Read Konyak Naga 2 THESSALONI 1 Bible Online

2 THESSALONI 1 - Konyak Naga bible

2 THESSALONI 1

¹Paul, Silvanus, hei Timothy, Üpa Kahwang hüyange Youngwanpa Jesu Khrista me Thessaloni bumeinok tangte:

²Üpa Kahwang hüyange Youngwanpa Jesu Khrista mepu numan tangte shüpshe hüyange chingmei ngohtüoh.

³Jeiheinaolan, numan jingne toman-e Kahwang te minyong phalak jinte shunang; hangjingne numan ütinglakpu yeonge jongnang, hüyange numan üshei kahta lili jawe jayete teikenpu jonge tamnangki.

⁴Tüokhei numan shangne tampu üshei hüyange shangpu, hanghepa numan-e shinge peinang tüolan me numan ütinglakpu hüyange nün-okpu jingne Kahwang bumeinok üshei te toman-e toman nying nyingke numan jeng yongelüo nang.

⁵Hüyange Kahwang ahngching hanghe jingne shange pongnang, tüopa ahngching jingne numan wangngoipu she iye oklak jingne, numan shangpuwa Kahwang ngaoting ngaophünpu ütahte ngaipu yepinlakpa ngohnang.

⁶Ütingme, numan shangne tampalante shangpu leih-e phalak, tüopa-a Kahwang jingne ngaotingpa toi ngohnang;

⁷hüyange Youngwanpa Jesu vünloong me I wong wangdang shongmokpalan phei wangdang mepu ütahte ngaiwante, numan shange pongpu ngepalante toman phei toloimeipu phawe,

⁸Kahwang yeshingpalante, hüyange teman Youngwanpa Jesu pungao ümei ngao yejaipalante phuh hahpu phalak.

⁹Iman jinte mahlak jingne shangne tamlak, hüyange Youngwanpa hüyange I müktishiwa wongnangpu ompu yenanglak;

¹⁰aope tüonyih I peilakeih, Iye yoi üjaolan müktishiwa, hüyange mengpalan üshei mepu minyongpu tüolak, iman yo me numan omlak; hangjingne toman sakite numan-e mengyangki.

¹¹Hüyange tüopa jingne, Kahwange numan nyikpu wangnang she ilak, hüyange ümei jingne lahnyikpu üshei, hüyange ütinglakpu toi üshei ünganwong kaiye ngaitamlak jingne,

¹²hüyange teman Kahwang hüyange Youngwanpa Jesu Khrista shüpshe kaiye, teman Youngwanpa Jesu min numante hüyange numan I me müktishiwa oklak jingne tomane-o jinte numan jingne yopnang.