Read Konyak Naga PHILIPPI 3 Bible Online

PHILIPPI 3 - Konyak Naga bible

PHILIPPI 3

¹Ükümne, ü-jeiheinaolan, Youngwanpa me mongong tüoh. Taowe tüopa ngao jamuh numan tangte nyanlak jingne taowe ütingme ye-eang, hüpoi tüopa-a numan jingne kentingne tampu.

²Kuihalan jingne kentingyah, ümeng lingpalan jingne kentingyah, meiwetpalan jingne kentingyah.

³Hangjingne teman-a ütingpa me shokhüppalan, aoyinne Kahwangte Yaha me khümnang, hüyange Khrista Jesu me müktishiwa nang, hüyange mei me monghümpu ye-angtam.

⁴Tüoyangpoi taowa meime monghümnang she ima-a, monghümne ok, ülao ütam-e meime monghümpu oklak she teihma-a, taowe ünyei oklak;

⁵tao Israel jat Benjamin nokphong mepu, Hebrew yo me Hebrew ne puh, nyihtet shepu me shokhüp; ngaokhüm yeme tao pharisee;

⁶lahnyikpu yeme bumeinokte shangne tampu kahta; hüyange ngaokhüm me ngohpu khakshupu yeme ümeng yenangpe nge.

⁷Hüpoi taowe hangheyin küw tüopu ngoh; Khrista jingne mahpu she taowe itnang.

⁸Üne-o Ü-Youngwanpa Khrista Jesu shingpu shemeipupa jingne üshei mahpu she taowe ütingme itnang. Hangjingne I jingne toi üshei mah-e tao shang, hüyange taowe Khrista küw tüolak jingne tüolan-a winpu mak she teih;

⁹hüyange Ime tüolak jingne, üjing khakshupupa hanghe ngaokhüm mepu ngohnang, tüopa yeje, hüpoi hanghe Khrista te ütinglakpu kaiye, Kahwang mepu khakshupupa tüopa-a ütinglakpu me hei ngohnang;

¹⁰taowe I hüyange I yange yepu ünganwong shinglak, hüyange I shangpu tei tamlak, I lipu me I kih menge,

¹¹tao-o lipu mepu yange yelak she monghüm nang.

¹²Taowe sha-a tüopa nge she yeje, yejema-a tao wangpu she yeje, hüpoi hanghe jingne tao Khrista Jesuwe phowe ngoh tüopa taowe üshao ngoiye okya shi she jangnang.

¹³Jeiheinaolan, taowe ü-nying nyingke tüopa shaaji ngoiteki she yeteih; hüpoi ülamja taowe lingnang; hüke lintepu jeng pemeiyange, sheshaoye me hanghe ngoh tüolan kem yüolak jingne ngangnang.

¹⁴Khrista Jesu me Kahwange ütangyete nyikpu okpu hünghao teihjing ngoilak taowe jangnang.

¹⁵Tüokhei teman hangshin wangngoipu ngoh, tüopa kenmong muh ngohhah, hüyange numan-e ülamja me kenmong yoi yoine ngohma-a, tüopa-o Kahwange numante ütahte ngaitam phalak.

¹⁶Hüpoi teman-e hanghe ngoiye ngoiteki, tüopa ngaokenge muh teman kemhah.

¹⁷Jeiheinaolan, numan jamshe ü-kon yahpalanne ngohtüoh; numante leppu ja ne toman ngohnang hüyange aoyinne toman kih kemnang iman konyah tüoh.

¹⁸Hangjingne Khrista tangpem wepalankih maapuwe kemnang she taowe numante yelakpe i, hüyange shaa-o taowe mükphi phei inang.

¹⁹Imanjing üküm-a mahlakpa. Imanjing Kahwang-a seanyu, hüyange iman yoi wüotüolak pate müktishiwa nang, kahtoknyu toinante iman kenmong angnang.

²⁰Hüpoi teman nyupuh wangdang me ngohnang, hüyange üne-o tüome Yintampupa ja, hüke Youngwanpa Jesu Khrista jingne teman-e tannang,

²¹Iye hanghe lingpu kaiye üshei yoi phangme angpu ok, tüopa lingpuke Iye teman ye-ok-yeshangpu püm-a leijeiye yoi müktishiwapu pümke üla ne lingetamlak.