Read Konyak Naga JOSHUA 2 Bible Online

JOSHUA 2 - Konyak Naga bible

JOSHUA 2

¹Hüyange Nun üha Joshuawe Shittim mepu kahta ni Kanan kahtokte lowe kuhshüklak jingne ngaokeng phawe, ünyei ne Jerikho chingnyu te leilak jingne shon. Aope imni chingnyute ngoi, Rahab she minpu üsho yüonyu nok me pümlak jingne pei-e tüome ngoh.

²Hüwante Jerikho ahngpate hüke i, “Leihuyah, teya tüo me Israel kahtalan ütam kahmükte kuhshüklak jingne pei ngohnang.”

³Hüwante Jerikho ahngpawe Rahab tangte shonne i, “Nang tangte peiye nenokte ongpu kahtalan-a woipeikei! Hangjingne iman-e kahmük khongkümpu kuhshüklak jingne peinang!”

⁴Hüpoi shekowe kahta ni-a woi inne imni-a lowe ang; hüyange yhawe hüke i, “Üting, kahtalan-a ü-tangte peiyangki, hüpoi iman ümeken mepu pei taowe yeshing;

⁵hüyange aope wangmange penyu küplak hipak ngoi, kahta ni-a taimah, iman ümpu ye te tai taowe yeshing; mamshe iman jange taitüoh, hangjingne numan-e imni kemyüo ei ja.”

⁶Hüpoi yhawe imni-a noktok me yhawe pengkhai vee ütüp üngang phinne angpu yo me lowe ang.

⁷Tüokhei kahtalan-e Jordan yeng pahnyoi ngoiye iman jange tai, hüyange aoyinne iman jange tai iman linpu phei jamshe penyu taküp küp.

⁸Hüyange kuhshükpa ni yaning shilak jingne mantüm shope ngohwante, Rahab noktok yete ong,

⁹hüyange yhawe imnite i, “Youngwanpawe numante tüopa kahmük phateki she taowe shingnang. Kahmük me ngohpu kahta lili numan jeng jaiyange nyam-e kokteiye ngohnang.

¹⁰Hangjingne numan Egypt mepu ngaiwante Youngwanpawe Ütak yengching numan sheshao me hangke eamah ne tam; hüyange Jordan kaiyange taiye ngohpu Amorlan ahngpa ni, Sihon hei Og, aoyin numan-e jaosheye mahtam, tüolante numan-e hanghe ling toman-e jai.

¹¹Hüyange toman-e tüopa jaiwante toman nyampuwe toman mongjang paimah; shaaji toman aome-o wongnangpu yaha towe yenang; hangjingne Youngwanpa numan Kahwang-a ütangye wang hüyange üphangye me kahtok ngohpu Kahwang ngohnang.

¹²Tüokhei sha-a taowe nangnite yayenge jonpuke nang niye üpa noksate yayeng phei jonpha, hüyange üte ütingpa yepinlakpa ja phalak jingne Youngwanpa min me üte jiengjeppha she taowe nangnite yoppe tongnang.

¹³Hüyange nangniye üpa hei ünyu, hüyange ü-jeiheinao hei nyaheinao üyin hüyange iman me nangpu khongkümpu, hüke toman üyin lihah shepu mepu yintam pha!”

¹⁴Hüyange kahta ni-e yhate i, “Toman üyin-a numan üyin jingne phalak! Hüke toman-e lingpu toishao hatüo nange aote-o yengaoma-a, aope Youngwanpawe tomante kahmük-a phalakei, toman-e nangte yayeng hüyange ngao tingpa me jonlak.”

¹⁵Rahab-a chingnyu jantpenyu phei neakke wepu nok me nyoi ngohyangki, tüokhei yhawe kahta ni-a tawo kaiye wu me jhotyange yu ne tamyangki.

¹⁶Hüyange yhawe imnite i, “Phaotang yekaote ongtüoh, ye-i-ma-a numante jangpalan-e numan jange yüopha lak. Tüoken me nyih lüm mongme iman leih manye manye lowe ngohtüoh. Tüophei me nakshih numan yoi lamnyu yam-e taipu meilak.”

¹⁷Kahta niye yhate i, “Tomante jiengjep ne tampu nange janpulan jengme toman-e püohpu hango yenanglak.

¹⁸Leihuyah, nange hüke lingtüoh, aope toman-e kahmük chinghahlak jingne peilakeih, tüopa wu ütak hanghepawe nange toman yinne taine tam, hatüo tawo me shayange angtüoh; hüyange nangpa, nangnyu nang jeiheinaolan, hüyange nangpa noksa khongkümpu nenokte nyik-e jemtüoh.

¹⁹Hüyange hatüo ngailak, aoyinne nenok tafün kaiye ngaiye chingyang kote taiye lilakei; I lipu ümenga Iye kilak. Hüyange tüopa jengme toman ümengne yengohlak; hüpoi aohipawe nenok me ngohpu ütamte yak hünglakei, I iy-a toman shangtang me ngohlak.

²⁰Tüoyangpoi toman toishao jeng nange ütamja te ngaowe tamyangpu ne mengma-a, hüwante nange tomante jiengjeppe janpu yetük okpu jeng me toman ümeng yenanglak.”

²¹Hüyange yhawe i, “Numan ngaoke ngohtam tüoh.” Hüyange yhawe iman shon-e teine tam, hüyange iman yayonge tai hüyange yhawe ütak wu-a tawo me shinyange ang.

²²Kuhshükpalan phaotang kahmükte ong hüyange lowe ngoh. Ahngpawe shonpu kahtalan-e nyih lüm mongme kah ükoye khongkümpu te yam, hüpoi iman-e imni yetüo; tüokhei iman Jerikhote leih yeyangki.

²³Tüophei me kuhshükpa ni phaotang yekao mepu leih ye, hüyange yengyin kaiyang phei me, Nun üha Joshua tangte leihye. Imniye hanghe yin ngaiyangki khongküm Ite i.

²⁴Hüyange imniye Joshuate i, “Ütingme Youngwanpawe kahmük khongkümpuwa teman yak me phünne phateki; üne-o tüotokte kaiye kahmük me nyoipu kahtalan khongkümpuwa teman shaote loishe nyam-e mahteiye ngoh nangki.”