Read Konyak Naga JOSHUA 10 Bible Online

JOSHUA 10 - Konyak Naga bible

JOSHUA 10

¹Aope Jerusalem ahngpa Adonizedek-e hangke Joshuawe Jerikho hüyange tüopa ahngpate lingpuke, Iye Ai hüyange tüomepu ahngpate linge Ai chinghah hüyange hatüo khongküm mahne tam, hüyange hangke Gibeon me ngohpalan Israellan phei chingmei ling hüyange iman yo me meiye ngohpu jai.

²Hüwante iman-e yeonge nyam, hangjingne Gibeon-a ahngjong chingnyu yo me ja ne menge, chingnyu üyong ne ngoh, hüyange tüopa-a Ai phei sheyong hüyange tüome ngohpu kahta khongküm nyahpong shaha ngohyangki.

³Tüokhei Jerusalem ahngpa Adonizedek Hebron ahngpa Hohamte, hüyange Jarmuth ahngpa Piramte, hüyange Lachish ahngpa Japhiate, hüyange Eglon ahngpa Debirte ngoiye i,

⁴“Ü-phei omkei hüyange üte jampha, hüyange teman-e Gibeon mah tamhah; hangjingne Iye Joshua hüyange Israel hayimlan phei chingmei lingteki.”

⁵Tüokhei Amor ahngpalan nga; Jerusalem ahngpa, Hebron ahngpa, Jarmuth ahngpa, Lachish ahngpa, Eglon ahngpa, iman khongkümpu jamme jem hüyange iman hüyange iman nyahponglan khongkümpu nangyange Gibeon te shümlak jingne jem hüyange tüopa phei tüi-e hok.

⁶Hüyange Gibeon kahtalan-e Gilgal lakjing me ngohpu Joshuate ngoiye i, “Nang shaoshanpalan mepu nang yak tükke tah ang; toman tangte mamshe peikei hüyange toman yinpha hüyange tomante paopha; hangjingne phaotang me ngohpu Amor ahngpalan khongkümpu toman phei hoklak jingne jamshe jemme ngohnang.”

⁷Tüokhei Joshuawe I hüyange naomei ütahlan khongkümpu hüyange nyahponglan khongküm I phei Gilgal mepu ong.

⁸Hüyange Youngwanpawe Joshuate i, “Nange imante nyam-e tahteih, hangjingne Taowe nang yakme iman phünne phateki; iman yo me nang sheshao me yong oklakpa kahta ja nehoi yenanglak.”

⁹Tüokhei Joshua hüyange I jing nyahponglan wangnyak phapan Gilgal mepu Gibeon te ngoine yayong; hüyange iman-e Amorlan mokhne tamme shümme pei.

¹⁰Hüyange Youngwanpawe Israellan sheshao me iman mahtam hüyange Gibeon me Iye iman üngang toi, hüyange Beth-Horon lamte ongpute ngoiye jange teiye Azekah hüyange Makkedah ngoiye iman toi.

¹¹Hüyange hatüo ngai, Israel lan sheshao mepu iman phette taiye iman Beth-Horon te laiye ngohwante Azekah me imante Youngwanpawe yilong üyong wang mepu yeine tam hüyange iman toi; Israel hayimlan-e yanglow phei iman toipu phei-a yilonge toitampu sheyong she ngoh yangki.

¹²Youngwanpawe Israellante Amorlan phünne phapu nyih me Joshuawe Youngwanpate ngao hüyange Iye Israel hayimlan-e ngeye i: “Wanghe, nang Gibeon tangme yepope yongtüoh; Linnyu, nang Aijalon Kahjee me yepope yongtüoh.”

¹³Hüyange wangheye yepope yong, hüyange linnyuwe tan, hüke jat khongkümpuwe yoi wepate phuh manhah manhah she ngoh. Hatüo Jashar Laitep me nyanne yenangpu a? Hüyange wanghe-a wang hotan me tan, hüyange nyihlao hipaknyu ja nanjing yetape tan.

¹⁴Hüyange Youngwanpawe kahta jawe tongpu ngaowüng jaipuke üshongpe yejema-a, tüopa phei me tüopa nyih kih-e yenangpe ngoh; hangjingne Youngwanpawe Israel jingne hok!

¹⁵Hüyange Joshua hüyange Israellan khongkümpu I phei Gilgal me lakjing te leihye.

¹⁶Tüoyangpoi tüolan ahngpa nga phette tai, hüyange Makkedah me iman nying nyingke longsa ja me lo.

¹⁷Ütamjawe iman ngohpu nge, hüyange Joshuate hüke i, “Ahngpalan nga-a Makkedah me longsa ja me lowe ngoh nangki.”

¹⁸Hüyange Joshuawe i, “Longsa taten me long üyonge küptamtüoh, hüyange iman yomlak jingne tüopa shongme kahta tüotüoh;

¹⁹hüpoi numan-e tüome tanne tah ngoh, numan wepalan jange taitüoh, hüyange iman yo me ükümpate ngoiye toitüoh; hüyange iman yoi chingnyulante ongne tahtam; hangjingne Youngwanpa numan Kahwange iman numan yak me phateki.”

²⁰Hüyange iman manmahtam manmah tam she hüyange iman yo me lüowe taiye ngohpalan yinne ngohpu chingnyute manongpe, aope Joshua hüyange Israel hayimlan-e iman üngang toipu üküm ngoiye pei,

²¹hüwante Makkedah mepu lakjingte Joshua tangte chingmei me leihye; aowe-o Israel hayim phei tüi-e yee powe ngaopu ye-okpe ngaiyangki.

²²Hüwante Joshuawe i, “Longsa taten eptüoh, hüyange longsa mepu tüolan ahngpa nga ü-tangte woi peikei.”

²³Hüyange ngaowe tampuke iman-e ling, hüyange tüolan ahngpa nga, Jerusalem ahngpa, Hebron ahngpa, Jarmuth ahngpa, Lachish ahngpa, hüyange Eglon ahngpa longsa mepu yah ngaiye I tangte woipei.

²⁴Hüyange aope iman-e tüolan ahngpa Joshua tangte woipei, Joshuawe Israel kahta khongkümpu nyik, hüyange Iphei taipu wetaipalan yo me woipalante Iye i, “Owe wenkei, hüyange tüolan ahngpa üng me numan ya loktüoh.” Hüyange iman owe wen, hüyange iman ya iman üng tangme lok.

²⁵Hüyange Joshuawe imante i, “Nyam-e tahteih, yejema-a mong shoiye tahta, wongnang yah hüyange menghayah; hangjingne numan wepalan aoyin phei numan hoklakei, Youngwanpawe khongkümpute hüke linglak.”

²⁶Hüyange üten ja ngohyange, Joshuawe iman shaoshine tam hüyange iman li ne tam, hüyange iman pee nga me jhot; hüyange ünpongte ngoiye iman pee me jhotyange ang;

²⁷hüpoi wanghe nyippu hipak me Joshuawe ngaopha hüyange iman-e pee mepu iman yah hüyange hanghe longsa me iman nying nyingke lo tüopa longsa temuh hinne tüoh hüyange longsa taten me long üyong yahpuwe küppe ang hüyange hatüowa tenyih te ngoiye ngohnang.

²⁸Hüyange tüonyih-a Joshuawe Makkedah yah, hüyange tüopa chingnyu hüyange tüome ngohpu ahngpa yanglow phei toi; Iye tüolan-a hüyange tüome ngohpu kahta khongkümpu ao-o towe yetüohpe jaosheye mahne tam; hüyange Iye Jerikho ahngpate jonpuke Makkedah ahngpate jon.

²⁹Tüophei me, Joshua hüyange I jing nyahponglan I phei Makkedah mepu yayonge Libnah ngoi, hüyange Libnah chinghah.

³⁰Hüyange Youngwanpawe tüopa-o hüyange tüome ngohpu ahngpa Israel yak me phünne pha, hüyange Iye chingnyu hüyange tüome ngohpu kahta khongküm yanglow phei toi; Iye tüome kahta ao-o towe yetüoh; Iye Jerikho ahngpate jonpuke tüopa ahngpate ling.

³¹Hüyange Joshua hei Israellan khongküm I phei Libnah mepu yayonge Lachish ngoi hüyange tüopate neikon, hüyange shüm.

³²Hüyange Youngwanpawe Israellan yak me Lachish phünne pha hüyange nishepu nyih me Iye hatüo yah; hüyange Libnah te lingpu khongküm Iye tüopa hüyange tüome ngohpu kahta khongküm yanglow phei mah ne tam.

³³Hüwante Gezer ahngpa Horam me Lachishte jamlak jingne pei, hüyange kahta ao-o towe yetüohpe Joshuawe I hüyange I kahtalan-o mahtam.

³⁴Ünepa me, Joshua hüyange I jing nyahponglan khongküm I phei Lachish mepu yayong Eglon ngoi, hüyange tüopate neikon yange shüm.

³⁵Tüonyih muh iman-e hatüo mahne tam, hüyange tüome ngohpu kahta khongküm Iye mahtam; Iye Lachish te lingpuke tüome ngohpu kahta jaosheye mahne tam.

³⁶Hüyange Joshua hüyange I jing nyahponglan I phei Eglon mepu Hebron kahtangte ong; hüyange iman-e hatüo te shüm.

³⁷Hüyange iman-e hatüo yah, hüyange Iye Eglonte lingpu khongküm kih-e tüome ngohpu ahngpa hüyange tüopa chingnyu khongküm hüyange kahta khongküm Iye ao-o towe yetüohpe yanglow-e mahne tam; üne-o Iye tüopa hüyange tüome ngohpu kahta ja nehoi yetope khongküm jaosheye mahtam.

³⁸Hüyange Joshua hüyange I jing nyahponglan I phei Debirte leihye, hüyange tüopate neikonne shüm.

³⁹Hüyange tüome ngohpu ahngpa hüyange tüopa chingnyu khongküm Iye yah; hüyange iman-e tüolan-a yanglow-e mahtam; hüyange ao-o towe yetüohpe tüome ngohpu kahta jaosheye mahtam; hüyange Iye Hebron me jonpuke, Debir hei tüopa ahngpate jon, hüyange Libnah hüyange tüomepu ahngpate hüke jon.

⁴⁰Hüke kahmük khongküm, kahtang nyoi, hüyange heongyekao, hüyange kahjee hei kahtang kahmük, hüyange tüolan ahngpa khongkümpu Joshuawe naowe tam; Israel Kahwang Youngwanpawe ngaowe tampuke Iye ao-o towe yetüoh, hüpoi üyin ngohpu khongküm jaosheye mahtam.

⁴¹Hüyange Joshuawe Kadesh Barnea mepu Gaza, Goshen kahmük khongküm hüyange Gibeon ngoiye iman mahtam.

⁴²Hüyange tüolan ahngpa khongküm hüyange iman kahtok lanshe Joshuawe ünja mongme yahküm; hangjingne Israel Kahwang Youngwanpawe Israel jingne hok.

⁴³Tüophei me Joshua hüyange I jing nyahponglan khongküm I phei Gilgal lakjing te leihye.