Read Konyak Naga JOSHUA 11 Bible Online

JOSHUA 11 - Konyak Naga bible

JOSHUA 11

¹Aope Hazor ahngpa Jabin-e tüopa jeng jai, Madon ahngpa Jobab, hüyange Shimron ahngpa hüyange Achshaph ahngpa,

²hüyange apyekao me ngohpu phaotang kahmük me ngohpu ahngpalan hüyange Kinnereth heyekao Arabah me ngohpu hüyange tüopa kahjee me ngohpu hüyange henyipye Dor kahtang ümüoh me ngohpalan,

³hüyange heong hei henyip yeme ngohpu Kananlan hüyange Amorlan hüyange Hitlan hüyange Perizzlan, hüyange phaotang kahmük me Jebuslan, hüyange Mizpah kahmük me Hermon phang me Hivlan tangte Iye ngaolan shon.

⁴Hüyange iman wetaipalan kahta üngang hüke yengching nah mepu pheih kih-e, koipong hüyange tongtoi üngang phei jemmeta.

⁵Tüolan ahngpalan khongkümpu ja ne sheiyange iman-e Israellan phei hoklak jingne Merom yeng me lakjing ling.

⁶Hüyange Youngwanpawe Joshuate i, “Iman peipute nyam-e tahteih, hangjingne ngainyih tüopa hipak me khongkümpu toilak üne Taowe iman phünne phalak; nange iman koiponglan ya faiye tamlak hüyange iman tongtoilan vünne jakke tamlak.”

⁷Tüokhei Joshua hüyange hoke-okpu kahta khongkümpu I phei Meron yeng ü-o me iman phei hokne mokhshe pei, hüyange imante yak yu.

⁸Hüyange Youngwanpawe iman-a Israellan yak me phün-e pha, hüyange Israellan-e imante tük, hüyange iman Sidon chingnyu hüyange Misrephoth Maim hüyange Mizpah heongye kahjee ngoiye iman jange tai; iman-e ja nehoi towe yetüohpe toi.

⁹Hüyange Youngwanpawe ngaowe tampuke Joshuawe imante jon; Iye iman koiponglan ya faiye tam, hüyange iman tongtoilan vünne jakke tam.

¹⁰Hüyange tüo hipak me Joshua leihye-e Hazor te shüm, hüyange tüopa ahngpa yanglow phei toi, hangjingne tüopa shao me tüolan ahngpa chingnyu khongkümpu tangme Hazor nokpune wong shenangpupa ne ngoh.

¹¹Tüome ngohpu khongküm iman-e yanglow phei toi, üyin ja nehoi towe yetüoh, hüyange Hazor-a vün phei jakke win.

¹²Youngwanpa shaoshanpa Mosawe ngaoyangpu kih-e Joshuawe tüolan ahngpalan hei iman chingnyulan üshei yanglow phei mah ne tam-e lanshe menge win.

¹³Hüpoi Joshuawe jakke tampu Hazor tokte kaiye, kahtang me ngohpu chingnyulan-a Israel lan-e yejaktam.

¹⁴Hüyange tüolan chingnyu me mahtampu toinan khongküm hüyange tampu yinmok Israel hayimlan-e chinghahpu toinan kih-e iman jingne yah; hüpoi kahtalan-a ao-o üyin yetüohpe khongkümpu yanglow-e toi.

¹⁵Youngwanpawe I shaoshanpa Mosate ngaowe tampuke, Mosawe Joshuate ngaowetam, hüyange Joshuawe hüke ling; Youngwanpawe Mosate ngaowe tampu khongküm Iye yelingpe yetüoh.

¹⁶Tüokhei, kahmük khongküm, phaotang kahmük hüyange heongyekao khongküm, hüyange Goshen kahmük khongküm, kahjee nyoi, hüyange Arabah kahmük, hüyange Israellan kahtang hüyange kahjee nyoi khongküm Joshuawe yah;

¹⁷hüke Halak kahtang mepu tapu Seir ngoiye, üne-o Hermon kahtang phang me Lebanon kahjee me Baalgad ngoiye hüyange tüolan ahngpa khongküm Iye om; hüyange imante shüt hüyange iman li ne tam.

¹⁸Tüolan ahngpa khongkümpu phei Joshuawe hipak nangjange hok.

¹⁹Gibeon me ngohpu Hivlan tokte kaiye chingnyu jawe nehoi Israel hayimlan phei chingmei yeling, khongkümpu wehok me okke om.

²⁰Hangjingne Youngwanpawe Mosate ngaowe tampuke, imante shüpshe yengohlak, hüpoi Iye iman mahtamlak hüyange Iye iman jaosheye mahtamlak she wehok me Israellan phei tüi-e hokne peilak Youngwanpawe iman mongjang wanne tam.

²¹Hüyange tüopa hipak me Joshua pei, hüyange kahtang nyoi mepu, Hebron mepu, Debir mepu, Anab mepu, Judah phaotang kahmük khongküm mepu, hüyange Israel phaotang kahmük khongküm mepu, Joshuawe kheyongpu Anakimlan mahnetam; iman chingnyulan phei jam-e iman jaosheye mahtam.

²²Israel hayim kahmük me Anakimlan ao-o towe yenangpe ngoh; hüke Gaza, Gath, hüyange Ashdod me hei ütam towe ngoh yangki.

²³Hüke Youngwanpawe Mosate ngaowe tampu khongküm kih-e, Joshuawe kahmük khongkümpu yah, hüyange iman jat tampu ityange, Joshuawe Israellante kahmük-a mothlei ne pha. Hüyange kahmük me wehok mepu toloimeipu tüo.