Read Konyak Naga JOSHUA 4 Bible Online

JOSHUA 4 - Konyak Naga bible

JOSHUA 4

¹Aope jat nopu Jordan kaiye küm, Youngwanpawe Joshuate i,

²“Nange kahtalan yo mepu kahta pen me ni, nokphong lili mepu kahta ja ja letüoh;

³hüyange imante hüke ngao phatüoh, ‘Numan-e Jordan hotan ümeken me ngengpa lan-e ya mongjüonge yong, tüoken mepu long penme ni toontüoh, hüyange tüolan-a numan phei yahyange taiye teya numan ümeken me laklakei tüoken me angtüoh.’ ”

⁴Hüwante Joshuawe kahta pen me ni, aoyin Iye Israellan nokphong lili mepu japong le, iman nyik;

⁵hüyange Joshua imante i, “Numan-e Youngwanpa numan Kahwang jiengjeppu ghonu kaiye taiye Jordan hotante yutüoh; hüyange Israel hayim nokphong kih-e numan kahta liliye yoi phaktang me long japong toonne paitüoh.

⁶Tüopa longe hüke ngoikülak hipak me numan hayimlan-e ‘Tüolan long pen me nite leppuwa hanghe shi?’ she tongwante, tüopawe numan yo me teihtüopu füo ja ne ngohlak!

⁷Hüwante numan-e imante ilak, ‘Hangjingne Jordan yengyin-a Youngwanpa jiengjeppu ghonuwe kaiye taiwante I sheshao me phünne mah. Tüokhei tüolan longe hatüo nyoi me hanghe ngaiyangki Israel kahtalante hipak phe me teih tüo ne tamnang.’ ”

⁸Hüyange Israel hayimlan-e Joshuawe ngaowe tampuke ling; Youngwanpawe Joshua te ngaopuke, Israel hayim nokphong phei shuwe iman-e Jordan hotan mepu long penme ni yahngai hüyange iman phei tüolan-a lakjing me yahtei-e ang, hüyange tüolan-a tüoken me shomme tüoh.

⁹Hüyange ümeken me jiengjeppu ghonu paiyange ngengpalan yong, tüoken me Joshuawe long penme ni toonne yah-e shomme ang, hüyange tenyih ngoiye tüolan-a tüoken me ngohnang.

¹⁰Hangjingne Mosawe Joshuate ngaowe tampuke Youngwanpawe Joshuate kahtalante ngaowe tamlak phapu mansho mansho jiengjeppu ghonu paipu ngengpalan-a Jordan hotan me yongyange tan. Yengyin kailak jingne kahtalan mam-e linne tai.

¹¹Hüyange aope kahtalan khongkümpu linne taiye janye me ngoh, Youngwanpa jiengjeppu ghonu hüyange ngengpalan-a kahtalan nge-e jaye jan te pei ngoi.

¹²Hüyange Mosawe imante ngaowetampuke Reuben hayim, Gad hayim, hüyange Manasseh nokphong tangkhüw ngou hei yang phei Israel hayim shaote tai;

¹³shapju hoklak jingne tümpu kahtalan haja deli nanjing Youngwanpa sheshao me lin-e Jerikho kahjee te tai.

¹⁴Tüonyih-a Youngwanpawe Joshua Israellan sheshao me kahta üyong ja ne linge tam, hüyange iman-e Mosate nyamlepuke I üyin jin küm-e iman-e Ite nyammele.

¹⁵Hüwante Youngwanpawe Joshuate i,

¹⁶“Jiengjeppu ghonu paipu ngengpalan Jordan mepu ngailak jingne ngao phatüoh.”

¹⁷Tüokhei Joshuawe ngengpalante ngaophawe i, “Numan Jordan mepu ngaitüoh.”

¹⁸Hüyange aope Youngwanpa jiengjeppu ghonu paiyange ngengpalan Jordan hotan mepu ngai, hüyange ngengpalan ya yengnah kahwan nyoite lok, Jordan yeng-a iman yoi ngohjing nyoite ye, hüyange üwang ngohyangpu kih yengnah khongkümpu me maa-e phai.

¹⁹Hüyange kahtalan-a üwangpa lekeng pen shepupa nyih me Jordan mepu ngai hüyange Jerikho heongye yikeng Gilgal me lak.

²⁰Hüyange Jordan mepu yahpu tüolan long pen me ni-a Joshua Gilgal me shomme ang.

²¹Hüyange Iye Israel hayimlante i, “‘Tüolan longte leppuwa hanghe shi?’ she ngoikülak jin me numan huhayimlan-e iman payimlante tongma-a,

²²hüwante ‘Israellan kahtok üwan me tüopa Jordan kaiye pei she imante itüoh.’

²³Hangjingne Youngwanpa numan Kahwange Ütak yengching (lingpuke) teman linne mantai küm mantai küm she teman sheshao me eamahpuke, hüke Youngwanpa numan Kahwange numan linne mantai küm mantai küm she Jordan yeng numan sheshao me eamah.

²⁴Tüokaiye kahtoknyu me ngohpu kahta khongkümpuwe Youngwanpa üngan wonga hangshin yongpu she shinglak, hüyange numan-e numan jing Kahwang Youngwanpa te jinjinte yihnoonlak.”