Read Konyak Naga KOLOSSI 3 Bible Online

KOLOSSI 3 - Konyak Naga bible

KOLOSSI 3

¹Shaaji numan Khrista phei yange ye she ima-a, hüma-a Kahwang yakjah yeme, ümeken me Khrista shotte ngohnang, ütang yeme ngohpu toilan yamtüoh.

²Kahtoknyu me ngohpu toinante yeje, ütang yeme ngohpu toinan me numan kenmong angtüoh.

³Hangjingne numan li, hüyange numan üyin Khrista phei Kahwang me lowe angnang.

⁴Khrista ao ütahte ngailakei, hüwante numan-o I phei müktishiwa phei ütahte ngailak.

⁵Tüokhei kahtoknyu me ngohpu numan ümükja, hüke nuweshakpu yejaoyeshapu, ünushangpu, ünu lahnyikpu, hüyange waupu, hanghe moungte khümpu ngohnang, tüolan khongkümpu numan-e toitamtüoh.

⁶Tüolan jingne ngao yejaipu halan tangte Kahwang mongshih ngaipu peinang.

⁷Hipak ja me aope numan tüolan me üyin ngoh, numan-o tüolan me kem.

⁸Hüpoi sha-a üne-o numan-e tüolan khongkümpu, hüke mongshih, mongshih ngaipu, nupu, phoipu, hüyange jumepu wüolak ngaopu wintüoh.

⁹Jawe japhei ngaoleih tah i, hangjingne numan-e kahta ülangpa toiphei I wanglam winyangki;

¹⁰hüyange ao kahta üla, yoi linge ngaipupa lepukih wangngoipu juteih yete üla linge ngohnang, I yahyangki.

¹¹Tüome Greeklan hüyange Jehudilan, shokhüppu, hüyange shoyekhüppu, Barbarlan, Scythialan, rha, bumei, tüolan pa me shaaji hang yoi yoi-o yenang; hüpoi Khrista üshei, hüyange üsheime ngohnang.

¹²Tüokhei Kahwang jingne leyangpukih üjao hüyange kenpupa, shüpsheye teihpu mong, yayengtoi, üjoine mengpu, innenyaipu, hüyange nünne okpu, tüolan yahtüoh.

¹³Kahta ütam-e ütam phei tüi-e ümeng phane ngohma-a, numan-e jawe japhei laolü-ünge nün okke ümeng teiwintüoh. Youngwanpawe hangke numan ümeng win, hüke numane-o jontüoh.

¹⁴Hüyange tüolan üshei tangme kenpu, hanghe wangngoipu teishinpu ngohnang, tüopa yahtüoh.

¹⁵Hüyange Khrista chingmei hanghe tangte numan-o püm ja me nyik, tüopa numan mongjang me ahngne tamtüoh, hüyange numan-e minyonge ngohtüoh.

¹⁶Toinyu kih-e Khrista ngaowa numan mongjang me angne tamtüoh. Konjong üshei me jawe japhei tüowelaihem hüyange üjao hem hüyange yaha woipeipu hem me hüowe hengne tamtüoh, hüyange numan mongjang me minyonge Kahwangte loktüoh.

¹⁷Hüyange ngaome jeyah, toime jeyah, numan-e hanghe linglakei, Youngwanpa Jesu min me üshei lingtüoh, hüyange I kaiye Üpa Kahwangte minyongpu phatüoh.

¹⁸Shekonyulan, Youngwanpa me hangke wangngoi, hüke yoi netanpa phangme ngohyah.

¹⁹Netanpalan, yoi shekonyulan te kentüoh hüyange imante tahnyüo tahnyüm.

²⁰Nahalan, sheminlam pheme numan-e yoi nyupalan te ngao jaiyah, hangjingne tüopawe Youngwanpa monghahne tamnang.

²¹Payonglan, numan hayimlante tahtee, teetüohma-a iman lahwang mahlak.

²²Rhapalan, numan-e aoyin numan jingne kahtoknyu nokpulan ngohnang, shemin lamphe me iman ngao jaitüoh; kahta mongmei ne tampalankih, iman-e leiwante iman mongmeiye tamlak jingne shaha yeje, hüpoi Youngwanpate nyampu phei lanta-akpu mong phei lingtüoh.

²³Numan-e hanghe linglakei kahtate yeje, hüpoi Youngwanpa te mongjang üshei phawe lingtüoh;

²⁴numan-e shangyangpu ümee ne Youngwanpa mepu mothlei tüolak she shingyah; numan-e Youngwanpa Khrista shaoshan nang.

²⁵Hangjingne aowe yeshupu toi linglakei Iye lingpu yeshupu toishao muh leih tüolak, hüyange tüome kahta sheta leipu yenang.