Read Konyak Naga JOSHUA 20 Bible Online

JOSHUA 20 - Konyak Naga bible

JOSHUA 20

¹Hüyange Youngwanpawe Joshuate ngaowe i,

²“Israel kahtalante hüke itüoh, ‘Taowe numan phei Mosa kaiye ngaowe tampuke, lojing chingnyu letüoh;

³hümme nakshih kahta ütam-e püohpin-e yejema-a yeshingpe kahta ütam toiwante tüoken me lo oklak ne, numan jingne tüolan-a toiye tampupawe phuh hahlak mepu loching ne menglak.

⁴Toilangpa-a tüolan chingnyu ja ja pahite phette tailak hüyange chingnyu peten me yongyange I ngaolan tüopa chingnyu mepu woipalan na me wenne tamlak, hüyange iman-e I iman tangte chingnyute woi inlak hüyange Ite ngohlak nokja phawe iman phei ngohpu oklak.

⁵Hüpoi phuh hahhupu pawe Ite jange peima-a, hüwante iman-e kahta toipa-a I yak me phün-e yephalak, hangjingne üshongpe iman tei nupu yengoh, hüpoi yoi yupi yak pienne toi.

⁶Kahta toipa-a tüopa juwan me ütahpa ngengpa manli manli yejema-a ngao phünlak jingne I ükhong sheshao me manyong manyong, I tüopa chingnyu me ngohlak; tüophei me hei kahta toipa-a yoi chingnyute leihye-e yoi chingnyu hüyange yoi nokte yelak.’ ”

⁷Tüokhei Naphtali phaotang kahmük ngohpu Galilee me Kedesh, Ephraim phaotang kahmük me Shekhem, hüyange Judah phaotang kahmük me Kiriath Arba (Hebron) ülao ne tümme ang.

⁸Hüyange iman-e Jordan kaiyange Jerikho heongyekao me Reuben nokphong mepu phao kahjee me Bezer, hüyange Gad nokphong mepu Gilead me Ramoth, hüyange Manasseh nokphong mepu Bashan me Golan le.

⁹Israel kahtalan khongküm hüyange iman phei omme ngohpu yinpalan jingne leye angpu chingnyu lan-a tüolan ne ngoh yangki; tüokhei aoyinne kahta ütam pienne shaiye toilakei tüote tailak hüyange ükhong sheshao me I manyong manyong toine tampupa phuh hahlakpa yak me I yelitamlak.