Read Konyak Naga JOSHUA 6 Bible Online

JOSHUA 6 - Konyak Naga bible

JOSHUA 6

¹Sha-a Israel hayimlante nyampuwe Jerikho chingnyuwa mongjüonge pejong latyange, ao-o ye-ong, yejema-a ao-o yeyupe ngoh.

²Hüyange Youngwanpawe Joshua te i, “Leitüoh, Jerikho hüyange tüome ngohpu ahngpa hüyange mengshipu wongnangpu kahtalan-a Taowe nang yak me phanang.

³Nang hüyange nangjing wetaipalan nyih wok mongme nyih te ja me tüopa chingnyu te neikonlak.

⁴Hüyange ngengpa nyit-e nyeepong üwonge lingpu nyawong (pongwong) nyit japong jonyange jiengjeppu ghonu sheshao me kemlak. Hüyange nyit shepupa nyih me nang hüyange nangjing wetaipalan-e chingnyuwa nyit me neikonlak hüyange ngengpa lan-e nyawong lan-a wünglak.

⁵Hüyange aope iman-e nyawong wongnange wünglakei hüyange aope numan-e nyawong wüng jailakei hüwante kahta khongkümpuwe ngaowüng üyong phei üngwünlak, hüyange chingnyu jantpenyuwa khüw toitalak. Hüwante nyahponglan khongküm yoi phei tinge tingkhak-e chingnyute onglak.”

⁶Hüyange Nun üha Joshuawe ngengpalan nyik hüyange imante i, “Jiengjeppu ghonu paitüoh hüyange Youngwanpa Jiengjeppu ghonu sheshao me numan ngengpalan nyit-e nyawong nyit jonyange kemtüoh.”

⁷Hüyange Iye yoi kahtalante ngao phawe i, “Shaoyete taitüoh, hüyange chingnyute neikontüoh, hüyange yang hei ngou pheipu kahtalan-a Youngwanpa jiengjeppu ghonu shaote kemtamtüoh.”

⁸Joshuawe kahtalante ngaowe tampuke, ngengpa nyit-e nyawong nyit jonyange Youngwanpa sheshao me lin hüyange nyawonga wüng, hüyange Youngwanpa Jiengjeppu ghonu iman phei woi.

⁹Hüyange yang hei ngou pheipu we pheihpalan-a nyawong wüngpu ngengpa shaote tai, hüyange ükhong meinyuwa jiengjeppu ghonu iman pheite woi hüyange iman taiwante ngengpalan-e nyawong wüngjang wünge tai.

¹⁰Hüpoi Joshuawe kahtalante ngaophawe i, “Numan-e taowe üngwüntüoh she ipu nyih manngoi manngoi numan-e üng yewünlak, yejema-a numan-e ngaowünga jai ne tahtam, yejema-a ngaokek ja nehoi numan ju mepu tahngaitam; tüophei me nakshih numan-e üngwünlak.”

¹¹Tüokhei Iye tüopa kahta ükhongte Youngwanpawe jiengjeppu ghonu phei chingnyute ja me neikonlak jingne ngaowe tam. Tüophei me iman lakjingte leihye hüyange tüome phapüm.

¹²Tüophei me Joshua napning shonge lüo hüyange ngengpalan-e Youngwanpa jiengjeppu ghonu-a yah.

¹³Nyawong nyit jonpu ngengpa nyit-a Youngwanpa jiengjeppu ghonu shongme yelakpe tai, hüyange nyawonga wüngjang wünge tai; hüyange yang hei ngou pheipu kahtalan-a iman sheshao me tai, hüyange meinyuwa Youngwanpa jiengjeppu ghonu pheite woi; iman kemjang kemme ngengpalan-e nyawong wüngkhan wünge tai.

¹⁴Hüyange üne nyih iman-e chingnyu-a ja me neikon, hüyange lakjing te leihye; hüke nyih wok mongme iman-e ling.

¹⁵Nyit shepupa nyih me iman-e shomme shonge lüo hüyange ülao hipak me lingpuke chingnyu jantpenyu-a nyit me neikon; tüonyih hei iman-e chingnyuwa nyit me neikon.

¹⁶Hüyange nyit shepupa me hatüo ngai, aope ngengpalan-e nyawonga wüng, Joshuawe kahtalante i, “Üngwüntüoh, hangjingne Youngwanpawe chingnyuwa numante phateki!

¹⁷Chingnyu hüyange tüome ngohpu khongküm Youngwanpate dopu ja ne mengetamlak jingne phünne phateki; üshoyüonyu Rahab, yha hüyange yha noksa me ngohpalan hei üyin me anglak, hangjingne teman-e shonpu kuhshükpalan yhawe lowe ang.

¹⁸Hüyangpoi numan jingne-a tüolan menglak phünne phapu toinan mepu numan nying nyingke yanne ngohtüoh, hüke yelingyah ma-a numan-e tüopa-a phünne phawante, numan-e phünne phapu toinan yahyange tüopawe numan-e Israellan lakjingte phoiwümpu yahpeilak hüyange shaoshi ne tamlak.

¹⁹Hüpoi hon, khüm khongkümpu hüyange shakphan yan hüyange yan wanlan-a Youngwanpa sheshao me üjao ngohnang, tüolan-a Youngwanpa te dojing yamme peilak yang.”

²⁰Tüokhei ngengpalan-e nyawong wüng. Kahtalan-e tüopa wüng jaipu phei jam she iman-e yeonge üngwün-e haatam, hüyange jantpenyuwa khüwtoita. Tüophei me nyahponglan khongkümpu yoi sheshao me tingkhak-e chingnyute ong hüyange iman-e chingnyuwa yah.

²¹Hüyange iman-e chingnyu me ngohpu netan hei sheko, naha hei lwngmei mahu üpong hüyange nyee hei gado khongkümpu yangphei mahne tam.

²²Hüyange Joshuawe kahmük kuhshükpa nite i, “Üsho yüonyu nokte ongtüoh hüyange nangniye yhate jiengjeppuke shekonyu-a hüyange yha noksalan khongküm tüomepu yahpeikei.”

²³Tüokhei kuhshükpa naoshe ni ong, hüyange Rahab hüyange yha üpa hei inyu, yha pheipu jeihei naolan, hüyange yha me nangpu khongküm yahngai. Imni-e yha noksa khongkümpu omme woi ngai, hüyange Israellan lakjing ü-at yeme iman tüoh.

²⁴Hüwante iman-e chingnyu hüyange tüome ngohpu khongkümpu vün phei jakke win hüyange hon hei khüm hüyange shakphan yan hüyange yanne lingpu toinan iman-e Youngwanpa jingne yojing nyoi me ang.

²⁵Hüpoi üsho yüonyu Rahab, hüyange Ipa noksa hüyange yha me nangpu khongküm Joshuawe üyin me yintam; hangjingne ima-a Jerikho te kuhshüklak jingne Iye shonpu kahta ni yhawe lowe ang. Yha jalunpu huhayimlan tenyihte ngoiye Israel me ngohnang.

²⁶Hüyange tüopa hipak me Joshuawe imante lahnyik mongkopu deingao ja ngaiye i, “Aowe tüopa Jerikho chingnyu loiye linge yelakei, tüopa kahta-a Youngwanpa sheshao me phoiwümpu shahlak. “Aowe nokjing yonge wanglakei Iye yoiha jeiyongpa mahlak. Aowe peten linge wanglakei Iye yoiha ükümpa mahlak.”

²⁷Hüke Joshua phei Youngwanpa omme ngohyangki hüyange I teehepu kahmük khongkümpu me ngohyangki.