹¹Hüyange Kahwang jing üküm yenangpu juteih kih-e, hanghepa Iye teman Youngwanpa Khrista Jesu me monge sho,

¹²ao me teman mongyong nang hüyange teman ütinglakpu kaiye yeonge Ime monghüm nang.

¹³Tüokhei numan jingne tao shange pongpu hanghepa numan jingne müktishiwa ngohnang tüojingne numan mongtah shoi she taowe tongnang.

¹⁴Tüopa jingne Üpa sheshao me taowe yatuhshinge khümnang,

¹⁵ao mepu wangdang me hüyange kahtoknyu me nokden üshei min minnang;

¹⁶hüke I müktishiwa hakke-hepuke, I Yaha kaiye numan ümongpa kahta wongnangne Iye tamlak taowe yopnang.

¹⁷Hüyange ütinglakpu kaiye numan mongjang me Khrista ngohlak jingne, numan kenpume üyayuwe mongjüonge yongyange,

¹⁸numan-e üjaolan üshei phei üjük hei üpeam hüyange daopu hei lupu hanghe ngoh, tüopa shinge oklak jingne,

¹⁹hüyange shinge manpu üshei phei sheyongpu Khrista kenpu shinglak jingne, tüokaiye Kahwange wangngoipu üsheiye numan-o wangngoi tamlak.

²⁰Sha-a temante lingpu ünganwong kih-e, aowe teman-e tongpu hüyange teihpu üsheite yeonge nyeiye lingne oknang;

²¹Ite bumeinok me hüyange Khrista Jesu me müktishiwa jin üshei me jinte ngohtüoh! Amen.