Read Konyak Naga EPHESIA 4 Bible Online

EPHESIA 4 - Konyak Naga bible

EPHESIA 4

¹Tüokhei tao, Youngwanpa jingne küpnok me ngohpupawe numan hanghe jingne nyik wangngoipu üyin me woilak jingne,

²innenyaipu hüyange nyaishümme, nün-okpu üshei phei kenpume shejawe sheja teih tüoyah.

³Hüyange chingmei me teishinpu Yaha shüppe shapu anglak jingne lahnyikpu ngohtüoh.

⁴Pümja hüyange Yaha ja ngohnang, hüke numan-o numan nyikpu monghümpu ja me nyik.

⁵Youngwanpa ja, ütinglakpu ja, baptipu ja,

⁶Kahwang ja, hüyange teman üshei üpa ja, ao üshei tangme hüyange üshei kaiye üshei me ngohnang.

⁷Hüpoi Khrista hünghao itpuphei shuwe teman pümleppute shüpshe pha.

⁸tüokhei hüke i: “Aope I ütangyete ong, Iye küppe angpalan maawe I phei woi in; hüyange Iye kahtalante hünghao pha.”

⁹Sha-a, “I ong” she ipuwa hanghete leppu? Tüopate leppuwa üwangne I shelupupa kahmongte yuyangki.

¹⁰Iye üshei maa tamlak jingne, yupu hei wangdang üshei ütangyete ongpuwa ja ke ngohnang.

¹¹Hüyange Iye ütam lampune, ütam hipane, ütam evangelist ne, ütam pastor ne, hüyange ütam konnyüopa ne,

¹²hangjingne üjaolan shaoshanpu toi jingne, shaoshanpu toime wange tamlak jingne, Khrista püm linge yelak jingne,

¹³teman üshei ütinglakpu me hüyange Kahwang Üha shingpu me shüppe manjem manjem, hüyange kahta lwngmeine manjong manjong, hüyange Khrista wangngoipu püm shemme nyaopu manngoi manngoi I mepu hünghaolan phawe ngohnang.

¹⁴Teman shaaji nahakih yengohlak, yejema-a nyaopu wangyang liliye po ne tam-e, yejema-a kahta lowelampa hüyange deiyetükpuwe hüyange püohwe ngaoleih nyüopuwe jongne tamme yuwe onge tahnang.

¹⁵Hüleima, kenpu phei ngaoting iye üsheime I me teman jonglak, Iya üshang, hüke Khrista;

¹⁶hüyange I me püm üshei hüowe shayange, üpong liliye teijampu kaiye, ümük liliye yoi toi lingpuke püm-a yoi nying nyingke kenpume jonge lwngmei ne menge tamnang.

¹⁷Sha-a Yinhulan-e yoi mongyangpu me kempuke numan-e üne-o yekemlak jingne taowe tüopa inang; hüyange Youngwanpa me saki phanang.

¹⁸Iman yoime yeshingpu ngohpu jingne, hüyange iman yoi mongjang wanpu jingne iman shingemanpu-a wangnyak ne menge Kahwang üyin mepu iman yanne ngohnang.

¹⁹Iman ja ngoh ngoh-e, yeonge lahnyikpu phei yejaopu üshei jonlak jingne yoi nying nyingke jokke mokpu yakjongpate pha.

²⁰Hüpoi numan-e Khrista-a hüke shingyahpu ne yeje!

²¹Numan-e ütingme I jeng jaiteki, hüyange I pheite woipalanne menge Jesu me ngohpu ngaotingpa numante nyüoyangki.

²²Numan üshongpu üyin kahta ülang, hanghepa lowelampute lahnyikpuke mahtainang, tüopa wintüoh;

²³hüyange numan kenmong yaha me ülane menge

²⁴kahta üla, ao Kahwang lepu me ngaotingpa, khakshupupa hüyange üjaopa me lingyangki, tüopa otüoh.

²⁵Tüokhei ngaoleih ngaopu winyange, kahta lili yoi yupi phei ngaoting ngaotüoh hangjingne püm ja me teman ümük japong ngohnang.

²⁶Mongshih ngaitüoh, hüpoi ünu tahling; nang mongshih ngaipu tangme wanghe nyipne tahtam;

²⁷hüyange kahshihte nyoijing tahpha.

²⁸Aowe kuh-e ngoh, Iye shaaji tahkuh, hüpoi wongpong ne mengpu kahtate phalak ngohlak jingne, Iye yoi yakke hanghe toimei ngoh, tüopa lingtüoh.

²⁹Numan ju mepu ngaomeng ja nehoi ngaine tahtam, hüpoi wongpong kih-e hanghe linge püolak jingne ümei ngoh, jaipalante shüpshe phalak jingne tüopa ngaotüoh.

³⁰Hüyange Kahwang Yaha Üjao, aome yintamlak nyih jingne numante füosange tüp, I mongmengne tahtam.

³¹Ükhah üshei, hüyange mongshih ngaipu hüyange mongme yehupe moppu, hüyange tahleih pheipu, hüyange nupu üshei numan mepu yanne tamtüoh.

³²Hüyange jawe japhei wangshüm teihüowe ngohtüoh, hüyange hangke Kahwange Khrista me numan ümeng win, hüke numane-o jawe ja te ümeng teiwintüoh.