Read Konyak Naga KOLOSSI 2 Bible Online

KOLOSSI 2 - Konyak Naga bible

KOLOSSI 2

¹Hangjingne numan jingne taowe hangke yeonge hok, tüopa taowe numante shingne tamhu nangki, hüyange Laodikia me ngohpu kahtalan jingne, hüyange hangshinne ü-sheta mannge,

²iman mongjang me hengpu maawe tamlak jingne hüyange iman jamshe teikenlak jingne hüyange ütingpa teishingpuwe toinyu nanha me wange tamlak jingne taowe lingnang. Hüyange tüokaiye iman Kahwangpa kahnyingwüngha shinglak, hüke Khrista;

³I me konjong hüyange shinge manpu toinyu üshei küppelowe angnang.

⁴Lowetampu ngaomeiye ao te-o numan loweyetamlak jingne taowe hatüo inang.

⁵Hangjingne tao meime ye-om yahpoi, yaha me numan phei ngohnang, hüyange mongong puphei numan meiye ngohpu hüyange Khrista me numan ütinglakpu mongjüonge ngenangki.

⁶Tüokhei numan-e hangke Youngwanpa Khrista Jesu yah, hüke I me üya yuwe,

⁷hüyange yafün linge, numante nyüopu ütinglakpu me mongne tamme, minyong phapume wangmanne I me kemtüoh.

⁸Ütam-e I konheingao shingemanpu hüyange lowelampu jajang japuwe, hüyange kahdeiyengha pungao wanglamke hüyange kahtoknyu shinge manpu üwangpa ngaolan, hanghe Khristake yeje, tüolanne numan rha ne menge woiye yeteitamlak jingne kentingyah.

⁹Hangjingne Ime Honyong ütingpa üshei wangngoiye püm noshepu ngohnang;

¹⁰hüyange ao ütahpa hüyange wongphei üshei tangme üshang, I me numan wangngoine tamnang.

¹¹Yak ye-ompe shokhüppu kaiye, Khrista shokhüppu me mei püm-a winpu kaiye, Ime numan shokhüp;

¹²hüyange baptipu me numan I phei mu, hüyange üne-o baptipu me lipu mepu I yange yene tampu Kahwange lingpu me ütinglakpu kaiye numan Iphei yang yenetam.

¹³Hüyange numan ünu me hüyange numan mei shoyekhüppu me liye ngohpu numan Iye I phei jamshe üyin ne mengtam; Iye temante teman ünu üshei winyangki;

¹⁴hüyange teman phei tüi-e yakke nyanpu ngaokeng hanghepa ngoh, hatüo Iye phutte winne tangpem me takke yahteiteki.

¹⁵Hüyange ükengnyulan hüyange wong pheipulan nyieye yah, tüolan tangme okpupa ne menge Iye tüolan ütahte ngaiye hüoteki.

¹⁶Tüokhei hahpu jeyah, yingpu jeyah, mo nyih jeyah, lela jeyah, Sabbath nyih jeyah, aote-o numan ngao phünne tahtam.

¹⁷Tüolan khongkümpuwa peine ngohpulan yashüm hei ngohnang; hüpoi ütingpa-a Khrista jing.

¹⁸Numan jajang japu mei tetoimongjang phei otamaohe hüyange wongpong yenangpute I kenmong kaiye ngaipu, himang ngepu me I yafün yongyange wangdang shongmokpalante khümpulan,

¹⁹hüyange üshangte mongjüonge yejonpu ao te-o yaowelene tahtam; ao me püm nopu, uhyingpu hüyange ja ne teishinne hüyange üyung üphak jongpu phei jongnang tüopa-a Kahwang mepu.

²⁰Numan Khrista phei li hüyange kahtoknyu wanglam lampu yahalan phei yanpheima-a, hüma-a hangne kahtoknyu sheikih-e numan nyoipu shi? Hangne wanglamlante numan phünphapu!

²¹“Tahjon, Tahjüpnyüo, Tahlet.”

²²Tüokihpu wanglam me numan-e hangne kahta ngaokeng hüyange nyüopuke, hüyange kahtoknyu me numan üyin ngohnangpu kih numan nying nyingke tüolan phangme nyaipu shi?

²³Yoi khümhupu khümpu hüyange innenyaipu hüyange püm shangne tampu, tüolanne konjong ja leye ngenang, hüpoi mei yejaoyeshapu hango yetük oklak.