Read Konyak Naga 1 THESSALONI 1 Bible Online

1 THESSALONI 1 - Konyak Naga bible

1 THESSALONI 1

¹Paul, Silvanus, hüyange Timothy, Üpa Kahwang hüyange Youngwanpa Jesu Khrista me Thessaloni bumeinok tangte: Numan phei shüpshe hüyange chingmei ngohtüoh.

²Toman yoppu me numan yelakpe teihtüowe, toman-e numan üshei jingne jinte Kahwangte minyongpu phanang.

³Numan ütinglakpu mepu ngaipu toishao hüyange kenpu mepu ngaipu lingputoi, hüyange teman Youngwanpa Jesu Khrista te monghümpu mepu ngaipu nün-okpu, teman üpa Kahwang shaome yelakpe teih tüonangki.

⁴Hangjingne Kahwange kenpu jeiheinaolan, numan Iye lepu toman-e shinge ngohnang;

⁵Hangjingne toman pungao ümei numan tangte ngao me shaha yeje, hüpoi ünganwong me, hüyange Yaha Üjao me, hüyange yeonge ütingtingha me pei. Hangjingne numan jingne numan yekaome toman hangke kahta ne ngoh tüopa numane-o shinge ngohnang.

⁶Hüyange numan shangepongpu üyongme Yaha Üjaowe phapu mongmeiye ngaowa yah-e, toman hüyange Youngwanpa yahpa ne meng.

⁷Tüokaiye Macedonia hei Akhaia me mengpalan üsheite numan leppu ja ne meng.

⁸Hangjingne numan mepu Youngwanpa ngao Macedonia hei Akhaia me shaha pah taipu yeje, hüpoi Kahwang yekaome numan ütinglakpu kahtok üshei yete taiteki. Tüokhei toman-e ngaolak hang wongpongne-o yeje.

⁹Hangjingne toman jeng numan tangte toman hangke pei, hüyange numan-e üyin hüyange ütingpa Kahwang shaoshanlak hangke moung mepu Kahwang tangte lep,

¹⁰hüyange I Ha, ao Iye lipu mepu yange yene tam, tüopa Jesu aowe ngoilakne ngohpu mongshih ngaipu mepu teman yinnang, I wangdang mepu mannyu manyu tanlak, iman-e iman nying nyingke ngaolan phanang.