Read Konyak Naga 1 THESSALONI 2 Bible Online

1 THESSALONI 2 - Konyak Naga bible

1 THESSALONI 2

¹Hangjingne, jeiheinaolan, numan tangte toman peipu jajang japune yemengpe ngoh she numan-e numan nying nyingke shing;

²hüpoi numan-e shingpuke üwangne Philippi me toman-e shangpu hüyange ye-i-yeshepu ngeyang phei me, toman-e shangpu üyongme Kahwang Pungao ümei numante ngaolak, teman Kahwang me wong ngohnang.

³Hangjingne toman-e hengpu, yeshupe yejema-a yejaoyeshapu me, yejema-a lowelampu me yeje;

⁴hüpoi toman me pungao ümei kitamlak Kahwange hangke toman monghah-e nge, hüke toman-e ngaonang; kahta monghah tamlak jingne yeje, hüpoi Kahwang, aowe teman mongjang toknang, I monghah tamlak jingne ngaonang.

⁵Hangjingne numan-e shingpuke aope-o toman-e ngaoleih me minyong ngaopu ye-nge; yejema-a yah-hupu büanglak yejonpe ngohshe Kahwang saki ngohnang!

⁶Yejema-a toman Khrista lampulan ne mengpu jingne, numante kange ngohhah shepu, numan mepu jeyah, ülao mepu jeyah, kahta mepu müktishiwapu yeyam.

⁷Hüpoi düam uhyinge tümpu nyuwe yoiha te paotükpuke numan yo me toman innyaiye ngohyangki.

⁸Tüokhei numante lahnyikke kenpu jingne, toman-e numante Kahwang pungao ümei shaha yeje, hüpoi toman yoi üyin nehoi phalak monghah-e ngoh, hangjingne toman-e numante meiyange ken.

⁹Hangjingne jeiheinaolan, toman-e numan aote-o hangki yekitamlak jingne, wangnyak wangngai toilinge toman-e numante Kahwang pungao ümei konnyüowe ngoh she numan-e toman yeonge ngange lingpu hüyange towe nyaipu teihtüo nang.

¹⁰Numan mengpalan yekaome toman-e toman nying nyingke hangke üjao hüyange ngaoting phei hüyange ümeng yenangpe jon, numan hüyange Kahwango saki ngoh nang.

¹¹Hangjingne numan-e shingnang, Ipawe yoihate jonpuke, toman-e numan lilite hengetam hüyange numan wongnangne tam hüyange saki phawe ngoh,

¹²Kahwang shaome wangngoipu üyin ngohlak jingne, aowe numan I yoi ahngching hüyange müktishiwa tangte nyik.

¹³Hüyange aope toman mepu numan-e jaipu ngao, hüke Kahwang ngao yah, numan-e tüopa kahta ngaoke yeje, hüpoi Kahwang ngaoke yah; tüopa jingne toman-e üne-o yelakpe Kahwang min yongnang; ütingme tüopa-a Kahwang ngao ngohnang, hüyange tüopa üne-o numan mengpalante lingnang.

¹⁴Hangjingne, jeiheinaolan, Khrista Jesu me Judea me ngohpu Kahwang bumeinoklan konnyüopalanne numan meng. Hangjingne iman-e Jehudilan mepu shangpu tüopukih, numane-o yoi kahtok kahtalan mepu shangpu jamuh nge;

¹⁵tüolan Jehudilanne Youngwanpa Jesu hüyange hipalan moini toi; hüyange toman jangetei hüyange Kahwang mong hahne yetam, hüyange kahta üshei phei tokteipu khongne mengnang;

¹⁶hüyange yinhulanne yinyepu yetüotamlak jingne iman tangte ngaone tomante yetam. Hüyange tüolan Jehudilanne iman ünu wangngoilak jingne jinte lingnang; hüpoi Kahwang mongshih ngaipu iman tangme yeonge peiteki.

¹⁷Hüpoi jeiheinaolan, mongme teihpu me yeje, hüpoi ompu me numan mepu toman hipak üjingha yanwante, numan sheta ngelak jingne lahnyikpu üyong phei toman-e ünyei ngang.

¹⁸Hangjingne toman-e, hüke tao, Paul-e ja me shaha yeje numan tangte yeonge peihuwe ngoh, hüpoi satanne toman tien.

¹⁹Hangjingne toman monghümpu, yejema-a mongmei yejema-a müktishiwa shaoshaoh hanghe! Teman Youngwanpa Jesu yuwante, tüopa-a numan yejelak a?

²⁰Hangjingne numan-a toman müktishiwa hüyange toman mongmei.