Read Konyak Naga JOSHUA 3 Bible Online

JOSHUA 3 - Konyak Naga bible

JOSHUA 3

¹Ünenap Joshua hüyange Israel kahtalan khongküm shonge shinlüo, hüyange I hei Israel hayim khongkümpu Shittim mepu yayonge Jordan te lai, hüyange yengyin kaiye taishao me iman-e tüoken me lak.

²Nyihlüm lin phei me woipalan-a lakjing lin-e tai;

³hüyange kahtalante ngaophawe i, “Aope numan Kahwang Youngwanpa jiengjeppu ghonu Levi nokphong ngengpalan-e paiyange tai-e ngelakei, hüwante numan-e yoi ngohpu nyoi mepu yayonglak hüyange tüopa pheite taitüoh.

⁴Tüopa nyoi me numan üshongpe aope-o manpei, tüokhei iman-e numante tailak lam hüophalak. Hüpoi jiengjeppu ghonu shongte owe tahwen; tüopa mepu kilometer ja nanjing yanne ngohtüoh.”

⁵Joshuawe kahtalante i, “Numan jaowe shawe tümyah, hangjingne ngainyih Youngwanpawe numan yo me yashanyali linglak.”

⁶Hüyange Joshuawe ngengpa lante i, “Jiengjeppu ghonu paiyange kahtalan sheshao yete taitüoh.” Hüyange iman-e jiengjeppu ghonu pai hüyange kahtalan sheshao yete tai.

⁷Hüyange Youngwanpawe Joshua te i, “Tenyih Israel khongkümpuwe ngeye nang yongelüowe tamlak jingne wangnang, tüokhei Mosa phei Tao omme ngohpuke nang phei Tao ompu iman-e shinglak.

⁸Hüyange nange jiengjeppu ghonu paipalan ngengpalante ngaophawe itüoh; ‘Aope numan-e Jordan yengnahte peilakeih, numan-e Jordan me yepope yongtüoh.’ ”

⁹Hüyange Joshuawe Israel kahtalante i, “Tüome jemkei hüyange Youngwanpa numan Kahwang ngaolan jaiyah.”

¹⁰Hüyange Joshuawe i, “Tüome jinte üküm yenangpu Kahwang numan yome ngohnang she numan-e shinglak hüyange Kananlan, Hitlan, Hivitlan, Perizzlan, hüyange Girgashlan, Amorlan, hüyange Jebuslan khongküm Iye numan sheshao mepu lanshe ütingpa me jange winlak.

¹¹Leihuyah, kahtoknyu khongkümpu tangme Youngwanpa jiengjeppu ghonu numan phei Jordan kaiye tainang.

¹²Tüokhei sha-a Israel nokphong mepu kahta pen me ni, nokphong lili mepu kahta ja ja letüoh.

¹³Hüyange hatüo ngailak, kahtoknyu khongküm tangme Youngwanpa Kahwange, Youngwanpa jiengjeppu ghonu paiyange ngengpalan-e aope Jordan yeng me yaloklakei, ütokye mepu yünne tapu Jordan yeng-a laklak, hüyange ü-oun ja ne hei menge tanlak.”

¹⁴Hüyange aope kahtalan-e Jordan kailak jingne yoi nyenok mepu yayong, hüyange jiengjeppu ghonu paipu ngengpalan iman shaote tai,

¹⁵hüyange aope jiengjeppu ghonu paipalan-e Jordante lai ngoi, hüyange jiengjeppu ghonu paipu ngengpalan ya yengnah me lok, (hangjingne hatüowa tahyah ju hüyange yengyin muleam-e ngohpu hipak ne ngohyangki;)

¹⁶hüwante ütokye mepu tapu yeng-a Zarethan ü-o me Adam chingnyu mepu nangjange jai-e lak-e ü-oun ja ne menge süng, hüyange Arabah yengching hatüowa Hüm yengching omme khongküm, yengyinphün, hüyange kahtalan-e kaiye taiyange Jerikho phei janhüowe ngoi.

¹⁷Hüyange Youngwanpa jiengjeppu ghonu paipu ngengpalan Jordan hotan kahtok üwan tangme mongjüonge yong, hüyange nokphonglan Israel khongkümpu kahtok üwan tangme linne tai.