Read Konyak Naga JOSHUA 13 Bible Online

JOSHUA 13 - Konyak Naga bible

JOSHUA 13

¹Sha-a Joshua lwngmei hüyange wu ne wonge ngohyangki; hüyange Youngwanpawe Ite i, “Nang lwngmei hüyange wu ne wongyapoi, üne-o kahmük nangjange omlak ngohnang.

²Towe ngohpu kahmük-a hatüo ngohnang: Philistia hüyange Gershurilan kahmük khongkümpu;

³Egypt yekao me ngohpu Shihor mepu Kananlan she ipu apyekao Ekron yikeng ngoiye; Philistialan nokpu nga Gazalan, Ashdodlan, Ashkelonlan, Gathlan hüyange Ekronlan; üne-o apyekao me ngohpu Avvimlan omme;

⁴heyekao me Kananlan kahmük khongkümpu hüyange Sidonlan jing Mearah, Amorlan yikeng Aphek ngoiye;

⁵hüyange heong yekao me Gebah hei Lebanonlan kahmük Hermon phangme Baalgad mepu Hamoth lamkeng manngoi manngoi;

⁶phaotang kahta ngohpu kahmük khongküm Lebanon mepu Misrephoth Maim ngoiye, hüke Sidonlan khongküm omme, Israel hayim sheshao mepu Taowe iman jange winlak; Taowe nangte ngaowe tampuke, nange tüopa hei Israel lante mothlei tamlak jingne khakshuwe tamtüoh.

⁷Tüokhei sha-a nokphong tu hüyange Manasseh nokphong tangkhüwpute tüopa kahmük-a mothlei ne tamphatüoh.”

⁸Reuben nokphong hüyange Gad nokphong hüyange ülao Manasseh nokphong tangkhüw lan-e Youngwanpa shaoshanpa Mosawe imante phapu kahtok tüo; hatüowa Jordan yeng heong yekao me ngoh yangki,

⁹Arnon kahjee ünah yeme ngohpu Aroer mepu, hüyange kahjee üwo me ngohpu chingnyu phei, hüyange Medeba kahtok üjee khongküm Dibon ngoiye;

¹⁰hüyange Amorlan ahngpa Sihon aowe Heshbon mepu Ammon hayim yikeng ngoiye wanglam lam, iman chingnyu khongküm;

¹¹hüyange Gilead hüyange Geshur hei Maacathlan yikeng hüyange Hermon kahtang khongkümpu Bashan küm-e Salecah ngoiye;

¹²hüyange Bashan me Og ahngpa aowe Ashtaroth hüyange Edrei (Rephaim me towe tüohpu) me wanglam lam; I ahngching khongküm puphei phapu kih-e, hangjingne Mosawe tüolan-a chinghah hüyange iman jange tei.

¹³Tüoyangpoi Israel hayimlan-e Geshur hüyange Maacathlan yejangtei, hüyange tenyih ngoiye Geshur hei Maacath Israel yo me ngohnang.

¹⁴Levi nokphong te hei Iye mothlei ne yepha, Mosawe imante ngaowe tampuke Israel Kahwang Youngwanpa te wümjong me toidopu jakke tampu mepu meitam iman mothlei ne menglak.

¹⁵Mosawe iman nokphong ityange Reuben hayim nokphong te iman mothlei ne kahmük tam-e pha.

¹⁶Tüokhei iman yikeng Arnon kahjee üjeng me ngohpu Aroer mepu kahjee üwo me ngohpu chingnyu Medeba kahtok üjee khongküm;

¹⁷Heshbon hüyange tüopa kahjee kahmük me ngohpu chingnyu khongküm; Dibon, Bamothbaal, Beth-Baalmeon;

¹⁸Jahaz, Kedemoth, Mephaath;

¹⁹Kiriathaim, Sibmah hüyange kahnyüo mepu kahjee Zerethshahar;

²⁰Bethpeor hei Pisgah kahnyüo, hüyange Beth Jeshimoth,

²¹hatüowa kahjee nyoi chingnyu khongküm, hüyange Amorlan ahngpa Sihon ahngching khongküm aowe Heshbon me wanglam lam hüyange aowe Mosawe Medianlan woipa Evi hei Rekem, Zur hei Hur hüyange Reba kahtok me ngohpu Sihon üphang me woipalan phei okke tam.

²²Hüyange üne-o toipalan yo me towe ngohpu Beo üha Balam yepahipa Israel hayimlan-e yanglow phei toi.

²³Hüyange Reuben hayim yikeng Jordan hüyange tüopa neikonpu me ngohyangki. Tüome ngohpu chingnyu hüyange chingha lan noksa ityange Reuben hayimlan-e mothleipu ngoh yangki.

²⁴Mosawe Gad hayim, nokphonglante iman noksa tokyange kahmük mothlei ütam pha.

²⁵Hüyange iman yikeng Jazer, hüyange Gilead chingnyu khongküm hüyange Ammon hayim kahmük tangkhüw ja, Rabbah me ngohpu Aroer ngoiye;

²⁶hüyange Heshbon mepu Ramath-Mizpeh ngoiye, hüyange Betonim hüyange Mahanaim mepu Debir yikeng ngoiye;

²⁷hüyange kahjee nyoi me Beth Haram, hüyange Bethnimrah hei Succoth, hüyange Zaphon, hüyange Heshbon ahngpa Sihon chingnyu towe ngohpu Jordan hüyange tüopa neikonpu heongye Jordan kaiyange taiye Chinnereth yengching (Galilee yengching) üküm ngoiye ngohyangki.

²⁸Tüome ngohpu chingnyu chingha lan-a iman noksa ityange Gad hayim-e mothleipu ngohyangki.

²⁹Mosawe Manasseh nokphong tangkhüwte mothlei ne kahtok ütam pha, hatüowa Manasseh tangkhüw nokphong hayimlan jingne iman noksa ityange ngoh yangki.

³⁰Hüyange iman yikeng Mahanaim mepu Bashan ahngpa Og ahngching khongküm hüyange Bashan me ngohpu Jair chingnyu dewok, tüolan khongküm;

³¹hüyange Gilead tangkhüw ja, hüyange Bashan me ngohpu Og ahngpa ahngching Ashtaroth hüyange Edrei chingnyulan Manasseh üha Machir jingne, Machir hayim tangkhüw ja jingne iman noksa ityange ngohyangki.

³²Jordan kaiyange Jerikho heong yekao Moab kahjee me, Mosawe tampu mothleipalan-a tüolan ngohnang.

³³Hüpoi Mosawe Levi nokphong mothlei ne yepha; Iye imante ngaowe tampuke Youngwanpa Israel Kahwang-a iman mothlei ngohnang.