Read Konyak Naga JOSHUA 7 Bible Online

JOSHUA 7 - Konyak Naga bible

JOSHUA 7

¹Hüpoi Israellan-e phünphayangpu toinante mong yehümlakne ling; hangjingne Judah nokphong mepu Zerah üha, Zabdi üha, Carmi üha, Achan-e phünphayang phei toinan ütam yah; tüokhei Israellan tangme Youngwanpa mongshih ngaipu loongngai.

²Joshuawe Jerikho mepu Beth-aven ü-o me Bethel heong yeme ngohpu Ai te kahta shon, hüyange imante i, “Ongtüoh, hüyange kahmükte kuhshük-e leihu.” Hüyange kahtalan ong hüyange Ai te kuhshük-e pong.

³Hüyange iman-e Joshua tangte leihye-e i, “Kahta khongkümpuwa ongne yetampe kahta haja ni yejema-a lüm hei ongne tamyange Ai chinghah ne tamtüoh. Kahta khongkümpu ongyange shangne-a tahling, hangjingne iman-a chingha ja hei ngoh nangki.”

⁴Tüokhei Israellan haja lüm nanjing yayonge shümyangki, hüpoi iman-a shunge yenetam.

⁵Hüyange Ai kahta lan-e peten mepu Shebarim ngoiye jange taiye iman nyaiye ngohwante kahta delüm me wok nanjing toi; hüwante Israellan iman mongyongpu mah, hüyange nyampu pei.

⁶Hüwante Joshua hüyange Israel woipalan-e mongmengpuwe iman jing inkhek hit, Youngwanpa jing jiengjeppu ghonu sheshao me kahtokte iman nying nyingke toita, hüyange mongmengpu hüowe iman shangme kahmak-e phuyange ünpong ngoiye tüokenme lamyange ngoh.

⁷Hüyange Joshuawe i, “O Youngwanpa Kahwang, toman Amorlan yakme phünne phawe toman mahlak ne nange hangne tüopa kahtalan Jordan kaiye woi peipu? Toman Jordan jayekao me monghahwe yetaipe ngohpupa shemeihah shepu!

⁸O Youngwanpa, Israel lan-e shaaji yoi wepa mepu nyam-e yeteki; taowe hangke ihah shi?

⁹Kananlan hüyange tüo kahtok me ngohpu kahtalan üsheiye hatüo jaikülak, hüyange tomante neikonkülak, hüyange tüo kahtok mepu toman min teh-phün-e winkülak. Hüma-a nang Ütahpa min jingne nange hang linglak?”

¹⁰Youngwanpawe Joshuate i, “Yongtüoh, hangjingne hüke nang sheta kahtokte khuhyange ngohpu?

¹¹Israelle ünu omteki; Taowe imante ngaowe tampu ü-jiengjeppu iman-e mengteki; meng winlak jingne phünne phayangpu toinan ütam yahteki, iman-e kuhteki, hüyange iman-e lowe ang hüyange iman-e tüopa-a yoi toinan yo me nyüt-e angteki.

¹²Tüokhei Israellan iman wepalan sheshao me yeyong ok; iman wepalan sheshao mepu iman phüt-e tai, hangjingne iman nying nyingke iman-a menge winlak jingne phünphayangpu toinan ne meng. Numan yomepu menge winlak jingne phünphayangpu toilan menge yewinma-a, Tao shaaji numan phei yengohlak.

¹³Yayongtüoh! Kahtalan jaowe tamtüoh, hüyange itüoh, ‘Ngainyihpu jingne numan nying nyingke jaowe shayah, hangjingne Israel Kahwang, Youngwanpawe hüke inang, “Numan phei meng winlak jingne phayangpu toinan ngohnang, O Israellan; numan-e phünne phapu toinan-a numan yo mepu yah mantei mantei, numan wepalan sheshao me numan yeyong oklak!”

¹⁴Tüokhei napning numan nokphong peitüoh. Youngwanpawe toon yahpu nokphong mepu, puhu puhu shaote peilak, Youngwanpawe toon yahpu puhu mepu nyahtap nyahtap shaoyete peilak, hüyange Youngwanpawe toon yahpu nyahtap mepu kahta ja phei me ja she shaoyete peilak.

¹⁵Hüyange hüwante aohipa kahta toonne yahlakei hüyange ao me phünne phapu toinan tüolakei, I hüyange I me nangpu khongkümpu vün me jaklak; hangjingne Iye Youngwanpa jiengjeppu meng hüyange Israellante wüophawe tam.’ ”

¹⁶Tüokhei Joshua napning shonge lüo, hüyange Israellan-a nokphong nokphong ü-o-te woipei, hüyange Judah nokphong toonne yah.

¹⁷Hüyange Judah nokphong sheshao yete I shongte puhu phei me puhu she woipei; hüyange Zerah puhu toonne yah. Hüyange Iye Zerah puhu nyahtap nyahtap woipei, hüyange Zabdi toonne yah.

¹⁸Tüophei me Iye Zabdi nyahtap kahta ja phei me ja she sheshao me yahpei, hüyange Carmi üha hüyange Zabdi ühu Achan toonne yah.

¹⁹Hüwante Joshuawe Achante i, “Üha, hatüo me Israel Kahwang Youngwanpate müktishiwa tüoh, hüyange Ite minyong phatüoh. Nange hanghe lingyangki üte sha-a itüoh. Ü-mepu tüopa lowe tah-ang.”

²⁰Hüyange Achan-e Joshuate jan-e i, “Hatüowa üting. Ütingme Israel Kahwang Youngwanpa phei tüi-e taowe ünu omyangki, hüyange taowe hüke ling;

²¹aope chinghahpu toinan yo me Babilonlan inkhek ümei ja, khüm kilogram ni nanjing, hüyange honlong ja tokpu me kilogram tangkhüw nanjing tüo; hüwante tüolan-a taowe waowelei, hüyange tüolan taowe yah; hüyange leihu, ü-nyenok phangme khüm-a üphangpa ne taowe tüolan-a kahmong me jüowe angnang.”

²²Tüokhei Joshuawe shaoshanpalan shon, hüyange iman-e nyenokte phette pei hüyange leihu, khüm üphangpa ne menge tüopa-a I nyenok kahtok ümong me jüowe angpu tüoyangki.

²³Hüyange iman-e tüolan-a nyenok hotan mepu yahngai hüyange Joshua hüyange Israel hayim khongkümpu tangte yah pei hüyange iman-e tüolan-a Youngwanpa sheshao me tüoh.

²⁴Hüyange Joshua hüyange Iphei ngohpu Israellan khongkümpuwe Zerah üha Achan, hüyange khüm hüyange inkhek hüyange hon long hüyange Ihalan, hüyange I yhalalan, hüyange inok mahu hüyange Gado hüyange inok nyee, imanjing nyenok hüyange Ime nangpu khongküm yahyange, iman-e tüolan khongkümpu Achor kahjeete (shaoshi kahjee) yahpei.

²⁵Hüyange Joshuawe i, “Hangne nange toman shaoshine tampu? Youngwanpawe tenyih nang shaoshi ne tamlak.” Hüyange Israellan khongkümpuwe Achan longe shüppe toi; iman-e inok noksalante-o longe shüpyange toinyu nanha khongküm vün me jakke tam.

²⁶Hüyange iman-e I tangme long üngang shaiye phaoh, hatüo tenyih ngoiye ngohnang; hüyange Youngwanpawe I nyamlakpa ne mongshih ngaipu mepu lüp. Tüojingne tenyih ngoiye tüopa kahmükte Achor kahjee she nyik.