Read Konyak Naga PHILIPPI 2 Bible Online

PHILIPPI 2 - Konyak Naga bible

PHILIPPI 2

¹Tüokhei Khrista me ülamja hengpu ngohma-a, kenpu mepu ülamja toloimeipu ngohma-a, yaha me shüppe jempu ülam ja ngohma-a, ülamja yayeng shüpshe hüyange shüpshe teihpu ngohma-a,

²shüppe jempu ja me, juteih ja me kenpu jakih muh ngoh-e, numan kenmong jakih ngohlak jingne, numan-e ümong meipu maane tamtüoh.

³Hüyange teitampuwe jeyah, jajang jawe otapuwe jeyah, hango tahling, hüpoi innenyaipu phei kahta liliye yoiphei eiha sheyongpu she tei-i-yah.

⁴Numan kahta liliye yoi jeng shaha yeteihpe eiha jeng-o teihtüoh.

⁵Khrista Jesu me hanghe kenmong ngoh, tüopa numan me-o ngohtüoh.

⁶I Kahwang lepu me ngohyahpoi; Kahwang phei jakih ngohpuwa tükke anglak wongpong she yeteih;

⁷hüpoi yoi nying nyingke ükengne menge, rha kih menge kahta ne menge puh.

⁸Hüyange pümheita me kahta kih menge, yoi nying nyingke innyaiye, lilak, hüke tangpem me lilak nehoi nyingme yah.

⁹Tüojingne Kahwange I yeonge yonge tam, hüyange min üshei tangte ütahpa min Ite pha;

¹⁰tüowe Jesu min me wangdang me ngohpalan hüyange kahtoknyu me ngohpalan hüyange kahtok ümongme ngohpu üsheiye yatuhshinge ümme khümlak jingne;

¹¹hüyange Üpa Kahwangte müktishiwa phawe, Jesu Khrista Youngwanpa ngohnang she yee üsheiye janlak.

¹²Tüokhei ü-mongkenpalan, hangke numan-e hipak phe me ngao jainang, tao om wante shaha yeje, hüpoi sha-a tao yenangwante-o ünyei sheyong she jainang, numan-e ninne nyamme, yoi yinyepu sho ne lingtüoh;

¹³hangjingne aowe yoi monghah-e linge tamlak jingne numante mongetamlak hüyange linglak moini ngaitam nang, tüopa Kahwange numan me toi lingnang.

¹⁴Pa ye-i-pe yejema-a yemoppe toi üshei lingtüoh;

¹⁵hüke numan me ümeng yenangpe hüyange jaoshe i ye hüyange mong tingkha-akpu Kahwang halan ne menglak jingne, komkeihpu hüyange jakem kempu jin yo me numan-e üyin ngaowa kahtoknyu me shanha üteeke numan wangngai ütahte ngaitam tüoh.

¹⁶Üyin ngao mongjüonge jontüoh; tüokaiye tao Khrista nyih me numan jingne otapu oklak jingne, hüke tao jajang jawe yephet, yejema-a jajang jawe yeshang.

¹⁷Hüyange üne-o numan ütinglakpu dopu hüyange shaoshanpu tangme tao toidopu phama-a, tao mongmei nang hüyange numan üshei phei mongong nang.

¹⁸Hüyange hüke numan-o mongmei tüoh, hüyange ü-phei mongong tüoh.

¹⁹Numan yatuhshao shingwante tao mongmeilak jingne, numan tangte Timothy mamshe shonlak she Youngwanpa Jesu me taowe mongnang.

²⁰Hangjingne ü-phei I kihpu, numan yatuhshao jeng ütingme teih nyüolak ao-o yenang.

²¹Hangjingne iman üsheiye Jesu Khrista jeng yeyampe yoite meipu shaha yamnang.

²²Hüpoi naha jawe hangke yoipa shaoshan nang, hüke pungao ümei jaalun tamlak jingne Iye ü-phei shaoshan, she numan-e Timothy jeng saki shingnang.

²³Tüokhei ü-jeng hangke nanglak, tüopa taowe shingpu phei jamshe I numan tangte lanshe shonlak she taowe monghüm nang;

²⁴hüyange tao-o ü-nying nyingke mamshe peikülak she taowe Youngwanpa me ütinglak nang.

²⁵Hüpoi, ü-jeiheinao hüyange üpheipu kengphet, ü wongpong numan shongshonpa hüyange shaoshanpa, Epaphroditus, numan tangte shonlak wongpong she taowe teih.

²⁶Hangjingne I dak-e ngohpu she numan-e jaipu jingne, Iye numan üsheite leihuwe teih, hüyange yeonge shange ngohyangki.

²⁷Ütingme I lilakkih dak-e ngoh, hüpoi Kahwange Ite shüpshe; hüyange Ite shaha yeje, hüpoi mongmeng tokte mongmeng taowe ye-ngelak jingne, üne-o Iye üte-o shüpshe.

²⁸Tüokhei numan-e I nishe ngeye mongmeilak jingne, hüyange ümongmeng shü-pelak jingne, taowe I yeonge shonhuwe shonyangki.

²⁹Tüokhei Youngwanpa me mongmei sheiye I yahtüoh, hüyange tüokihpu kahtate iyesheyah;

³⁰hangjingne üjingne numan-e jampu hangheye yewang tüopa phatamlak jingne yoi üyin wengtuh me ange, Khrista toi jingne I pali she yang.