Read Konyak Naga EPHESIA 6 Bible Online

EPHESIA 6 - Konyak Naga bible

EPHESIA 6

¹Nahalan, Youngwanpa me numan yoi nyupalan ngao jaitüoh, hangjingne hatüo shunang.

²“Nangpa hüyange nangnyute iyesheyah” tüopa-a janpu mepu üwangpa ngaokeng ngohnang.

³“Tüowe nang üshei me moimanlak hüyange kahtoknyu me nang jinlaolak.”

⁴Payonglan, numan yoi hayimlan mongmenge mongshih ngaine tahtam, hüpoi Youngwanpawe hüopu hüyange nyüoweleipu me jongne tamtüoh.

⁵Rhapalan, numan-e Khrista shaoshanpu kih-e nyampu hüyange ninpu me mongjang juteih japhei kahtoknyu wanglam me yoi nokpulan ngao jaiyah.

⁶Kahta mongmeine tampalan kih-e müktoiye yeje, hüpoi Khrista shaoshanpake yoi mongjang üsheiye Kahwange mongpu lingtüoh.

⁷Kenmong ümeiphei kahtate yeje, hüpoi Youngwanpate shaoshanpukih shanne,

⁸rha jeyah, bumei jeyah, aowe hangke ümei linglakei Iye Youngwanpa mepu jakihmuh leih-e tüolak she teiyah.

⁹Hüyange nokpulan, hüke numane-o imante lingtüoh. Iman hüyange numan Nokpupa wangdang me ngohnang she, hüyange Iye kahta üshei sheta yeleishe shinge, imante nyamshaowe tahtam.

¹⁰Üküm ne, Youngwanpa me hüyange I ünganwong nangpu me wongnang yah.

¹¹Numan-e kahshih lowelampu phei tüi-e yong oklak jingne, Kahwang wehok o üshei o tüoh.

¹²Hangjingne teman-e iy hei mei phei tüi-e yehok, hüpoi ükengnyulan phei tüi-e, ünganlan phei tüi-e, tüopa wangnyak kahtok wanglam lampalan phei tüi-e, wang ütangyeme yaha ümeng ngohpalan phei tüi-e teman-e hoknang.

¹³Tüokhei shemengpupa nyih hei hipak me numan-e yonge oklak jingne, hüyange üshei linge shoyang phei me, yonge oklak jingne, Kahwang wehokpu o üshei yahtüoh.

¹⁴Tüokhei ngaoting iye numan shienghit hityange, hüyange khakshupu mongkhüp yahyange,

¹⁵hüyange chingmei pungao ümei pongtam ne tümpu yashom ya me shom yange yongtüoh.

¹⁶Hüyange tüopa phei nyeiye üne-o ütinglakpu ree hangheye numan-e ümengpa jing vün pheipu lahhan meipu oklak, tüopa yahtüoh.

¹⁷Hüyange yinyepu yan shaoshaoh hüyange Yaha yanglow, hanghepa Kahwang ngao ngohnang, tüolan yayah.

¹⁸Kahwangte wong yuwe, yoppu phei tüolan üshei lingtüoh. Yahawe hangke woi, hüke hipak phe me yoptüoh. Tüojingne deitahpu phei ngohyah hüyange aope-o tah ang; üjao kahtalan üshei jingne jinte yoptüoh;

¹⁹hüyange aope taowe ngaolak jingne tümlakei, taowe wongnange ngao oklak hüyange lowe angpu pungao ümei ütahte ngaitamlak ne Kahwange üte ngao phalak jingne üjingne yoppha.

²⁰Hangjingne sha-a tao küpnok me ngohyapoi, pungao ümei jingne tao lampu ngohnang; taowe ngaolak khakshuwe wongnange konnyüolak jingne yoptüoh.

²¹Hüpoi numan-e üjeng shinglak jingne hüyange tao hangke ngoh, jeiheinao kenpupa hüyange Youngwanpa me monghümpu shaoshanpa, Taikhikas-e (Tychicus) numante üshei shingne tam phalak.

²²Tüopa jingne muh numan-e toman yatuhshao shinglak jingne, hüyange Iye numan mongjang toloimei tamlak jingne, taowe I numan tangte shonteki.

²³Üpa Kahwang hüyange Youngwanpa Jesu Khrista mepu jeiheinaolan tangte ütinglakpu phei chingmei hüyange kenpu ngohtüoh.

²⁴Teman Youngwanpa Jesu Khristate üküm yenangpe aoyinne ken iman üshei phei shüpshe ngohtüoh.