Read Konyak Naga PHILIPPI 4 Bible Online

PHILIPPI 4 - Konyak Naga bible

PHILIPPI 4

¹Tüokhei, kenpu hüyange teih-e ngohpu jeiheinaolan. Ü-mongmei hüyange ahngpa shaoshaoh, ü-jeiheinaolan, Youngwanpa me mongjüonge yongtüoh.

²Taowe Euodia hei Sentikhe (Syntyche) Youngwanpa me nyaheinao ja ne mengtüoh she hengnang.

³Eihyang ü-phei ütingme peitüp ja me paipu, numan-e tüolan shekolante jamtüoh she taowe numante tongnang, hangjingne iman-e ü-phei hüyange Klement hüyange ü-phei jamme toilingpu ülaolan, aoyin min üyin laitep me nyanne ngohnang, iman phei tüolan shekowe pungao ümei me toiling.

⁴Jinte Youngwanpa me mongong tüoh; nishe taowe iphaning mongong tüoh!

⁵Numan nünne okpu kahta üsheite shingne tamtüoh, Youngwanpa ü-o me ngohnang.

⁶Hanghe me-o mong tahpai, hüpoi üshei me yoppu hüyange tongpu hüyange minyongpu phei numan-e tongpuwa Kahwangte shingne tamtüoh.

⁷Hüyange chingmei Kahwang hangheye shingeokpu üshei kaine tamnang, tüowe Khrista Jesu me numan mongjang hüyange kenmong yomme ngohlak.

⁸Ükümne, jeiheinaolan, hangheyin ngaoting ngoh, hangheyin wangshüm hüolakne ngoh, hangheyin tingpu ngoh, hangheyin jaoshe-i-ye ngoh, hangheyin kenlakpa ngoh, hanghe jengme pungao ümei ngoh, ümei ütam ngohma-a, hüyange yihlune wangpu ütam ngohma-a, tüolan jeng teihtüoyah.

⁹Hanghe numan-e ü-mepu shing hüyange yah hüyange jai hüyange ngeyangki, tüolan lingtüoh; hüyange chingmei Kahwang numan phei ngohlak.

¹⁰Hüpoi sha-a ükümne numan-e üjeng teihtüopu hipak lep iye peiyangki she, taowe Youngwanpa me yeonge mongong nang; tüoyangpoi ütingme numane-o jinte tao teih-e ngoh, hüpoi numan-e üte paolak hipak yetüo.

¹¹Toinanpu jeng taowe ngaopu ne yeje, hangjingne hanghe yatuhshao me tao ngohlakei, tüopa me monghahpu ngohlak taowe janyangki.

¹²Hangke wongpongne menge ngohlak tüopa taowe shing, hüyange hangke yeonge nangyange ngohlak tüopa-o taowe shing. Sheminlamphe me hüyange toi üshei me, maawe ngohlak-o hüyange seanyaowe ngohlak-o, yeonge nange ngohlak hüyange toinanne ngohlak-o, tüopa lopu ngao taowe shingteki.

¹³Aowe tao wongnangne tamnang I me taowe üshei lingpu oklak.

¹⁴Tüoyangpoi numan-e ü-shaoshi phei jamtüoh me numan jingne shemeilak.

¹⁵Hüyange üne-o Pungao Ümei ükongwang me, aope tao Macedonia mepu yan, numan tokte kaiye ülao bumeinok aote-o dopu phapu hüyange yahpume ü-phei yejam she, numan Philippi lanne shing.

¹⁶Hangjingne tao Thessalonica me ngohwante-o ja hei ni me ü-wongpong numan-e shon.

¹⁷Taowe hünghao jingne yampu yeje, hüpoi numan min me jaalunpu ülick jingne taowe yamnang.

¹⁸Taowe khakwange ümee tüoyangki, hüyange wangman-e ngohnangki. Taowe numan mepu üpe wünge pepu; Kahwange monghahpu, numan mepu peipu yahne wangpu dopu, Epaphroditus mepu yahpu, üme maawe ngohnang.

¹⁹Hüyange ü-Kahwange Khrista Jesu me I me nangpu phei phinne numan wongpong üshei yahphalak.

²⁰Sha-a teman Üpa Kahwangte jinte üküm yenangpu müktishiwa tüoh. Amen.

²¹Khrista Jesu me üjaolan lilite salam itüoh. Ü-phei ngohpu jeiheinao lanne numante salam shonnang.

²²Üjaolan üsheiye hüyange ünyeine Kaisar nok me ngohpalanne, numante salam shonnang.

²³Jesu Khrista shüpshe numan yaha phei ngohtüoh.