Read Konyak Naga JOSHUA 5 Bible Online

JOSHUA 5 - Konyak Naga bible

JOSHUA 5

¹Aope Jordan kaiyange henyip yekao me ngohpu Amorlan ahngpa khongkümpuwe hüyange Mediterranean yengching ü-o me ngohpu Kananlan ahngpa khongkümpuwe, Youngwanpawe Israel hayim sheshao me hangke Jordan yeng-a iman linne mantai küm mantai küm eamah ne tampu jeng jai, iman mongjang yenangpe hüyange Israel lante nyampuwe imante shaaji yaha yenangpe mah.

²Tüopa hipak me Youngwanpawe Joshua te i, “Nange yeonge pahpu nyit ha lingtüoh hüyange Israellan nishe shokhüp tüoh.”

³Tüokhei Joshuawe pahpu nyit ha ling hüyange Israel hayimlan Gibeath-Haaraloth kahtang me shokhüp.

⁴Hüyange Joshua kaiye shokhüpne ngaipu, tüopa saki-a hatüo ngohnang; Egypt kahtok mepu peipu kahtalan yo me, netan khongkümpu, hüke Egypt kahtok mepu ngaiyang phei me phaonyu jong lamme hok-e okpu kahta khongkümpu limah.

⁵Aoyin ngaiyangki tüolan khongkümpu shokhüp yapeyoi, Egypt kahtok mepu ngaiwante phaonyu jongme lamme puhpu kahta khongkümpu sho yekhüp.

⁶Hangjingne iman-e Youngwanpa ngaowüngte mong yepha hüyange yejaipu jingne jat noshepu hüke Egypt kahtok mepu ngaipu hok-e okpu kahta omme manmah manmah, Israel hayim phaonyu jong me wangpeng deli kem; hangjingne Iye imante phalak she iman pajeiyong lante janpu, düamyeng hüyange zahtai jelo yünpu, kahmük-a ye-ngetamlak jingne Youngwanpawe jiengjep.

⁷Tüokhei iman hayimlan aoyinne iman nyoijing lei, Joshuawe iman shokhüp; iman-a lamme sho yekhüp pukhei, iman üne-o sho mankhüppe ngoh yangki.

⁸Aope jat nopuwe shokhüppu yah sho, iman maa manmei manmei lakjing yoi nok me nyoi ngoh yangki.

⁹Hüyange Youngwanpawe Joshuate i, “Tenyih Taowe nang mepu Egypt kahtok shanghah shaoshi khok-e teitam nang.” Tüokhei tüopa kahmükte tenyih ngoiye Gilgal she nyiknang.

¹⁰Aope Israel kahtalan Gilgal me lakyapeih, Jerikho kahjee me tüopa leat penme peli shepupa nyih me linne taipu mo ünpong me ngoh.

¹¹Hüyange linne taipu mo ngohyang phei me ünenyih-a tüopa kahmük me ngaipu ülicklan mepu do yenyetpu an hüyange ngüwpu an tüonyih hah.

¹²Hüyange iman-e kahmük me ngaipulan hah phei me üne nyih-a manna yütpu shaaji lakmah, hüyange Israel hayimlan-e shaaji manna ye-nge; hüpoi tüopa wangpeng me peiye iman-e Kanan kahtok me ngaipu hahying pelick wenglick hah.

¹³Aope Joshua Jerikho shongte owe pei Iye mükwem hüyange ngan-e lei, hüyange hüowü, tüoken me kahta ja I yak me yanglow ja jonyange I sheshao me yong, hüyange Joshua I tangte wen hüyange i, “Nang toman jingne heiya yejema-a toman phei wepa ne?”

¹⁴Hüyange kahtapawe i, “Hanghepane-o yeje.” “Hatüo me tao Youngwanpa jing nyahponglan woipa ja ne ngohnang.” Joshuawe I sheta kahtokte khuh tayange khüm, hüyange Ite i, “Ü-nokpuwe I shaoshanpa üte hanghe lingne tamhupu shi?”

¹⁵Hüyange Youngwanpa jing nyahponglan woipawe Joshuate i, “Nang ya mepu yashom khoktüoh, hangjingne nang yongjing kahtok nyoi-a üjao ngohnang.” Hüyange Joshuawe hüke ling.