Read Konyak Naga PHILIPPI 1 Bible Online

PHILIPPI 1 - Konyak Naga bible

PHILIPPI 1

¹Paul hüyange Timothy, Jesu Khrista shaoshanpalan, Philippi me ngohpu Khrista Jesu me üjaolan üshei hüyange bishoplan hüyange deaconlan tangte:

²Teman Üpa Kahwang hüyange Youngwanpa Jesu Khrista mepu numan tangte shüpshe hüyange chingmei ngohtüoh.

³Numan teihtüopu hipak lili me numan üshei jingne taowe Ü-Kahwang minyong nang;

⁴hüyange hipak lep iye taowe numan jingne yopwante, mongongpu phei taowe yopnang.

⁵Üwangpa nyih mepu sha-a ngoiye pungao ümei toishaome numan-e teijampu jingne minyongpu phanang.

⁶Hangjingne aowe numante toi ümei ükong wang, Iye Jesu Khrista nyih ngoiye tüopa muh wangngoiye tamlak she taowe üting laknang.

⁷Hüke numan üshei jingne taowe teihlak wongpong, hangjingne taowe ü-mongjang me numan angnang; hangjingne üte shapu me hüyange pungao ümei tükpu hüyange mongne tampu toishaome numan üshei shüpshe me tamme hanpalan ngoh nang:

⁸Khrista yayeng shüpshe me numan üshei jingne taowe hangke yoongeteih tüopa jingne Kahwang ü-saki ngoh nang.

⁹Hüyange numan jingne taowe yoppu hatüo: ütingpa shinge manpu hei khakshuwe ngaopu üshei me, numan kenpu ünyei ünyei jaalunlak jingne;

¹⁰hüyange hanghe shemeipupa tüopa numan-e yahlak jingne hüyange numan Khrista nyih ngoiye jaoshe-i-ye hüyange ümeng yenangpe ngoh oklak jingne,

¹¹hüyange Kahwang müktishiwa hüyange yihlupu jingne khakshupu ülick, hanghepa Jesu Khrista kaiye ngohnang, tüopawe numan üyin maatamlak.

¹²Üne-o jeiheinaolan, üte hanghe ngai tüopa kaiye pungao ümei-a ünyei nehi ponge tai she, taowe numante shingne tamhu nangki.

¹³ngaophünpu nok üshei me hüyange ülao towe ngohpu üsheite üte shapuwa Khrista jingne ngohnang she ütahte ngai;

¹⁴hüyange Youngwanpa me jeiheinaolan sheyongpu jingne üte shapu kaiye mongyonge ngaiye; Kahwang ngao yenyampe ngaolak sheyongshe ünyeine wongnang.

¹⁵Ütam-e ütingme khahkopu hei teelapu kaiye Khrista ngao konnyüo, hüpoi ütam-e monghah puphei konnyüo.

¹⁶Ütam-e tüopa-a kenpuwe ling, hangjingne pungao ümei tüklak jingne Tao tannetam she iman-e shing.

¹⁷Hüpoi ülaolan-e mih-e üte shapu hipak me ünyei shangne tamlak jeng teih-e, ngaotingpa me ye-i-pe teitampu phei Khrista ponge tamnang.

¹⁸Hümma-a hanghe? Ülam lilime hatüo hei, aohüngpu phei jeyah, ütingpa me jeyah, üshei yeme Khrista pongne tam-e ngohnang; hüyange tüopa jingne tao mongmei nang, hüyange üne-o mongmeilak.

¹⁹Üting, hüyange tao mongmeilak; hangjingne numan-e yoppu kaiye hüyange Jesu Khrista Yahawe phapu kaiye ü-yinyepu jingne tüopa-a menglak she taowe shing.

²⁰Tüokhei taowe luwe teih-e monghümpuke, taowe hangheme-o wüotüopu ye-ngelak, hüpoi wongnangpu üsheiye, jintepukih, üyin ne jeyah, ümange jeyah, shaa-o üpümme Khrista yongne tamlak.

²¹Hangjingne ü-jingne üyin ngohpuwa Khrista, hüyange lilaka küw ngohnang.

²²Hüpoi meime üyin ngohma-a, tüote ipuwa ü-toishao mepu ülick lickma-a hüwante taowe hanghepa lelak tüopa taowe yeshing.

²³Hüpoi moinipa me tao nüngneiye ngohnang, tao yanne Khrista phei ngoh hunangki; hangjingne tüopa loishe shemeipupa.

²⁴Hüpoi tao numan jingne mei me ngohlakpa wongpong sheyong she ngohnang.

²⁵Tüopa shinge, tao numan phei ngohlak she taowe shing hüyange numan üshei phei yelakpe ngohlak, numan jaalunpu hüyange ütinglakpu me mongongpu jingne;

²⁶tüokaiye tao numan phei üne-o ngohne peipu jingne numan üyin me tao kaiye Khrista Jesu ünyei müktishiwane oklak.

²⁷Numan üyin nyoingoh hei Khrista pungao ümei me wangngoiye, tüokaiye tao peiye numan ngepheime jeyah, tao ye-ompe jeyah, numan-e pungao ümei ütinglakpupa jingne teingange, numan yaha ja me, kenmong ja ne mongjüonge yongnang she taowe jailak.

²⁸Hüyange numan wepalanne hanghe me-o nyamne yetamlak. Numan nyampu yenangpuwa iman jingne mahlak saki ümei ngohnang, hüpoi tüopa-a numan jingne Kahwang mepu yinyepu jeng saki ngohnang.

²⁹Hangjingne numante hatüo phayangki, hüke Khrista jingne Ite numan ütinglaklak hei yeje hüpoi üne-o I jingne shangeponglak,

³⁰üme hanghepa wehokpu numan-e nge, hüyange sha-a üme ngohnang she jainang, numane-o ü-phei tüopa hokpu me meitam yahne ok.