Read Konyak Naga 1 THESSALONI 5 Bible Online

1 THESSALONI 5 - Konyak Naga bible

1 THESSALONI 5

¹Sha-a, jeiheinaolan, ju hei hipak jeng numan tangte nyanlak wongpongne yeje.

²Hangjingne wangnyak me kuhpa peipukih Youngwanpa nyih peikülak she numan nying nyingke yeonge meiye shing.

³Aope kahtalanne “Chingmei hüyange yinpu okteki,” she ilakei, hüwante shekolanne moipaiwante shangpukih mokhshe iman tangte mahlak peilak; hüyange iman yeyinlak.

⁴Hüpoi, jeiheinaolan, kuhpa kih tüopa nyih peiye numan yüolakne, numan wangnyak me yenang.

⁵Hangjingne numan üshei wangngai hayim hüyange nyihning hayimlan ngohnang. Teman yaning yejema-a wangnyak jing yeje.

⁶Tüokhei teman-e ülaolankih, teman-e tahshihah, hüpoi teman-e lüowe kentingmongta puphei ngohhah.

⁷Hangjingne aoyinne shinang iman-e yaning me shinang, hüyange aoyin yuwe joknang iman yaning me joknang.

⁸Hüpoi teman nyihning jingne menge, teman-e kenpu hüyange ütinglakpu mongkhüp yahyange hüyange yinyelak monghümpu yan shaoshaoh jingne kenting mongtapu phei ngohhah.

⁹Hangjingne Kahwange teman mongshih ngaitamlak jingne nyingpu yeje, hüpoi teman Youngwanpa Jesu Khrista kaiye yinyepu tüolak jingne,

¹⁰hüyange teman yange ngohyahpoi yejema-a shiye ngohyah poi, teman Iphei jamshe üyin ngohlak jingne I teman jingne li.

¹¹Tüokhei numan-e lingpuke, jawe jate teihengtüoh, hüyange wongnangne tamtüoh.

¹²Hüpoi toman-e numante tongnang, jeiheinaolan, numan yo me aowe ling, hüyange Youngwanpa me numan tangme ngohnang, hüyange numan kentingne tamnang, iman shinglak jingne,

¹³hüyange imante iman toi jingne kenpu me yeonge yonge iyeshetüoh. Numan yo me chingmei ngohtüoh.

¹⁴Hüyange, jeiheinaolan, ünyong yete kempalan kentingne tamtüoh, mongpaipalan wongnangne tamtüoh, wong yenangpalan paotüoh, üshei phei nün oktüoh she toman-e numante hengnang.

¹⁵Aowe-o ümeng nanleiye ümeng yephalak kentingyah; hüpoi jawe jate hüyange üshei phei, hanghe shemeipupa tüopa jinte yamtüoh.

¹⁶Jinte mongong tüoh,

¹⁷yelakpe yoptüoh.

¹⁸Shemin lamphe me minyong phatüoh, hangjingne numan jingne Khrista Jesu me tüopa Kahwange mongpu ngohnang.

¹⁹Yaha Üjao tahmei;

²⁰hikon nyüopu ye-i-yeshepe tahling;

²¹hüpoi üshei tokke leitüoh; hanghe shemeipupa tüktüoh;

²²ümeng wanglam lili mepu yanne ngohtüoh.

²³Hüyange chingmei Kahwange yoi nying nyingke numan khongkümpu jaowe tamtüoh; hüyange teman Youngwanpa Jesu Khrista yuwante, numan yaha hei üyin yaha, hüyange püm ümeng yenangpe khongkümpu yinne angtüoh.

²⁴Aowe numan nyik I monghümlakpa, hüyange Iye tüopa linglak.

²⁵Jeiheinaolan, toman jingne yoppha.

²⁶Üjao om teihüppu phei jeiheinaolan üsheite salam phatüoh.

²⁷Tüopa nyanpulai jeiheinaolan üshei shaome itüoh she, Youngwanpa me taowe numante kange inang.

²⁸Teman Youngwanpa Jesu Khrista shüpshe numan phei ngohtüoh.