Read Konyak Naga JOSHUA 9 Bible Online

JOSHUA 9 - Konyak Naga bible

JOSHUA 9

¹Aope Jordan janyekao me ngohpu phaotang kahmük hüyange kahjee me ngohpalan, hüyange Lebanon sheshao yeme Mediterranean yengchingnyu yengnah me ngohpu Hitlan, Amorlan, Kananlan, Perizzlan, Hivlan, hüyange Jebuslan ahnglan khongkümpuwe Israel lan-e okke shangpu jai;

²iman khongküm Joshua hüyange Israellan phei hoklak jingne ja ne jamshe shüppe jem.

³Hüpoi aope Gibeon me ngohpu kahtalan-e Joshuawe Jerikho hei Aite hanghe ling hatüo jai,

⁴iman-e konphei ling hüyange iman-e ngaoshen pongpalan leye tüm, hüyange iman-e nyekhok ülang hüyange meisho tükkhok ülang hit tephei hüyange shinge yeyang phei, iman gado tok me ki ne tam;

⁵hüyange yashom ülang hüyange nyemo ülang iman-e yah hüyange iman hahying an khongkümpuwa üwan hüyange ümon hütteiye ngoh yangki.

⁶Hüyange iman-e Gilgal mepu lakjingte Joshua tangte pei, hüyange I hüyange Israel kahtalante i, “Toman kahmük üjai mepu peinangki, tüokhei sha-a numan-e toman phei jiengjeppu ja lingkei.”

⁷Hüpoi Israel kahtalan-e Hivlante i, “Aowe shing numan toman phei ngohpu kahtalanne-o ngohne oklakte hangke numan phei toman-e jiengjeppu ja linglak?”

⁸Iman-e Joshuate i, “Toman numan shaoshanpalan ngohnang.” Hüpoi Joshuawe imante i, “Numan aoyin hüyange ümeken mepu peipu?”

⁹Hüyange iman-e Ite i, “Youngwanpa nang Kahwang min jingne nang shaoshanpalan kahmük üjai mepu peiki; hangjingne toman-e I jeng hüyange Iye Egypt kahtok me lingpu khongküm,

¹⁰hüyange Jordan kaiyang phei me ngohpu Amorlan ahngpa nite lingpu khongküm, Heshbon ahngpa Sihonte hüyange Ashtaroth me ngohpu Bashan ahngpa Og te lingpu jai.

¹¹Hüyange toman lwngmeilan hüyange toman kahmük me ngohpu khongkümpuwe tomante i, ‘Lamnyu jingne hahying numan yak me yahyah, hüyange iman pong te yutüoh, hüyange imante itüoh, “Toman numan shaoshanpalan ngohnang, tüokhei sha-a numan-e toman phei jiengjeppu ja lingtüoh.” ’

¹²Numan tangte peilak nyih me tüopa an toman hahying jingne nok mepu üshem me yahtai, hüpoi sha-a leitüoh, hatüo wanteki, hüyange ümon pahteki;

¹³hüyange toman-e weihümpu meisho tükkhok üla me ngohyangki, hüpoi leitüoh, tüolan hit-teki, hüyange toman lamnyu me laolünge kempu jingne toman nyemo hüyange toman yashom ülang ne mengteki.”

¹⁴Hüyangpoi Youngwanpate tonge yeleipe Israellan-e iman mepu hahying ütam yah.

¹⁵Hüyange Joshuawe iman phei chingmei ling, hüyange iman üyin angtamlak jingne jiengjeppu ja ling; hüyange ükhong yo me woipalan-e imante jiengjeppu yah.

¹⁶Iman-e iman phei jiengjeppu yahyang phei me nyih lüm shepupame, iman-a iman phei owe ngohpulan hüyange iman yo me ngohpu she jai.

¹⁷Tüokhei Israel hayimlan yayong, hüyange nyih lüm shepupa me iman chingnyulante pei. Iman chingnyulan Gibeon, Chephirah, Beeroth, hüyange Kiriath Jearim ngoh yangki.

¹⁸Hüpoi Israel hayimlan-e iman yetoi, hangjingne ükhong yo me woipalan-e Israel Kahwang Youngwanpa minme imante jiengjep; hüyange ükhong khongkümpuwe woipalan phei tüi-e ngu-nga.

¹⁹Hüpoi woipalan-e Israel khongkümpute i, “Israel Kahwang Youngwanpa minme toman-e imante jiengjeppu phayangki, tüokhei teman-e imante yak yune ye-ok.

²⁰Hüke teman-e imante linglak, hüyange iman üyin angtamlak, hüke yelingma-a teman-e imante jiengjeppe janyangpu khei Kahwang mongshih ngaipu teman tangme ngohkülak.”

²¹Hüyange woipalan-e imante i, “Iman üyin me angtamtüoh.” Hüyange woipalan-e imante ükhong khongkümpu jingne iman-a hanmoipa ne hüyange yenglaipa ne menglak she i.

²²Hüyange Joshuawe imante nyik, hüyange Iye imante i, “Numan toman yo me ngohyange, toman numan mepu üjai me taiye ngohnang she hangne toman lowelamne tampu?

²³Tüokhei sha-a numan phoiwümteki, hüyange Ü-kahwang jat jingne yenglaipa hüyange hanmoipa ne menge rha yatuhshao mepu aope-o numan yeyan lak.”

²⁴Iman-e Joshuate janne i, “Youngwanpa nang Kahwang I shaoshanpa Mosate numante kahmük khongküm phalak, hüyange tüo pa kahmük me ngohpu khongkümpu numan sheshao me mahtamlak she ngaowe tampuwa nang shaoshanpalante meimei-e ngaowe tam, tüojingne toman-e yoi üyin jingne numante yeonge nyammah, hüyange tüopa toi-a ling.

²⁵Hüyange sha-a leihuyah, toman nang yak me ngohnang hüyange nange tomante linglak hanghe shunang hüyange meinang she teihtüo hatüo lingtüoh.”

²⁶Tüokhei Joshuawe iman yinne tam hüyange Israel kahtalante iman toilak jingne Iye yetam.

²⁷Hüpoi Iye iman rha ne linge tam hüyange tenyih ngoiye iman-a ükhong jingne hüyange Iye lepu kahmük me Youngwanpa wümjong jingne hanmoipa hüyange yenglaipa ne Joshuawe tüonyih me ükong wange tampu ke ngohnang.