Read Konyak Naga JOSHUA 24 Bible Online

JOSHUA 24 - Konyak Naga bible

JOSHUA 24

¹Hüyange Joshuawe Israel jat khongküm Shekhem me jemne tam, hüyange Israel lwngmeilan, üshanglan, kahpalan, hüyange iman woipalan nyik; hüyange iman Kahwang ompu nyoi shongte pei.

²Hüyange Joshuawe kahtalan khongkümpute i, “Israel Kahwang Youngwanpawe hüke inang, ‘Üshongpe numan pajeiyonglan, Abraham hüyange Nahor üpa Terah iman Euphrates yengyin jayekao me nyoi; hüyange iman-e ülao kahwang shaoshan.

³Hüyange Taowe numan pajeiyong Abraham yengyin jaye mepu woi peiye, I Kanan kahtok khongkümpu kaiye woi, hüyange I üli üngang jalunne tam, hüyange Taowe Ite Isaac pha;

⁴hüyange Isaacte Taowe Jacob hei Esau pha. Hüyange Taowe Esaute Seir phaotang kahmük yahlak pha; hüyange Jacob hüyange I hayim Egypt kahtokte ta.

⁵Hüyange tüophei me Taowe Mosa hei Aaron ni shon, hüyange Taowe tüome lingpuke Taowe Egypt leam kaiye shaoshi tam; hüyange phei me Taowe numan woipei.

⁶Hüyange Taowe numan jing pajeiyonglan Egypt mepu woipei, hüyange numan yengching te pei, hüyange Egypt lan-e tongtoi hüyange koipong me shotyange Ütak Yengching ngoiye numan jing pajeiyong lante jange pei.

⁷Hüyange aope iman-e Youngwanpate üngwün, Iye numan hei Egypt lan nipa me nyakpu peitam hüyange iman tangme yengching yah peiye imante küp; hüyange Taowe Egypt me hanghe ling, hatüo numan mük-e ngeteki; hüyange nyih nangjange numan wanwüng jeng me ngoh.

⁸Hüyange Jordan kaiyange ngohpu Amorlan kahmük te Taowe numan woipei; hüyange iman-e numan phei hok; hüyange Taowe iman numan yak me pha, hüyange numan-e iman kahmük yah; hüyange numan sheshao me Taowe iman mahtam.

⁹Hüwante Moab ahngpa Zippor üha Balak-e Israel phei tüi-e yong hüyange hok; hüyange Iye Beor üha Balam nyik-e numante phoiwümlak jingne shon.

¹⁰Hüpoi Taowe Balamte yejai, tüokhei Iye lüppe ye-e numan moimantam; hüke Taowe I yak mepu numan woipei.

¹¹Hüyange numan-e Jordan kaiyange taiye Jerikho te pei, hüyange Jerikho kahtalan, Amorlan, Perizzlan, Kananlan, Hitlan, Girgashlan, Hivlan, hüyange Jebuslan-e numan phei hok; hüyange Taowe iman numan yak me phünne pha.

¹²Hüyange numan lahhan yejema-a numan yanglow yejonpe numan sheshao mepu Amorlan ahngpa ni omme iman jange teine Taowe numan shaoyete shangtak nyahnyu shon.

¹³Hüyange kahmük ja hanghe me numan yeshang, hanghepa chingnyu numan-e yeling hüyange ümeken me numan-e wuwüngti kah hüyange minngape yedeipute numan-e hahnang, Taowe numante hatüo pha hüyange tüoken me numan ngohnang.’

¹⁴“Tüokhei sha-a numan-e Youngwanpa te nyamtüoh, hüyange innenyaipu phei hüyange ütingpa phei I shaoshan tüoh; hüyange Egypt hüyange yengyin kaiyange numan pajeiyong lan-e shaoshanpu kahwanglan yah teitüoh; hüyange numan-e Youngwanpa shao shantüoh.

¹⁵Sha-a numan-e Youngwanpa shaoyeshan huma-a, numan-e aohipa shaoshan lakei tenyih muh letüoh, yengyin kaiyange numan payimlan-e shaoshanpu kahwanglan yejema-a Amorlan kahwanglan aoyin kahmük me numan ngohnang; hüpoi tao hüyange tenok noksalan toman-e Youngwanpa shaoshanlak.”

¹⁶Hüwante kahtalan-e jan-e i, “Toman-e Youngwanpa winne tüohyange ülao kahwang shaoshanlaka toman mepu Kahwange tientüoh!

¹⁷Hangjingne aowe toman woipei hüyange toman pajeiyonglan Egypt kahtok me rha nok mepu woitei, aowe tüolan füo üyong ling, hüyange toman taipu lamnyu üshei me, hüyange toman-e lin-e taipu kahtok khongkümpu mepu yinne ang, I toman Kahwang Youngwanpa ngohnang.

¹⁸Hüyange Youngwanpawe kahta khongküm, hüke tüopa kahmük me ngohpu Amorlan, toman sheshao mepu jange tei; tüokhei tomane-o Youngwanpa shaoshanlak, hangjingne I toman Kahwang ngohnang.”

¹⁹Hüpoi Joshuawe kahtalante i, “Numan-e Youngwanpa shaoshanne ye-okne ok, hangjingne I üjao Kahwang, hüyange müktakpu Kahwang ja ngohnang; Iye numan ümeng yejema-a ünu yewinlak.

²⁰Numan-e Youngwanpa winne tüohyange yinpa kahwang shaoshan ma-a, hüwante Iye leihye-e, Iye numante ümei linge ngohyangpu ne mengyapoi, numante ümeng linglak hüyange numan mahtam phalak.”

²¹Hüyange kahtalan-e Joshuate i, “Yeje! Tüoyangpoi toman-e Youngwanpa shaoshanlak.”

²²Hüyange Joshuawe kahtalante i, “Numan-e Ite shaoshanlak Youngwanpa leye yahpu-a numan kaiye numan saki ngoh nang.” Hüyange iman-e i, “Toman saki ngohnang.”

²³Tüokhei Iye i, “Hümma-a sha-a numan yo me ngohpu yinpa kahwang yahtei tüoh hüyange numan mongjang Israel Kahwang Youngwanpa tangte lüptüoh!”

²⁴Hüyange kahtalan-e Joshuate i, “Toman-e Youngwanpa toman Kahwang shaoshanlak hüyange toman-e I ngaolan jailak.”

²⁵Tüokhei tüonyih me Joshuawe kahtalan phei jiengjeppu ja ling; hüyange imante Shekhem me nyanpu ngaokhüm hüyange linglak ngaokhüm pha.

²⁶Hüyange Joshuawe Kahwang ngaokhüm laitep me tüolan ngao nyan, hüyange Iye long üyong ja yahpei hüyange Youngwanpa khümjing nok ü-o me longkhampee jüngme tüopa yong.

²⁷Hüyange Joshuawe kahtalan khongkümpute i, “Leihuyah, tüopa longa teman jingne saki ja ne ngohlak, hangjingne tüopawe Iye temante ngaopu Youngwanpa ngao khongkümpu jaiteki; tüokhei numan-e numan Kahwangte yejanma-a, tüopawe numan phei tüi-e saki ja ne ngohkülak.”

²⁸Tüophei me Joshuawe kahta lili yoi yoi mothleipu kahmük nyoite shonne yene tam.

²⁹Tüolan linyang phei me hatüo ngai, Nun üha Youngwanpa shaoshanpa Joshua wangpeng gho ja phei me pen shepupa me liyangki.

³⁰Hüyange Gaash kahtang apyekao me Ephraim phaotang kahtok me ngohpu I mothlei yikeng Timnath Serah me iman-e I mu.

³¹Hüyange Joshua hipak khongkümpu me hüyange Joshua phei me ngohpu lwngmeilan hipak khongkümpu me Israel-e Youngwanpa shaoshan; hüyange Iye Israel jingne lingpu toishao khongkümpu shinge ngohyangki.

³²Hüyange Israel kahtalan-e Egypt mepu yahpeipu Joseph waanlan Shekhem üpa Hamor ühalan mepu Jacob-e khüm ngin gho ja phei shakpu kahmük üjinghapu Shekhem me mu; hüyange tüolan-a Joseph huhayimlan mothlei ne meng.

³³Hüyange Aaron üha Eleazar li, hüyange Ite phapu Ephraim phaotang kahmük me Iha Phinehas kahtang me iman-e I mu.