Read Konyak Naga JOSHUA 22 Bible Online

JOSHUA 22 - Konyak Naga bible

JOSHUA 22

¹Hüwante Joshuawe Reubenlan, Gadlan, hüyange Manasseh nokphong tangkhüwlante nyik-e imante i,

²“Youngwanpa shaoshanpa Mosawe numante ngaowe tampu khongküm numan-e jon, hüyange taowe numante ngaowe tampu khongkümpu me numan-e ü-ngaowüng jai;

³tenyih te ngoiye tüolan nyih nangjangpu mongme Youngwanpa numan Kahwang ngaokhüm linge jonne numan-e numan jeihei naolan iman shaha ye-angtüoh.

⁴Hüyange sha-a Iye imante ipuke, Youngwanpa numan Kahwange numan jeiheinao te toloimei phateki; tüokhei Jordan kaiyange Youngwanpa shaoshanpa Mosawe numante phapu yoi kahmükte numan leih yetüoh.

⁵Hüpoi Youngwanpa numan Kahwangte kenlak Youngwanpa shaoshanpa Mosawe numante ngaowe tampu ngaokhüm mong phawe jontüoh. Hüyange nang mongjang üsheiye nang yaha üsheiye I shaoshanlak, Ite tük-e ngohlak, I ngaokhüm jonlak, I lamnyu khongkümpu me kemtüoh.”

⁶Hüke Joshuawe iman moimantam hüyange iman shonne ye; hüyange iman-e yoi nokte leihye.

⁷Sha-a Manasseh nokphong tangkhüw jate Mosawe Bashan me mothlei pha, hüpoi ülao tangkhüw te Joshuawe iman jeihei naolan yo me Jordan kaiyange henyip yekao pha. Tüopa tokte kaiye Joshuawe iman nyenokte shonwante iman moimantam,

⁸hüyange Iye imante i, “Moth üngang, tampu yinmok üngang, hon, khüm, shakphan yan, yan, hüyange nyemo üngang phei numan yoi nokte leihye nang; hüyange numan wepa mepu tüopu moth numan-e numan pheipu jeihei naolan phei teitamme yahtüoh.”

⁹Tüokhei Reubenlan, hüyange Gadlan hüyange Manasseh nokphong tangkhüw leihye-e, Mosa kaiye Youngwanpawe ngaowe tampuke, Kanan kahtok me ngohpu Shilo mepu ngaiye yoi pheipu Israel kahtalan mepu yanne yayong, hüyange iman-e yahlakpa Gilead kahmükte tai.

¹⁰Aope iman-e Kanan kahtok me ngohpu Jordan neikonpu kahmükte pei, Reubenlan hei Gadlan, hüyange Manasseh nokphong tangkhüwpu lan-e Jordan phei owe leilak müklei me yeonge yonge lahnyik lakpa ne wümjong ja ling.

¹¹Hüyange Israel kahtalan-e ngaolan hüke jai, “Leihuyah, Israel kahtalan jingne menglak Jordan neikonpu kahmük me Kanan kahtok sheshao yome Reubenlan hei Gadlan, hüyange Manasseh nokphong tangkhüw puwe wümjong ja lingteki.”

¹²Aope Israel kahtalan-e tüopa jai, Israel kahta ükhong khongkümpuwe iman phei tüi-e wehokne taiye Shiloh me jem.

¹³Hüyange Israel kahtalan-e Eleazar ngengpa üha Phinehas-Reuben hei Gad, hüyange Manasseh nokphong tangkhüw nokphonglan tangte Gilead kahtokte shon;

¹⁴Hüyange Iphei woipa pen Israel nokphong lili jingne noknyu nok mepu japong, hüyange iman-a Israellan jeiyongnok ne mengpulan shon.

¹⁵Iman-e Reubenlan hei Gadlan hüyange Manasseh nokphong tangkhüw tangte Gilead kahtokte peiye iman-e imante ngaowe i,

¹⁶“Hüke Youngwanpa ükhong khongkümpuwe inang, ‘Tenyih Youngwanpa phei tüi-e yonglak numan-e wümjong ja lingpu kaiye Youngwanpa phei te woi ngohpu kahtalan leihye ne hangne ünu hatüowa Israel Kahwang phei tüi-e ompu?

¹⁷Peor ünu hanghe mepu Youngwanpa ükhong tangme leam peiyapeih tenyih ngoiye teman yejao okpe ngohnang, hatüo teman jingne jamloi shoipu ne mengpu a?

¹⁸Hüyange tenyih numan Youngwanpa pheite woipu mepu leih yehu pu a? Hüyange hatüo ngohlak, tenyih numan-e Youngwanpa phei tüi-e yongpu ngeye, ngainyih Iye Israel ükhong khongkümpu tangme pahi mongshih ngailak.

¹⁹Hüpoi sha-a, numan meitam kahmük yejaope ngohma-a, hüma-a numan-e Youngwanpa meitam kahmük ümeken me Youngwanpa te khümlak nyenok ngohnang, tüoken te peikei hüyange toman yo me ngohtüoh, hüpoi Youngwanpa teman Kahwang wümjong tokte kaiye ülao wümjong ja lingpu kaiye numan-e Youngwanpa phei tüi-e, yejema-a toman phei tüi-e tahyong.

²⁰Zerah üha Achan-e phünne phayangpu toite ünu ompu kaiye Israel ükhong khongkümpu tangme mongshih ngaipu yejepu a? Hüyange I ünu jingne I shaha mahpu ne yeje!’ ”

²¹Hüwante Reubenlan, hei Gadlan hüyange Manasseh nokphonglan tangkhüw-e Israellan nokphong üshang lante jan-e i;

²²“Ütahpa-a Kahwang! I-a Youngwanpa! Ütahpa-a Kahwang! I-a Youngwanpa! Toman-e hatüo hangne ling, Iye shing hüyange Israelle-o tüopa shingne tamhu nangki! Tüopawe Youngwanpa phei tüi-e yongpu toishao ne mengma-a, hüyange Youngwanpa phei tüi-e ünu om ma-a, tenyih toman tahyin!

²³Youngwanpa pheite woipu mepu leihyelak, yejema-a tüome jakke dopu dolak, yejema-a hahying dopu, yejema-a tüopa tangme chingmei dopu ja dolak toman-e wümjong lingne ngohma-a hatüowa Youngwanpawe yoi nying nyingke phuh hahtüoh!

²⁴Yeje! Hüke ngaowe ngaipha ma she toman nyamteihpu jingne tüopa jeng ngoikülak hipak me numan hayimlan-e toman hayimlante ngaowe ilak, ‘Youngwanpa Israel Kahwang phei numan hanghe meitam ngohnang shi?

²⁵Hangjingne numan Reuben hayim hüyange Gad hayim numan hüyange toman nipa me Youngwanpawe Jordan yikeng ling, hüyange Youngwanpa me numan meitam yenang.’ Hüke iye numan hayimlan-e toman hayim Youngwanpa te nyampu mepu lakne tamlak.

²⁶Tüokhei toman-e i, ‘Kei teman-e wümjong ja tümhah, jakke dopu yejema-a toiye dolak jingne yeje;

²⁷hüpoi tüopawe numan hüyange toman nipa me hüyange teman phei me jinlan nipa me saki ja ngohlak, hüyange teman I sheshao me jakke dopuwe, hüyange toiye dopuwe, hüyange chingmei dopuwe Youngwanpa shaoshanlak; hüyange ngoikülak hipak me, numan hayimlan-e toman hayimlante, “Numan Youngwanpa me meitam yenang ja” she yengaolak.’

²⁸Tüokhei toman-e i, ‘Aope iman-e tomante yejema-a ngoikülak hipak me toman jinlante ngaolakei, hatüo hüke nanglak, teman pajeiyong lan-e lingpu wümjong leppute leitüoh; hatüo shaapa-a dolak jingne yejema-a toiye dopu jingne yeje, hüpoi numan hei toman nipa me saki ja hei ngohnang.’

²⁹Ite khümpu nyenok shaome ngohpu Youngwanpa teman Kahwang wümjong phei tüi-e, Youngwanpa phei tüi-e yehoklak yejema-a tenyih me peiye Youngwanpa pheite woipu mepu yelüplak jakke dopu jingne hahying dopu jingne, yejema-a toipu dopu jingne wümjong üla wetampu Kahwange tientüoh!”

³⁰Aope ngengpa Phinehas, ükhong tangme nokpulan pen, hüyange I phei ngohpu Israel üshang lan-e Reubenlan hüyange Gadlan hüyange Manasseh lan-e ngaopu ngao jai, iman mongte onge teih.

³¹Hüyange Eleazar ngengpa üha Phinehaswe Reubenlan, Gadlan, hüyange Manasseh lante i, “Sha-a toman-e shingteki, Youngwanpa teman phei ngohnang. Hangjingne numan-e Youngwanpa phei tüi-e ünu omme yongpu ne yeje, tüokhei Youngwanpawe shaoshi phalak mepu numan-e Israellan yinne tamteki.”

³²Tüophei me Eleazar ngengpa üha Phinehas hüyange Israel üshang lan-e Reuben hei Gadlan mepu, Gilead kahtok mepu ngaiye Israellan tangte Kanan kahtokte leihye, hüyange iman tangte nishe leihye-e ngaolan jai ne tam.

³³Hüyange tüopa toishao kaiye Israel hayim monghahpu phei lak hüyange Israel kahtalan-e Kahwang minyong, hüyange Reuben hei Gadlan ngohpu kahmük mengtamlak hüyange iman phei tüi-e wehokte tailak shaaji yengao.

³⁴Hüyange Reubenlan hüyange Gadlan ne wümjongte “Saki” she nyik, hangjingne iman-e i, “Youngwanpa Kahwang ngohnang she teman pa me hatüo saki ngohnang.”