Read Konyak Naga JOSHUA 14 Bible Online

JOSHUA 14 - Konyak Naga bible

JOSHUA 14

¹Tüolan-a Eleazar ngengpa, hüyange Nun üha Joshua hüyange Israel hayim nokphong yo me nyahtap jeiyongpalan-e Kanan kahtok me Israel hayimlante tampu mothleilan ngohnang.

²Youngwanpawe Mosa yak kaiye, phongyeng yange jat tu phei me tangkhüw jingne ngaowe tampuke iman-a tüolan ngohnang.

³Hangjingne nokphong ni phei me tangkhüw mothlei-a Mosawe Jordan kaiye taiye phayangki; hüpoi iman yo me Levi nokphong tepa-a mothleipu yepha.

⁴Hangjingne Joseph hayim nokphong ni ngoh yangki; Manasseh hüyange Ephraim; hüyange iman tampu yinmok hahnyoi hüyange iman-e hahlak kahmük phei iman ngohlak chingnyulan tokte Iye kahmük me Levi nokphong te meitam hango yepha.

⁵Youngwanpawe Mosate ngaowe tampuke, Israel hayimlan-e ling; hüyange iman-e kahmük-a tam.

⁶Hüwante Gilgal me Judah hayim Joshua tangte pei, hüyange Kenizzlan Jephunneh üha Caleb-e Ite i, “Kadesh Barnea me nang hüyange ü-jeng Youngwanpawe Kahwang kahta Mosa te ngaopu nange shinge ngohnang.

⁷Youngwanpa shaoshanpa Mosawe kahmük kuhshüklak jingne Kadesh Barnea mepu tao shonwante, tao wangpeng deli lwngmei ne ngoh yangki; hüyange ümong jang me ngohpu kih-e Ite ngaolan yahye.

⁸Tüoyangpoi, ü-phei taipu jeihei naolan-e kahtalan mong khaine tam, hüpoi Youngwanpa Ü-Kahwang pheite ü-mongjang phünne pha-e woi.

⁹Hüyange Mosawe jiengjeppu ja tüonyih hüke i, ‘Ütingme nang ya lokjing kahmük nang hüyange nang hayim jingne jinte mothleine ngohlak, hangjingne Youngwanpa Ü-Kahwang pheite nang mongjang phün pha-e woi.’

¹⁰Hüyange sha-a leitüoh, Israel wanwüng jengme kemwante, Youngwanpawe Mosate tüopa ngao ngaopu hipak mepu, Iye ngaopuke Youngwanpawe tüolan wangpeng deli me nga tao üyin me tüoh, hüyange leihu, tenyih tao wangpeng detet me nga lwngmei ngoh nang.

¹¹Mosawe tao shonpu nyih mepu kih, tenyihpu nyih ngoiye, tao wong nange ngohnang; üshongpe ngohpu wong kih muh hoklak hüyange taitai ong ong she ngohlak shaa-o üme wong ngoh nang.

¹²Tüokhei sha-a Youngwanpawe tüopa nyih me ngaopuke, tüopa kahtang kahmük hatüo üte yahkei; hangjingne tüo me Anakimlan hüyange chingnyu üyonglan jantpenyuwe tukyange hangke ngoh, hatüo nange tüopa nyih me jaiteki; Youngwanpawe ngaopuke I ü-phei omlak hüyange taowe iman jange teipu oklak.”

¹³Hüyange Joshuawe I moimantam hüyange Iye Jephunneh üha Calebte Hebron mothleilak jingne pha.

¹⁴Tüokhei tenyih ngoiye, Hebron Kenizzlan Jephunneh üha Caleb mothlei ne meng; hangjingne Israel Kahwang Youngwanpa pheite phünne phawe I woi.

¹⁵Sha-a Arba Anakimlan yo me sheyong pupa kahta ne mengpu jingne üshongpe Hebron min-a Kiriath Arba ngoh yangki. Hüyange kahmük-a wehok mepu toloi meipu ok. (tüo).