Read Konyak Naga KOLOSSI 4 Bible Online

KOLOSSI 4 - Konyak Naga bible

KOLOSSI 4

¹Nokpulan, wangdang me numane-o Nokpu ja ngohnang she shinge, numan rhapalante ngaoting me hüyange meiye jontüoh.

²Yoppu me mongjüonge yelakpe ngohtüoh, hüyange tüome minyong phapalan shaome kenting mongtapu ngohyah;

³hüyange toman jingne-o yoptüoh, hüyange Kahwange I ngao jingne tomante taküp ja eppetampu oklak jingne, Khrista kahnyingwüngha ngao, hanghepa jingne tao-o shapume ngoh tüopa ngaolak;

⁴hüyange taowe hangke ngaolak hüke taowe tüopa ütahte ngaitamlak jingne yoptüoh.

⁵Hipak ümei shakke, yemengpalan shaome kentamong tingpu phei kemyah.

⁶Kahta lilite numan-e hangke janlak wongpong tüopa numan-e shinglak jingne, numan ngao jinte yahhujakke hümme wüngpuke wüngne tamme ngohyah.

⁷Youngwanpa me yayengpu jeiheinao hüyange monghümpu shaoshanpa hüyange shaoshanpa ü-taopa Taikhikas-e (Tychicus) numante ü-jeng üshei shingne tamphalak.

⁸Tüopa jingne muh numan-e toman yatuhshao shinglak jingne, hüyange Iye numan mongjang toloimei tamlak jingne, taowe I numan tangte shonteki.

⁹Monghümpu hüyange kenpu jeiheinao Onesimus, ao numan yo me ja ngohnang, I phei shonnang. Tüome lingpu üshei iman-e numante shingne tamphalak.

¹⁰Aristarkhas ao ü-phei küpnokme ngoh, hüyange Barnabas ülishepa Mark ao jeng numan-e ngaokeng me shupu tüo, I numan tangte peima-a yahtüoh.

¹¹Hüyange Jesu, ao te Justus she nyik, aoyin shokhüppalan ngohnang, iman-e numante salam shonnang. Kahwang ahngching jingne toilingpu ü-taopalan hüyange ümong toloimeilak kahta tüolan hei ngohnang.

¹²Jesu Khrista shaoshanpa, numan yo me ja Epaphraswe numante salam phanang. Kahwange mongpu üshei me numan wangngoipu hüyange ütingpa ne menge yonge oklak jingne, Iye yoppu me jinte numan jingne ngangnangki.

¹³Hüyange numan hüyange Laodikia hüyange Hierapolis me ngohpalan jingne Iye toi yeonge linge nyainang she taowe I saki phanang.

¹⁴Mongkenpa soihüng jonpa Luk, hüyange Demas niye numante salam phanang.

¹⁵Laodikia hei Nyampha me ngohpu jeiheinao lante, hüyange iman nokme ngohpu bumeinoklante salam phatüoh.

¹⁶Tüopa nyanpulai numan yo me iyangphei me, Laodikialan bumeinok te-o ine tamtüoh, hüyange Laodikia mepu peipu nyanpulai numan yome-o itüoh.

¹⁷Hüyange Arkhipas te itüoh, “Nange Youngwanpa me hanghe shaoshanpu toi yah tüopa wangngoi tamlak jingne ngangtüoh.”

¹⁸Ü-salam, tao Paul yoi yakke nyannang. Üte shapu teihtüoyah. Numan phei shüpshe ngohtüoh.