Read Konyak Naga EPHESIA 5 Bible Online

EPHESIA 5 - Konyak Naga bible

EPHESIA 5

¹Tüokhei kenpu hayimlanke numan-e Kahwang nyoingoh yahtüoh.

²Hüyange Khristawe hangke numante ken hüyange üpe ümei dopu ja ne Kahwangte teman jingne yoi nying nyingke toidopu pha, hüke numan-e kenpume kemtüoh.

³Shaajihi numan-a Kahwangpa kahtalanne mengpu khei. Nuweshakpu hüyange yejaoyeshapu üshei, yejema-a yejaihupu min nehoi ine tahtam.

⁴Yejema-a yemeipu, yejema-a nga ngao, yejema-a khonpu, hanghe shupune yeje, ngaone nehoi tahtam; hüpoi tüopa nanlei, minyongpu phatüoh.

⁵Hangjingne nuweshakpu, yejema-a yejaoyeshapu kahta, yejema-a waupu kahta, aowe moungte khümpu ne ngoh, tüolan yo me aowe-o Khrista hüyange Kahwang ahngching me moth yeleilak she, numan-e ütingme shing.

⁶Aote-o jajang japu ngaowe numan lowelamne tahtam, hangjingne tüolan jingne ngao yejaipu hayimlante Kahwang mongshih ngaipu peinang.

⁷Tüokhei numan-e iman phei teitamme hanpalan ne tahmeng;

⁸hangjingne numan ja me wangnyak me ngoh, hüpoi sha-a Youngwanpa me numan wangngai ngohnang; wangngai hayimlanke kemtüoh;

⁹hangjingne wangngai ülick-a shemeishe hüyange khakshupu me hüyange ngaoting üshei me ngohnang.

¹⁰Hüyange Youngwanpa shaome hanghe monghahpu ngohnang tüopa shingne ngangtüoh.

¹¹Hüyange ülick yelickpu wangnyak toishao phei tahpüang, hüpoi iman tingetam tüoh.

¹²Hangjingne iman-e lowe jonpu jeng ngaolak jingne nehoi wüonang:

¹³hüpoi aope wangngai tangte üshei ngaitam, iman wangngaiye ütahte ngaitamnang;

¹⁴hangjingne ngelakne ütahte ngaiye tampu üshei wangngai ngohnang. Tüokhei tüopa inang: “O shipupa, lüotüoh, hüyange lipu mepu yange yetüoh, hüyange Khristawe nangte wangngai tamphalak.”

¹⁵Tüokhei numan hangke kem kentinge leiyah, yekentingpake yeje, hüpoi deitahpake kemtüoh;

¹⁶hipak ümei üshei shakshinyah, hangjingne nyih hei hipak ümeng ngohnang.

¹⁷Tüokhei üngapa ne tahnang, hüpoi Youngwanpa mongpu hanghe ngoh tüopa shingyah.

¹⁸Hüyange wuwüngti hanghe me nüngneilak ngohnang, tüowe tahjok, hüpoi Yahawe maawe ngohtüoh.

¹⁹Tüowelaihem hüyange üjao hem hüyange yaha hem me teingaowe, hemwüng ümei ngao ngaiye mongjang üsheiye Youngwanpate loktüoh.

²⁰Jinte üpa Kahwangte teman Youngwanpa Jesu Khrista min me üshei jingne minyong tüoh.

²¹Khristate nyampu me numan yoi nying nyingke jawe japhang me ngohtüoh.

²²Shekonyulan, Youngwanpa me ngohpukih yoi netanpalan phangme ngohtüoh.

²³Hangjingne hangke Khrista I nying nyingke püm yinyepane menge, bumeinok üshangne ngohnang, hüke netanpa-a shekonyu üshang ngohnang.

²⁴Hangke bumeinok Khrista phangme ngoh, hüke shekonyulan-a üshei me yoi netanpalan phangme ngohtüoh.

²⁵Netanpalan, Khristawe bumeinokte hangke ken hüyange I nying nyingke hangke pha, hüke shekonyulante kentüoh.

²⁶Hüke Iye bumeinok Kahwang ngaome yengyüopu kaiye jaoweshawe tamlak jingne;

²⁷hüke bumeinok tushangpu yejema-a ko-shangpu hango yenangpe, shemeiyaoma puphei hüyange ümeng yenangpe; I tangte tüopa müktishiwapu bumeinok üshei peilak jingne Iye ling.

²⁸Tüokih-e netanpalanne yoi shekonyulante kenlak wongpong; Aowe yoi shekonyute kennang Iye yoi nying nyingke yoite kennang.

²⁹Hangjingne aowe-o yoi meite aope-o yenu, hüpoi Iye tüopa uhyinge tamnang hüyange püonang; hüke Khrista-o bumeinok tümnang;

³⁰hangjingne teman-a I püm ümük ja ngohnang.

³¹Laingaowe ipuke, “Tüojingne netanne yoipa hei yoinyu tüohlak, hüyange yoi shekonyu phei jemlak, hüyange imni mei ja ne menglak.”

³²Tüopa lowe ngohpu ngaonyu, hüpoi taowe Khrista hüyange bumeinok jeng ngaonang,

³³Tüoyangpoi, numane-o kahta liliye, yoikih yoi shekonyute kentüoh: hüyange shekonyuwe yoi netanpate wangshüm hüoyah.