Read Konyak Naga JOSHUA 1 Bible Online

JOSHUA 1 - Konyak Naga bible

JOSHUA 1

¹Youngwanpa shaoshanpa Mosa liphei me, Mosa shaoshanpa Nun üha Joshua te Youngwanpawe i:

²“Ü-shaoshanpa Mosa liteki; tüokhei sha-a tümyah, Taowe iman, hüke Israel hayim te phapu kahmükte nang hüyange Israel kahtalan khongkümpu Jordan yengyin kaiye taitüoh.

³Taowe Mosate ngaopu kih-e, nange yalok pu yekao khongkümpu numante Taowe phalakei.

⁴Phaonyu jong hüyange tüopa Lebanon mepu yengnyu üyong, Euphrates yengyin ngoiye, Hitlan kahmük khongkümpu hüyange wanghe nyipjing yengching üyong ngoiye nang yikeng ne ngohlak.

⁵Joshua, nang üyin ngohpu mongme nangte naowe oklak kahta ja nehoi yengohlak. Tao Mosa phei omme ngohyangpu kih-e nang phei omme ngohlak. Tao nang phei ngohlak; nang aope-o winne yetüohlak.

⁶“Wongnangyah hüyange monghahyah; hangjingne Taowe iman jing pajeiyong lante phalak jingne jiengjeppu kahtok nange tüopa kahtalante mothlei tamlak.

⁷Ü-shaoshanpa Mosawe nangte ngaowetampu ngaokhüm khongkümpu jonne linglak ne wong nangyah, hüyange monghah yange wong nangyah. Nang ümekente tailakei taiyapoi okpu ngelak ne tüopa ngaokhüm mepu yakjah yete yejema-a yaknya yete tahlüp.

⁸Tüopa ngaokhüm laitep-a nang ju mepu tahyantam, hüpoi tüome nyanne ngohpu khongkümpu khakshuwe jonlak ne nange wangnyak wangngai yeshaipe hatüote mongphalak; hatüowe nange nang ngohtaipu üyin lamnyu me moiman tüolak hüyange nange okpu ümei ngelak.

⁹Taowe nangte mongyonge hüyange monghah-e teihlak jingne ngaoyangpu she teih tüoyah! Nyam-e tahteih yejema-a mong shoiye tahteih, hangjingne nang ümekente tailakei taiyapoi, Tao Youngwanpa nang phei jam-e ngohlak.”

¹⁰Hüwante Joshuawe kahtalan woipalante ngao phawe i,

¹¹“Lakjing te ngoiye kahtalante ngaokhüm phawe itüoh, ‘Numan nying nyingke hahying tümyah, hangjingne Youngwanpa numan Kahwange numante phalakpa kahtok yahlak nyih lüm mongme numan tüopa Jordan kaiye tailak.’ ”

¹²Hüyange Reubenlan, hüyange Gadlan, hüyange Manasseh nokphong tangkhüw pute Joshuawe i,

¹³“‘Young-wanpa shaoshanpa Mosawe numante Youngwanpawe numante toloimei phanang hüyange tüopa kahmük numante phalak, she ngaowe tampu ngao teih tüoyah.’

¹⁴Jordan jayekao me Mosawe numante phapu kahtok me numan shekonyulan, numan hashih nahalan, hüyange numan-e tampu yinmoklan ngohlak; hüpoi wehok jingne yonglah pheipu numan wetaipalan, iman pheipu Israellante jamlak jingne shaoyete kaiye tailak;

¹⁵hüyange Youngwanpa numan Kahwange imante phapu kahtok-a iman-e manyah manyah wongnange ngangpalan khongküm numan jeiheinaolan sheshao me yang hei ngou jongyange tailak hüyange imante jamlak tüophei me nakshih Youngwanpa shaoshanpa Mosawe Jordan kaiyange wanghe ongjing yeme ngohpu numante phapu kahmük yete leih yelak hüyange hatüo yahlak.”

¹⁶Hüyange iman-e Joshua te jan-e i, “Nange tomante ngaowe tampu khongkümpu toman-e linglak hüyange nange toman ümekente shonlakei toman tailak!

¹⁷Toman-e Mosate khongkümpu jingne ngao jaipuke nangte-o toman-e ngao jailak; Mosa phei ompu ke nang phei hei Youngwanpa nang Kahwang omme ngohtüoh!

¹⁸Aohipawe nang ngaokhüm kaiye yonglakei hüyange nange ngaowe tampu khongkümpu me ngao yejailakei I li ne tamlak; wong hei nangyah hüyange monghah yah!”