Read Konyak Naga JOSHUA 17 Bible Online

JOSHUA 17 - Konyak Naga bible

JOSHUA 17

¹Jordan henyip yekao kahmük Manasseh jat jingne hatüo tam; hangjingne I Joseph üwangpa ha ne ngohyangki. Manasseh üwangpa ha Machir, Gilead üpa Iye Jordan heongye Gilead hei Bashan yah, hangjingne I naomei ja ne ngoh.

²Hüyange iman noksa ityange towe ngohpu Manasseh hayim jingne, Abiezer, Helek Asriel Shekhem, Hepher, hüyange Shemida hayimlan jingne mothlei tam; iman noksalan me ityange tüolan-a Joseph üha Manasseh hayim netanlan ngohnang.

³Hüpoi Manasseh hayim Machir üha Gilead hayim Hepher üha Zelophehad me netan hayim yenang, yhala shaha ngoh yangki; hüyange I mepu yhalalan min tüolan ngohnang: Mahlah, Noah, Hoglah, Milcah, hüyange Tirzah.

⁴Hüyange iman-e Eleazer ngengpa, hüyange Nun üha Joshua hüyange woipalan tangte pei-e i, “Toman jeiheinaolan yo me jamshe tomante mothlei phalak Youngwanpawe Mosate ngaopha yangki.” Tüokhei Youngwanpawe ngaowe tampuke iman üpa jeiheinao lan yo me Iye imante mothlei pha.

⁵Hüke Jordan kai taiyange ngohpu Bashan hüyange Gilead kahmük tokte kaiye meitam pen Manasseh tangte tai;

⁶hangjingne Manasseh hayim yo me I yhalalan mothlei ja ngoh yangki, hüyange Gilead kahtok-a towe ngohpu Manasseh hayim jingne meng.

⁷Hüyange Manasseh yikeng Asher mepu Shekhem shaome Michmethath hüyange hatüo yakjah ye me taiye Entappu-ahlan ngohpu nyoi ngoiye ngoh yangki.

⁸Tappuah kahtok-a Manasseh jing, hüpoi Manasseh yikeng me ngohpu Tappuah chinga Ephraim hayimlan jing ngohnang.

⁹Tüophei me yikenga Kanah shaoha ngoiye ta. Tüome ngohpu chingnyulan heyekao shaoha me Manasseh chingnyulan yo me ngohpuwa Ephraim jing. Tüophei me Manasseh yikeng shaoha apyekaote ong, hüyange Mediterranean yengching ngoiye ngoh;

¹⁰heyekao Ephraim jing, hüyange apyekao Manasseh jingne ngoh, hüyange Mediterranean yengching iman henyip yikeng ne ngoh; hüyange apyekao Asher hüyange heyekao Issakhar ngoiye iman tai.

¹¹Hüyange Issakhar hüyange Asher me Beth-shean hüyange tüomepu chingshaolan, Ibleam hüyange tüomepu chingshaolan, Dorlan hüyange tüomepu chingshaolan, Endorlan hüyange tüomepu chingshaolan, Taanachlan hüyange tüomepu chingshaolan, hüyange Megiddolan hüyange tüomepu chingshaolan, üne-o kahtang üshang lüm om-e Manasseh jing.

¹²Hüpoi Manasseh hayimlan-e tüolan chingnyu me ngohpu jange yetei ok; tüokhei Kananlan tüopa kahmük me yelakpe ngohhu.

¹³Hüpoi aope Israellan wongnange ngai, iman-e Kananlante toi üwan lingne tam hüyange iman jaosheye yewintam.

¹⁴Joseph nokphonge Joshuate i, “Youngwanpawe moimanpu kih-e toman kahta üngang ngohyange mothleilak jingne hanghe nange tampu ja hüyange meitam ja hei tomante phapu?”

¹⁵Hüyange Joshuawe imante jan-e i, “Numan kahta üngang ngohpune mengma-a, phaoyete ongtüoh hüyange tüome numan jingne Perizzlan hüyange Rephaimlan jing kahmük met tüoh, hangjingne Ephraim phaotang nyoi-a numan jingne yeonge jonghitlak.”

¹⁶Joseph huhayimlan-e jan-e i, “Phaotang nyoi-a toman jingne wangpu ne yeje, hüyange Beth-shean hüyange tüomepu chingnyulan hüyange Jezreel kahjee moini kahmük me ngohpu Kananlan yan tongtoilan phei ngohnang.”

¹⁷Hüwante Joshuawe Joseph nokphong Ephraim hüyange henyip Manasseh te i, “Numan kahta üngang ngohnang hüyange wong üyong ngohnang, numan meitam ja shingha yengohlak,

¹⁸hüpoi phaotang kahmük numan jingne ngohlak, hangjingne hatüo phao ne ngohyapoi numan-e hatüo metlak hüyange tüopa jaye üshok mepu jaye ngoiye numan jingne ngohlak; hangjingne iman wongnang yahpeyoi hüyange yan tongtoi ngohyapoi numan-e Kananlan jange winlak.”